Read Mousgoum Ezekiyel 32 Bible Online

Ezekiyel 32 - Mousgoum bible

Ezekiyel 32

¹War mefeŋ n’avut na wiini tile n’ag'aŋ doogo pi sulu, miɗi na wiini EPIƊ-ƊAI a muɗa sa maini nɵa:

²" Tuku ɗif, ziniti yamai ktai zi tuwi midini Faraw, pai n’Egipte, ku muɗa sini maini nɵa: ku naka arbaɗi ɗai maini ahi gurnai nɵa, ku naka maini krum n’agoɗom pin yem nɵa, ku ɵiɓasi yem na war rakaiku par amai, ku durkusa yem amai gaini azuku, ku durkusa rakai amai.

³Epiɗ-ɗai Alaw a na muɗa maini nɵa: Won hlai na ɗai viya e diŋgi li, aga mu poka avaŋa muduku, aga ku yima arni, ɗai aga e supukusi amai war magaza na wiya.

⁴Aga mu kuku amai gdaŋ, mu buluku edi war basga su, aga mu hinasi wala zi ɗifli n’arbani hlai n’amai muduku, wazagai na midini afti paŋ aga a va warni gaiku.

⁵Aga mu pok neŋku amai midini huwuŋ, aga mu va hudukai gaini kolkoɗaiku n’a hina,

⁶aga mu hina afti a ca fel na kasi suku par n’a yorasi amai sini huwuŋ par, klurai paŋ aga a va gaini fel hanɗa lai.

⁷Won hlai na ku mra li, aga mu doogo hlai n’amai aga mu hina meeɵek a ŋala kai, aga mu yima ɗugul miɗi futi, tile aga a za gaglaini kir kaalai.

⁸Wazagai n’a za gaglai arbani hlai n’amai paŋ, aga mu bundaŋ gegeŋ buriku, aga mu hinasi gegeŋ midini aftiku a miɗi na halas sin Epiɗ-ɗai Alaw par.

⁹Aga mu limiɗi agulɗi ɗai viya, won hlai n’aga mu miɗiɗi wiiɗi pinzibaɗi ɗai, na midini afti na ku siɗaŋ maa kai, midini ɓilki n’edi na wiiku ɗa.

¹⁰Buriku tuku, aga mu vidiɗi pinziba viya edi, paakaiɗi hunai aga a yimiɗi buriku, won hlai na kaɵkar na wiya aga a vuga wuzani arɗi. Mefeŋ n’aga ku kɵa, ktai rbaɗi n’agulni aga te ziriya kai aŋ kai.

¹¹Buri Epiɗ-ɗai Alaw a na muɗa maini nɵa: kaɵkar na wiini pai na Babilon aga a niya aha warku.

¹²Aga mu vidiɗi vokku na viya edi min kaskar na wiiɗi ɗai zi hatam; ɗai n’e hilisi ɗa e ɗi pinziba na sabapai n’e suwi pinziba paŋ, aga e tûûri wazagai n’a naka a sa kol wiiɗi Egipte paŋ edi; vokɗi ɗaini na viya hanɗa aga e vidi edi kafa.

¹³Aga mu vada wazagai n’a na agoɗom wulani yem n’abakai edi; ezini ɗif aga a durguza yem ɗa amai kir kai, ezini farai aga a durkuzaŋ kir kaalai.

¹⁴Aga mu tikini hangalni yem na war Egipte azumai mu hina yem na war rakaini a ka gai hangal maini emel nɵa. -A miɗi n’a halas sin Epiɗ-ɗai Alaw par.

¹⁵Won hlai na mu bunda afti n’Egipte li aŋ basga, won hlai na mu vada wazagai n’aŋ warni paŋ edi li, na mu vidiɗi ɗai na warni edi li lai, nɵa ɗai aga e siɗi ɓa ta m’EPIƊ-ƊAI.

¹⁶Hanɗa a yama zi tuwi, ɗai aga e ziniŋ; ali-falakai na war pinziba paŋ aga e ziniŋ, e zini yama zi tuwi hanɗa midiɗi Egipte gaini vokɗi ɗaini paŋ! - A miɗi n’a halasi sin Epiɗ-ɗai Alaw par.

¹⁷War mefeŋ doogo pi ɵim na wiini tile, war buza n’ag'aŋ doogo pi sulu, miɗi na wiini EPIƊ-ƊAI a muɗa sa maini nɵa:

¹⁸" Tuku ɗif, ɵa hama burini vokɗi ɗai n’Egipte, gaini yama hanɗa, ku wûti azumai war hulumni afti, na gaiɗi pinzibaɗi ɗai zi spak ɗa paŋ. Gaiɗi nagai zi mri n’e niyi azumai warni waŋ.

¹⁹Tuku ku sûwiɗi na zamai gai pɗem ɗi? -Niya azumai war waŋ gaiɗi nagai na gaziɗaŋai -

²⁰Arbai nagai n’e mri min kaskar. Tiyana kaɵkar a na gai zizini: Fiɗiti Egipte gaini vok na warɗi paŋ edi.

