Read Mousgoum Ezekiyel 33 Bible Online

Ezekiyel 33 - Mousgoum bible

Ezekiyel 33

¹EPIƊ-ƊAI a muɗa sa maini nɵa:

²Tuku ɗif, miɗiɗi wiiɗi ɗai na war pinzibaku! Ku midiɗi ɓa: Na ɓa mu kasi li gaw midini afti, na ɓa ɗai na midini afti ni ɗa e viri ɗif ktai arbaɗi aŋ ɗif zi gɗam;

³Na ɓa ɗif a tala ɗai zi gaw e ɗa hilisi; a biya faana, a za zaida wiiɗi ɗaini.

⁴Na ɓa ɗif a ɵina faana li, amma a zizina sini kai, won hlai na gaw te cosi te baŋ li ɗa, felni a pɵa midini.

⁵A ɵina tuwini faana ɓa, amma a dara a zizina sini kai. Felni aŋ midini. Amma ni n’a tika hangalni li min faana aga a kurɗa sini.

⁶Amma na ɓa a tiliɗi ɗai zi gaw e ɗa hilisi, a biya faanani kai, ɗai n’aha labar tiɗi kai; won hlai na gaw a halasi li, a ɓa ktai arbaɗi par li, ɗif hanɗa e yimiŋ na buri meefeŋ na wiini ɗif zi gɗam ɗa. Felni aga mu zilbaŋ war tini.

⁷Nɵa ɗa, mu vara aŋ ɗif zi gɗam na wiiɗi ɗai na Izrayel ɗa ku tuku; aga ku ziɓira seŋ n’a niyaɗi edi war ma par, ku ziɗi zaida hanɗa.

⁸Won hlai na mu muɗa li sin ɗif na tuwur ɓa: 'Ɗif na tuwur, aga ku mra fakat', amma na ɓa tuku ku miɗini, kapai a hina payaini na meefeŋ edi kai ɗa, ɗif na tuwur hanɗa aga a mra burini tuwurni; amma felni aga mu zilbaŋ war tuku tuku.

⁹Amma na ɓa ku zini zaida wiini ɗif na meefeŋ ta, kapai a hina payaini na meefeŋ ɗa edi, amma a dara a hinaŋ kai, aga a mra pin tuwurni, tuku aga ku kurɗa suku.

¹⁰Tuku ɗif, miɗiɗi wiiɗi pinzibaɗi Izrayel: ki ɗa miɗi maini nɵa:

¹¹'Slinini gat-kai na wiyi gaini tuwur na wiyi a na midiyi guma. Tiyi mu hufi na buri hanɗa, Kapai mi siɗi aŋ simni karyi ɗa mi zi maɵa maɵa ɗa? Ku miɗiɗi ɓa Gaiya ta Alaw jaŋ, a miɗi na sini Epiɗ-ɗai Alaw par - Ta mu na firya pin mri na wiini ɗif na meefeŋ ɗi? Mu firya tiɓ ɓa ɗif na meefeŋ a hina payaini na meefeŋ edi, a sumna karni lai! Bindisi, bindisi edi sin payaiki na meefeŋ par: aga ki mri tiɓ buri maɗa, aliɗi Izrayel?

¹²"Tuku ɗif, ku miɗiɗi wiiɗi ɗai na war pinzibaku ɓa: Jre-ɗikat na wiini ɗif na jre aga a kurɗaŋ war mefeŋ n’a ha amai midini gadai ɗa kai, meefeŋ na wiini ɗif na meefeŋ aga a baŋ edi kai, na ɓa bundasi arni li edi sin meefeŋ na wiini par ɗa. Ɗif na jre aga a sumna karni pin jreni, war mefeŋ n’a za li meefeŋ kaalai.

¹³Won hlai na mu miɗini li wiini ɗif na jre ɓa fakat aga a sumna karni, amma na ɓa ni a tika hiinini li midiɗi jreni, a waya a niya war meefeŋ dak ɗa, sdani na pɗamai ɗa midini ɗif aga a kɵa gaini kai. aga a mra war meefeŋ n’a zaŋ asakal ɗa.

¹⁴Na ɓa mu miɗini li wiini ɗif na meefeŋ ɓa: 'aga ku mra fakat', amma na ɓa ni a bundasi li edi sin tuwurni par, a za wala na woɗi futini, war jre lai,

¹⁵na ɓa a waya wala n’a yimaŋ aŋ raŋ, a waya walani ɗif n’a hilaŋ, na ɓa a paya pin seŋ zi gadai n’a sa suŋfa, a bula edi sin wazagai a maafanai lai, ɗif hanɗa aga a sumna karni; aga a mra kai;

¹⁶tuwur n’a zaŋ paŋ ɗa, ktai maa aga a pɵa midini kai; a za sda a woɗi futini, a za jre lai; ni aga a sumna karni.

¹⁷Amma ɗai na war pinzibaku e ɗa miɗi ɓa: 'sda n’EPIƊ-ƊAI a na zaŋ hanɗa a futini kai'; sda na woɗi futini kai ɗa a na nagai e ɗa ziŋ ɗa kai ɗi?

