Read Mousgoum Ezekiyel 35 Bible Online

Ezekiyel 35 - Mousgoum bible

Ezekiyel 35

¹Seŋ na wiini EPIƊ-ƊAI ktai a muɗa sa maini nɵa:

²"Tuku ɗif, bunda arku siɗi huwuŋ na Seyir, muɗa seŋ na wuze ktai siɗi.

³Ku miɗiɗi ɓa: " Epiɗ-ɗai Alaw a na muɗa maini nɵa: Mu na halɗi muduku, huwuŋ na Seyir. Aga mu suŋkuku spak na wiya, aga mu bunduku aŋ greŋ na marwai.

⁴Aga mu bunda fuŋku n’abakai aŋ greŋ; maa, aga ku hina edi kadai su: Nɵa aga ku siɗa ɓa ta m’EPIƊ-ƊAI.

⁵Buri ɓa ku naka kureɗ warku siɗi Izrayel pɗem kai, ku ma felɗi aliɗi Izrayel edi viya gaini kaɵkar war mefeŋɗi zi gir, war mefeŋ na tuwur na wiiɗi a va amai,

⁶pɗem, mu muɗuku n’a jre jaŋ, aga mu hina fel n’a ma edi war hlaiku kai, fel aga a duɓuka puku, buri ku bula edi sin mini fel edi kai, fel ɗa aga a dubuka puku.

⁷Aga mu tuuriti huwuŋ na Seyir ɗa edi, mu binditi aŋ greŋ, nagai n’e vigi woni paŋ aga mu vidiɗi edi.

⁸Aga mu va midini huuwuŋɗi gaiɗi ɗai ɗi zi mri. Arbani hlaiku na boŋor, war hlaiku na huduk, agoɗom war kluraiku lai, na kaɵkar a yimiɗisi aga e mri woni.

⁹Aga mu zuku aŋ basga na hina nɵa marwai, fuŋku n’abakai, ɗif aga a sumna woni kir kai. Nɵa aga a yima muduku? Ɓa ta m’EPIƊ-ƊAI.

¹⁰Buri ku muɗa ɓa: 'Pinziba na sulu hanɗa a dara muɗa afti na sulu hanɗa aga a bunda aŋ wiya, aga mi tikiŋ, ' karku ɓa EPIƊ-ƊAI a na woni lai,

¹¹pɗem, mu muɗuku n’a jre jaŋ, aga mu za suku pin hiy gaini sile na ku siŋkaŋ edi war gawku na siɗi; aga mu siŋka sa arɗi war sda n’aga mu zaŋ suku.

¹²Nɵa aga a yima muduku ɓa ta m’EPIƊ-ƊAI, mu ɵina tirki na ku tirka huwuŋ na Izrayel gaini paŋ. Ku muɗa ɓa: 'A huwuŋ na hina edi kadai su, a sa sumu aŋ walamu.'

¹³Miɗi na ki miɗiŋ sa ɗa gaini hormo kai, ki miɗi buriya a miɗi na ɗewek, mu ɵinaŋ paŋ!

¹⁴Epiɗ-ɗai Alaw a na muɗa maini nɵa: 'buri ɓa afti hanɗa paŋ aŋ war firiyi, aga mu bunduku edi aŋ basga;

¹⁵buri ku firya, buri ɓa afti na wiiɗi pinzibaɗi Izrayel a za aŋ basga ta, aga mu za suku tuku maini nɵa lai. Huwuŋ na Seyir aga te bunda aŋ basga Edom na gai hlaiɗi paŋ lai. Nɵa aga a yima miɗiki ɓa ta m’EPIƊ-ƊAI.