Read Mousgoum Ezekiyel 36 Bible Online

Ezekiyel 36 - Mousgoum bible

Ezekiyel 36

¹"Slina pɗem, tuku ɗif, muɗa seŋ na halɗi sa par sin huwuŋ na wiiɗi Izrayel; ku miɗini ɓa: Huwuŋ na Izrayel, ziɓiri seŋ na wiini EPIƊ-ƊAI.

²Epiɗ-ɗai Alaw a na muɗa maini nɵa: 'Gawki e ziki yewere ɓa ha! ha! huwaŋai na gamai par hanɗa a bunda aŋ walamu. '

³Nɵa ɗa, muɗa seŋ na halɗi sa par; ku miɗiɗi ɓa Epiɗ-ɗai Alaw a na muɗa maini nɵa: 'nkam buri ɓa ɗai e tuuriki edi, azi suuna siki hlai paŋ par, buri ki bindi aŋ wala na wiiɗi pinzibaɗi ɗai zamai, buri na ɓa meŋ gaini eles paŋ a za anya siki edi arbaɗi ɗai lai,

⁴nɵa ɗa, huwuŋ na wiiɗi Izrayel, ɵini seŋ na wiini Epiɗ-ɗai Alaw, Epiɗ-ɗai Alaw a na muɗa wiini huwaŋai, wiini boŋorai, sin rakai, sin hudukai, sin deeɓerai na wiini greŋ na kadai su, sin fuŋ n’abakai n’a hina edi kadai su su, na ɗai n’edi par ɵimaɗi e ɗa hiliŋ, e zini yewere lai maini nɵa:

⁵Epiɗ-ɗai Alaw a na muɗa maini nɵa: ' Jre jaŋ, mu muɗa sin pinziba na zamai gaiɗi Edom paŋ lai na ɗa warni afu na wiini sile na wiya, buri e tiki aftiŋa ɗaw aŋ wiiɗi. Agulɗi a nafu gai vi gaini firiyi, suŋfaɗi agulɗi a va gaini miisi lai, buri hlai na farai a suma warni a zuva sin vram.

⁶Buri nɵa, muɗa seŋ na halɗi sa par ktai sin afti na wiiɗi Izrayel, miɗini wiini huwaŋai, wiini boŋorai, wiini rakai, wiini hudokai lai ɓa: Epiɗ-ɗai Alaw a na muɗa maini nɵa: Mu na! Mu muɗa na war sile gaini hiy n’abai, burini sda zi siyer na pinzibaɗi ɗai e ziŋ siki.

⁷Nɵa ɗa, Epiɗ-ɗai Alaw a na muɗa maini nɵa: Jre jaŋ, mu yimutuku ta t'aŋ kai amai na! Afti n’a na ɵimaku paŋ aga a luba siyer na wiini gai midini.

⁸Tiki huwuŋ na wiiɗi Izrayel, aga ki hini luwaŋaiki a wa graŋni edi, aga a wa ali lai buriɗi ɗaiŋa Izrayel, buri e ŋi ya aŋ wiyisi aha.

⁹Nkam, mu na halɗi siki, mu na bundaɗi ara siki, ɗai aga e hirmiki amai, e bili seyem miɗiki lai.

¹⁰Aga mu sisiɗiɗi ɗai miɗiki viya, pinzibaɗi Izrayel gaini abaiɗi paŋ; fuŋ n’abakai ɗai aga e simni woni, greŋ aga a rga amai lai.

¹¹Aga mu sisiɗi ɗai gaini farai miɗiki viya, aga e sisiɗi viya e bindi viya lai, aga mu bindiki viya maini na ɗi par nɵa, aga mu ɵinikisi der a suwa na war pi zi tiki par pra; nɵa aga ki siɗi ɓa ta m’EPIƊ-ƊAI.

¹²Aga mu hiniɗisi ɗai e hili amai muduku -ɗaiŋa na Izrayel- aga e tukuku aŋ hlaiɗi. Aga ku bunda aŋ bulum na wiiɗi, aga ku biɗi aliɗi kir kai.

¹³Epiɗ-ɗai Alaw a n muɗa maini nɵa: buri ɓa zamai arbaki e ɗa miɗi ɓa: K'afti na zi limi ɗai, ku biɗi aliɗi pinzibaku ta. '

¹⁴Nɵa ɗa, aga ku luma ɗai kir kai, aga mu huwyiɗi ɗaiku kir kai - a miɗi na sin Epiɗ-ɗai Alaw par.

¹⁵Aga mu hiniɗi ɗai e muɗuku miɗi zi siyer ɗa kai, aga ku luba tirki na wiiɗi ɗai kir kaalai. Aga ku huwyiɗi ɗaiku kir kai- a miɗi na sin Epiɗ-ɗai Alaw par."

¹⁶Miɗi na wiini EPIƊ-ƊAI ktai a muɗa sa maini nɵa:

¹⁷"Slina pɗem, tuku ɗif, Pinzibaɗi Izrayel won hlai n’e ɗika midini aftiɗi par e bindiŋ hi-hir war paiyaiɗi gaiɗi sdaɗi. Payaiɗi a naka wuzani ara maini didiɓi na wiiɗi muni na te na diya nɵa.