²¹War hlaiɗi zi mri par, abakaiɗi gaŋgalaŋai gaiɗi nagai n’e zini piɗi aga e miɗini seŋ: gaiɗi marmakaiɗi n’e zi bonu gaiɗi lai. Na gaziɗaŋai, gaiɗi nagai n’e mri min hatam, e niyisi azumai, e fini azumai war waŋ.

²²Vokɗi ɗai n’Asiriya paŋ a na woni, yeɵɗi gai girri sini garra; gai hlaiɗi paŋ e biliɗi gaini kaɵkar, e mri min gaw lai.

²³Yeɵ na wiiɗi Asiriya a na azumai debe pin hlaiɗi ɗai zi mri, ɗai ɗi gai giri ɵimani waŋni garra. Nagai paŋ e fiɗiɗi edi gaini kaɵkar min gaw. Nagai n’avut par e ɗi ka e mili hunai piɗi ɗai, amai par midiɗi yai na wiiɗi ɗai a karɗi.

²⁴Woni vokɗi ɗai na Elam a na, gaini yeɵɗi ɵimaɗi gunna. Nagai paŋ e fiɗiɗi edi gaini kaɵkar min gaw. E niyi azumai war hlaiɗi zi mri gaziɗaŋai, nagai n’e ɗika avut e mili hunai piɗi ɗai amai midiɗi yai na wiiɗi ɗai na karɗi. Tiyana e ɗa libi siyer gaiɗi nagai n’e niyi azumai war waŋ.

²⁵Amlai arbaɗi nagai n’e mri, e zizini hlai zi feŋ buriɗi Elam amlai arbani vok na viya hanɗa, yeɵɗi ɵimaɗi gunna. ɗai na gaziɗaŋai hanɗa paŋ, e fiɗiɗi edi gaini kaɵkar. Paŋ ktai, e ɗika amai par midiɗi yai na wiiɗi ɗai na karɗi par ɗa, war hunai n’abai wuzaɗi. Tiyana e ɗa libi siyer gaiɗi nagai paŋ n’e niyi azumai war waŋ n’a na amlai arbaɗi ɗai zi mri.

²⁶Woni vok na wiini Mesek gaiɗi Tubal e ɗa lai yeɵɗi askaraiɗi edi par siɗi gunna, nagai na gaziɗaŋai hanɗa paŋ e fiɗiɗi edi gaini kaɵkar, buri e mili hunai piɗi ɗai amai par midiɗi yai na wiiɗi na karɗi.

²⁷Nagai n’e mri gaziɗaŋai, e piɗi gaiɗi gaŋgalaŋai na ɗipar ɗa kai. Gaŋgalaŋai hanɗa e niyi azumai war hlaiɗi zi mri gaini wazagaiɗi zi hatam e mili kaɵkar na wiiɗi azumai pin midiɗi. Meefeŋ na wiiɗi a na midini sini keɵkeɗi duɓak duɓak, buri e mili hunai piɗi ɗai amai par midini afti na wiiɗi ɗai na karɗi.

²⁸Tiki ɗai n’Egipte, ki ɗi wata pra, e kirpiki ya, arbaɗi ɗai na gaziɗaŋai, aga ku fana azumai gaiɗi nagai n’e mri min kaɵkar ɗa lai.

²⁹Woni Edom te na lai: paakaiɗi gaiɗi nagai n’e ŋi paŋ, koo gai sdaɗi n’abakai n’e ziŋ paŋ tekeɗeɗi, e miliɗi gaiɗi nagai n’e mri min kaɵkar; nagai lai e miliɗi arbaɗi ɗai na gaziɗaŋai gaiɗi nagai n’e niyi azumai war waŋ.

³⁰N'abakai n’e ŋi midiɗi ɗai na war gal n’azumai sek e ɗa woni lai, gaiɗi nagai na war Sidon par n’e niyi azumai gaiɗi ɗai zi mri; gaini hunai n’e ɗika e miliŋ piɗi ɗai tekeɗe ɗi, sdaɗi n’e ziŋ ɗa a bunda siɗi siyer. E piɗi gaziɗaŋai ɗa gaiɗi nagai n’e mri min gaw ɗa; e libi siyerɗi maiɗi nagai n’e niyi azumai war waŋ ɗa nɵa lai.

³¹Faraw aga a tiliɗi, aga a sa arai zi pi wi sini burini vok hanɗa. Faraw gaiɗi ɗai na wiini paŋ aga e mri min hatam. A miɗi na wiini Epiɗ-ɗai Alaw.

³²Nkam, mu hina hunai a yimiɗi ɗai na midini afti na wiiɗi ɗai na karɗi ɗa, amma aga e finiŋ arbaɗi gaziɗaŋai n’e mri min kaɵkar: Faraw gaini vok na wiini paŋ- a miɗi n’a halasi sin Epiɗ-ɗai Alaw par."