Read Mousgoum Ezekiyel 34 Bible Online

Ezekiyel 34 - Mousgoum bible

Ezekiyel 34

¹EPIƊ-ƊAI a muɗa sa maini nɵa:

²" Tuku ɗif, muɗa seŋ na wuze ktai siɗi ɗai zi giɗimi na wiiɗi Izrayel, muɗa seŋ na wuze ktai. Ku miɗiɗi wiiɗi ɗai zi giɗimi wiiɗi ɗai zi giɗimi hanɗa ɓa: Epiɗ-ɗai Alaw a na muɗa maini nɵa: Haw gara buriɗi ɗai zi giɗimi na wiiɗi Izrayel n’e hiini midini warɗi dama! Ɗif zi giɗimi ɗa, a na buri a sa simi min adumai kai ɗi?

³Tiki ki ci ɗa a fiyaw na pini, ki wi siki a sapa na za gaini ayirni adumai, ki fiɗi farai na gai liki, amma farani farai ki tiki hangalki sini pɗem kai.

⁴Ki zini pini adumai na horafai kapai a nava gdaŋ kai, ki zûûli n’a na veglek ɗa kai, adumi n’ezini gai hiɗi ɗa, ki jigiŋ kai, na te na paya pɗem kai ɗa, ki wiyitisi war fara kai, na te ɓa edi ɗa, ki piyiti kai, amma ki ŋi midini farai war gdaŋ gaini kirpi.

⁵Adumai a ɵara edi buri ɗif n’a giɗimaŋ aŋ kai, a bunda aŋ simi na wiini wazagai na buza; a ɵara edi ɵar.

⁶Faraŋa a ɵara ɵar amai midini huwuŋ, midini boŋor; adumaiŋa a ɵara edi midini afti paŋ, ɗif n’a payaŋsi aŋ kai, ɗif n’a hala aŋ payaŋsi aŋ kai.

⁷Nɵa, ɗai zi giɗimi, ziɓiri seŋ na wiini EPIƊ-ƊAI pɗem:

⁸Gaiya ta jaŋ, - a miɗi na wiini Epiɗ-ɗai Alaw- buri ɓa adumaiŋa a hina ɵar tiɗi ɗai na mahalakai, buri ɓa a hina aŋ wala zi simi na wiini wazagai na buza paŋ buri ɗif n’a giɗimaŋ aŋ kai, buri ɓa ɗaiŋa zi giɗimi e hili aŋ piyi adumaiŋa kai, amma e hiini midini warɗi dama e si simi wiini adumai ɗa kai,

⁹Nɵa, ɗai zi giɗimi, ziɓiri seŋ n’EPIƊ-ƊAI a na muɗaŋ na ɗa pɗem:

¹⁰Epiɗ-ɗai Alaw a na muɗa maini nɵa: Mu na halɗi midiɗi ɗai zi giɗimi hanɗa, aga mu paya adumaiŋa aŋ yimaŋ edi tiɗi par, aga mu ɗiya sdaɗi zi giɗimi, kapai e siɗi aŋ hiini midini warɗi dama kir kai; aga mu hultasi adumaiŋa edi war miɗi par, aga e niviŋ aŋ simi kir kai.

¹¹Buri Epiɗ-ɗai Alaw a na muɗa maini nɵa: Ta dama mu na halɗi aŋ paya adumai na wiya, kapai mu tika hangala sini.

¹²Maini ɗif zi giɗimi n’a tika hangalni sin adumai n’a naka gai ɵiri ɵar war mefeŋ n’a na arbani, nɵa lai aga mu tika hangala sin fara na wiya; aga mu payaŋsi woɗi par paŋ n’a ɵara edi woni, war mefeŋ na hlai a doogo azumai, war mefeŋ zi gegeŋ.

¹³Aga mu yimaŋsi edi arbaɗi pinzibaɗi ɗai par, aga mu diŋgaŋsi edi midini afti paŋ par, mu waiyaŋsi aha midini aftini; aga mu hinaŋ a suma kuzum amai midini huwuŋ na Izrayel, azumai war hlai na huduk, midini hlai na ɗai e kiɗi e simni warni na midini afti hanɗa paŋ.

¹⁴Aga mu kaŋ aŋ suma kuzum war hlai zi kuzum na pɗem, aga a suma amai midini huwuŋ na wiiɗi Izrayel. Aga a fana arni kuzum na hirnaŋ, a suma kuzum na pɗem lai amai midini huwuŋ na wiiɗi Izrayel.