¹⁸Mu hinasi hiyŋa midiɗi burini fel ɗai n’e miŋ edi midini afti, gaini alawai zi rgi n’e bindi hlai gaini hi-hir.

¹⁹Mu ɵiriɗi edi arbaɗi pinzibaɗi ɗai, e ɵiri edi midini afti, mu za hanɗa siɗi pin payaiɗi, pin sdaɗi lai.

²⁰Ɗaiŋa e hili edi arbaɗi pinzibaɗi ɗai, woni e kisi miisi sin yikiŋa na sɗik; e miɗi midiɗi ɓa: ' kadai tiɓ e ɗi ɗai na wiini EPIƊ-ƊAI, amma e hinisi aftiɗi edi ta! '

²¹Nɵa mu hiina burini yikiŋa na sɗik, na pinzibaɗi Izrayel e hilisi e miisiŋ edi arbaɗi ɗai n’e hili arbaɗi.

²²Nɵa ɗa, muɗa siɗi aliɗi Izrayel ɗa Epiɗ-ɗai Alaw a na muɗa maini nɵa: Mu za na buriki tiki kai aliɗi Izrayel, amma burini yikiŋa na sɗik, na ki ki miisi sini edi arbaɗi pinziba na ki hili woni.

²³Aga mu siŋka edi ɓa yikiŋa a na sɗik, yiki n’abai na nava tirki buriki edi arbaɗi pinzibaɗi ɗai, nɵa nagai aga e siɗi ɓa ta m’EPIƊ-ƊAI won hlai n’aga mu siŋka edi gaiki tiki wuzani arɗi ɓa mu na sɗik- a miɗi na sin Epiɗ-ɗai Alaw par:

²⁴Aga mu piyikisi edi arbaɗi ɗai par, mu tipikisi edi midini afti paŋ par, mu kiki midini afti na wiiki.

²⁵Aga mu yema yem na hilu miɗiki, aga ki zi edi hilu, aga mu miki edi hilu sin hi-hir na wiiki par, sin alawai zi rgi na wiiki par lai.

²⁶Aga mu sitiki agul na hahai, aga mu wa seze na hehe warki, aga mu rɗa agul zi kriyit edi warki par, mu sitiki agul zi neŋ.

²⁷Aga mu wa Sezeŋa ta mal warki, aga mu ziki aŋ ɗai n’e ɵini pin gadaiŋa, n’e yimi, n’e zi pini lai.

²⁸Aga ki simni midini afti na mu siŋɗi wiiɗi tamaiki, aga ki bindi aŋ ɗaiŋa, ta aŋ Alaw na wiiki lai.

²⁹Aga mu pliki edi war sdaki na haharai par, aga mu yikasi algama, mu sisiɗaŋ viya, aga mu kasi wiyamai miɗiki kir kai.

³⁰Aga mu sisiɗa alini luwoŋai viya, wazagagai n’edi war vowai lai, kapai ki libi siyer na wiiɗi wiyamai arbaɗi pinzibaɗi ɗai kir kai.

³¹Midiki aga a kɵa gaini payaiki na meefeŋ, gaini sdaki na meefeŋ lai na ki ɗika woni. Arki aga a baza siki burini tuwurki gaini sdaki na hi-hir.

³²Mu zaŋ nɵa na buriki tiki lai- a miɗi na sini Epiɗ-ɗai Alaw par- ɵini pɗem! Hini siyer a yimiki, a dugiki burini payaiki, aliɗi Izrayel.

³³Epiɗ-ɗai Alaw a na muɗa maini nɵa: 'mefeŋ na mu miki li edi hilu war tuwurki par, fuŋ n’abakai, ɗai aga e simni woni, greŋki aga a rga amai lai.

³⁴Afti na gai ɓilki edi aga e hirmiŋ, aga a hina su aŋ basga arɗi ɗai n’e vigi woni kir kai.

³⁵Ɗai aga e miɗi ɓa: " afti na naka gai tûûri kok a bunda maini zardeŋ Eden nɵa, fuŋ n’abakai na naka aŋ greŋ, gai tûûri, gai hurbi azumai lai a rga amai gai ɵaga sini, ɗai e ɗa warni lai."

³⁶Nɵa pinziba n’aga e hini ɵimaki aga siɗi ɓa ta m’EPIƊ-ƊAI, n’a rga wala n’a haɗa azumai ɗa amai, n’a pa wala n’a tuura edi zamai. Ta EPIƊ-ƊAI, mu muɗa, mu va seŋŋa amai lai.

³⁷Epiɗ-ɗai Alaw a na muɗa maini nɵa: " n’aga mu zaŋ zamai ɗa: ' aga mu hina sa aŋ piyi tiɗi aliɗi Izrayel, kapai mu zina piɗi; aga mu sisiɗiɗi viya aŋ fara na wiiɗi ɗai.

³⁸Maini fara na war hlai na sɗik, maini fara na war Yeruzalem war mefeŋ na wiini fet nɵa, nɵa fuŋ n’abakai na war greŋ aga a va gaini fara na wiiɗi ɗai. Nɵa aga e siɗi ɓa ta m’EPIƊ-ƊAI."