¹⁸Won hlai na ɗif na jre-ɗikat a bundasi li edi sin sda na jre na wiini par, a za meefeŋ, a nava mri buri hanɗa lai;

¹⁹won hlai na ɗif na meefeŋ a bundasi arni li edi sin sdani na meefeŋ n’aŋ warni par, a za wala na woɗi futini, a za jre lai, a sumna karni, buri hanɗa.

²⁰Tiki ki miɗi ɓa: 'sda n’EPIƊ-ƊAI a na zaŋ ɗa a futini kai!' Aga mu zitiki sariya, asiya asiya paŋ pin payaini payaini, aliɗi Izrayel."

²¹War buza n’ag'aŋ doogo pi sulu, asakal kiɗi n’edi war bege par, war tile n’ag'aŋ doogo, war mefeŋ n’ag'aŋ ɵim, ɗif ktai n’a hina karni a cosi sa aha war Yeruzalem par, a muɗaŋa maini nɵa: Fuŋ n’abai na Yeruzalem ɗa e tikiŋ ɗaw.

²²EPIƊ-ƊAI a siŋka spakni edi sa, koskoi par, wuzani hlai na ɗif na Yeruzalem par a cosi sa sek na ɗa. Won hlai na morkoi a cosi mi fini ca ɗa, gorof par, Alaw a malaŋa ma amai, ma a mala, mu bunda mu muɗa seŋ lai. Mu nafu burtum kir kai.

²³Nɵa EPIƊ-ƊAI a muɗaŋa seŋ maini nɵa:

²⁴Tuku ɗif, nagai n’e ɗa war greŋ hanɗa aha midini afti na Izrayel ɗa e ɗa miɗi maini nɵa: Abraham kiini ktai ɗa a tika afti, tumu ɗa mu ɗumu vok n’abai, afti ni ɗa a wiimu, tukuŋmu tiyana.

²⁵Buri nɵa, ku miɗiɗi ɓa: Epiɗ-ɗai Alaw a na muɗa maini nɵa: Tiki ki limi neŋ gaini felni, ki siiwi tin alawai na zamai, ki fiɗi ɗai edi lai. Aa ki tiki afti ɗaw lai kiɗi!

²⁶Ki pɵi ɗa midini wazagai zi hatam na wiiki, ki zi wazagai na haharai, tiki maɵagai ɗa, ki yimiɗi falakaiɗi marki, ki zi meefeŋ gaiɗi Gai hanɗa paŋ ki hiini ɓa aga ki tiki afti ɗa ɗaw!

²⁷Aga ku miɗiɗi ɓa: Epiɗ-ɗai Alaw a na muɗa maini nɵa: Gaiya ta jaŋ, mu dara mu ziki zaida ɓa, nagai n’e hinisi aha war greŋ ɗa, aga e mri min kaɵkar, nagai n’e ɗi edi war basga ɗa aga mu siɗi mini wazagai n’edi nuza a limiɗi edi, nagai n’e ɗa war hlai n’e hili woni sek gai gir gaɗi nagai n’e ɗa war waŋ na sin huwuŋ ɗa, vlak aga a fiɗiɗi edi.

²⁸Aga mu tuura afti edi marwai, mu tuuraŋ edi marwai. Sapakɗi na bindiɗi ɗai e kûli siɗi gara ɗa, aga a vada, huwaŋai na Izrayel ɗa aga a hina edi kadai su su, ɗif aga a vuga midini kai.

²⁹Nɵa aga a yima midiɗi ɓa ta m’EPIƊ-ƊAI, won hlai na mu bunda afti li aŋ hlai na basga kadai su marwai ɗa, burini meefeŋ paŋ n’e ziŋ ɗa paŋ.

³⁰Amma tuku ɗif, ɵina pɗem, ɗai na Izrayel ɗa e ɗa miɗi gaiku, ezini ɵagaɗi, min magalani fuŋɗi lai, e miɗi arbaɗi marɗi, ɗif paŋ a muɗa wiini maini ɓa: Hilisi, hulumu ɵinumu seŋ n’EPIƊ-ƊAI a muɗaŋsi ɗa haw.

³¹Nɵa, e hilisi viya, e simni azumai muku ca ca. E ɵini eŋ na ku muɗaŋ muku par ɗa, ama e zi pini kai. E zi sda gaini seŋ na maakai amai miɗi kadai, war agulɗi e piyi ɗa a wala n’a nifiɗi.

³²Ku taa arɗi maiɗi yamai na pɗemi, na wulaɗi a zina pɗem, ɵiɓi n’e ɵiɓiti gaini ɗe, a juva gara lai nɵa. E ɵini seŋ na ku muɗaŋ ɗa, amma, e zi pini kai.

³³Won hlai na wazagai hanɗa a za li ɗa-aga a za lai- aga e siɗi ɓa ɗif na mi Alaw a nafu arbaɗi.