¹⁵Ta dama aga mu kaŋ aŋ suma kuzum, ta dama aga mu fanaŋ azumai- a miɗi na halasi sin Epiɗ-ɗai Alaw par.

¹⁶Adumi na te ɓa edi, aga mu piyitisi, na te ɓasa edi sin marɗi par, aga mu wiyitisi, n’eziɗi a haɗali, aga mu jag'aŋ, na vigliki aga mu piyiɗi dawa. Amma adumi na gai liki, na te daba marɗi gara ɗa, aga mu fiɗiti edi. Aga mu giɗima fara na wiya war jre.

¹⁷Epiɗ-ɗai Alaw a na muɗa maini nɵa: " Amma tiki fara na wiya ɗa, aga mu ziti sariya arbaɗi adumi gaiɗi adumi, arbani adime gaini yek.

¹⁸Kuzum na pɗem na ki ɗa limiŋ ɗa a kiɗiki kai ɗi? Zamai e kirpi kuzum n’a hina azumai pin eziɗi buri maɗa? Ki ɗa ci yem na gaglai ɗa, a kiɗiki kai ɗi? Zamai e hili e durkisi yem na hina buri maɗa?

¹⁹Nɵa adumai na zamai ɗa a luma ɗa a kuzum na ki kirpiŋ azumai pin eziki lai, a ca ɗa a yem na ki durguziŋ amai ɗa lai kir kai ɗi?

²⁰Pin hanɗa, Epiɗ-ɗai Alaw a na muɗa maini nɵa: Ta dama mu na halɗi aŋ ziti sariya arbaɗi adumi na gai liki gaiɗi adumi na gai hugi.

²¹Buri ɓa tiki ki hiŋ gaini kerpeɵki, gaini paɵaki lai. Buri ɓa ki dibi gaini miyokki adumai na vaglakai, haa ki birgiŋ edi war hlai na suma kuzum warni par,

²²aga mu luwiini ɗuwal wiini adumaiŋa, kapai a hina ɵar tiɗi mahalakai kir kai; aga mu ziti sariya arbaɗi adumi gaiɗi adumi.

²³Aga mu kasi midini fara na wiya, ɗif zi giɗimi n’a na ketekeɗik, ni aga a sini simi mini: hanɗa a ɵeŋ na wiya David. Ni aga a sini simi mini, ni aga a za aŋ ɗif zi giɗimi na wiini.

²⁴Ta EPIƊ-ƊAI aga mu za aŋ Alaw na wiiɗi, ɵeŋ na wiya David aŋ pai arbaɗi lai. Ta EPIƊ-ƊAI mu muɗa ya.

²⁵Aga mu za bonu zi ɵeɗ arba gaini fara na wiya, aga mu vada wazagai na buza na tuwarai na midini afti hanɗa edi, fara aga a sumna gai hangalni edi war basga, a fana ɗa edi arni jur lai.

²⁶Aga mu bunda afti hanɗa gaini hlai n’a ɵimaɗi huwuŋ na wiya paŋ aŋ ɓiki. Aga mu hina faŋ a ɵa war hlaini. Faŋ hanɗa a faŋ zi ɓiki.

²⁷Luwuŋ n’edi war vowai aga a wa ali, afti aga te sa sayemɗi lai. Ɗaiŋa aga e simni ɵeɗ midini aftiɗi; nɵa aga e siɗi ɓa ta m’EPIƊ-ƊAI, won hlai na mu haɗa li zug zi kawai na wulaɗi edi, won hlai na pliɗi li edi edi war tiɗi nagai n’e ɗa ziɗi aŋ bege par lai.

²⁸Pinziba n’edi par aga e hilisi aŋ tiki faraɗi kai, wazagai n’edi buza aga a lumiɗi kir kaalai. Aga e simni ɵeɗ, ɗif aga a miliɗi hunai piɗi kir kai.

²⁹Aga mu ziɗi vowai na yikini aga a wa gara. Aga ku nava ɗif na wiyamai te zaŋ midini afti kir kai; ɗai aga e tikiɗi siyer kir kai.

³⁰Nɵa aga e siɗi ɓa ta m’EPIƊ-ƊAI, m’Alaw na wiiɗi na mu na gaiɗi, aga e siɗi lai ɓa nagai pinziba na Izrayel, e ɗi ɗaiŋa- a miɗi na halasi sin Epiɗ-ɗai Alaw par.

³¹Tiki ɗai ɗa, ki ɗi fara na wiya, fara na war geɗam na wiya. Ta ɗa, m’Alaw na wiiki- a miɗi na halasi sin Epiɗ-ɗai Alaw par."