Read Mousgoum Ezekiyel 37 Bible Online

Ezekiyel 37 - Mousgoum bible

Ezekiyel 37

¹Spakni EPIƊ-ƊAI a nafu mada; Sezeni a yimaɗa a kaŋa edi war huduk n’arbani huwaŋai zaw. Huduk hanɗa a va gaini keɵke.

²A gonoŋa arbaɗi war koŋ na puɗu paŋ, keɵke a nafu viya gara azumai war huduk, a keɵke na fana yaw.

³A muɗaŋa: "Tuku ɗif, keɵke hanɗa a kiɗa a bunda aŋ ɗai na karɗi pra ɗi?" Mu muɗa: "Epiɗ-ɗai Alaw ku siɗaŋ ɗa ku tuku!"

⁴A muɗaŋa: "muɗa seŋ na sa par ktai sin keɵke hanɗa; ku miɗiɗi ɓa: 'keɵke na huleŋ, ɵini seŋ na wiini EPIƊ-ƊAI.'

⁵Epiɗ-ɗai Alaw a na muɗa suku maini nɵa: 'aga mu kasi suŋfa warki, kapai ki bindi karki.

⁶Aga mu diya sirdai siki, aga mu rga neŋ miɗiki, aga mu yima amur miɗiki, aga mu wa suŋfa warki, kapai ki simni karki; nɵa aga ki siɗi ɓa ta m’EPIƊ-ƊAI."

⁷Mu tika pa aŋ muɗa seŋ na sin Alaw par maini a muɗa sa nɵa; suura a faka aŋ za won hlai na mu na muɗa seŋ, wala ktai a za keɵke a tika pini a tapa amai sin marni.

⁸Mu tala ɗa sirdai a na sini, neŋ a rga midini, amur a yima midini neŋ lai, amma suŋfa warni kai.

⁹A muɗaŋa pra: "Muɗa seŋ na sa par sin suŋfa, muɗa seŋ na sa par tuku ɗif; ku miɗini wiini suŋfa ɗa: 'Epiɗ-ɗai Alaw a na muɗa maini nɵa: Sumfa, halasi sin koŋɗi yai na puɗu paŋ par, vuvuwa midiɗi zi mri hanɗa kapai e simni karɗi."

¹⁰Won hlai na mu na muɗa seŋ na sin Alaw par maini a muɗa sa nɵa, suŋfa a niya warɗi zi mri, e bindi karɗi lai; e ɗiyi amai midini eziɗi: a vokɗi askarai n’abai n’abai.

¹¹A muɗaŋa: " Tuku ɗif, keske hanɗa a pinzibaɗi aliɗi Izrayel paŋ. E miɗi ɓa: 'Keɵkeyi a hula huwel, bayai na pin ɵeɗ na wiyi a vada vat, mi ɗi na gai rɗi edi bak bak. '

¹²Nɵa ɗa, muɗa seŋ na sa par ktai siɗi, ku miɗiɗi ɓa: Epiɗ-ɗai Alaw a na muɗa maini nɵa: Tiki ɗai na wiya, aga mu mala yeɵki edi, aga mu yimikisi azumai war waŋki par, aga mu kiki aha midini aftiki war Izrayel.

¹³Tiki ɗai na wiya, won hlai n’aga mu mala yeɵki edi, won hlai n’aga mu yimikisi azumai war waŋki par lai, aga ki siɗi ɓa ta m’EPIƊ-ƊAI.

¹⁴Aga mu wa suŋfa na wiya warki kapai ki simni karki; aga mu wiyiki midini aftiki, nɵa aga ki siɗi ɓa ta m’EPIƊ-ƊAI n’a muɗa seŋ li a vaŋ amai lai- a miɗi na sin EPIƊ-ƊAI par."

¹⁵Miɗi na win EPIƊ-ƊAI ktai a muɗa sa maini nɵa:

¹⁶" Tuku, ɗif, tika luwuŋ ktai, ɗo midini ɓa: Yuda gaiɗi aliɗi Izrayel n’e ɗa bonu gaiɗi. Tika zamai ktai pra, ɗo midini ɓa: Yosef- hanɗa a luwuŋ na wiini Efrayim- gaiɗi pinzibaɗi Izrayel n’e ɗa bonu gaiɗi lai.

¹⁷Taɗa luwoŋai na sulu hanɗa mini marni sa kapai a za aŋ luwuŋ na mogo ktai war tuku.

¹⁸Won hlai na ɗaiku e muɗuku li ɓa: ' Ku dara ku ziyi gaglai midini wala na ku na zaŋ hanɗa kai ɗi ɗa',

¹⁹ku miɗiɗi ɓa: Epiɗ-ɗai Alaw a na muɗa maini nɵa: Aga mi tika luwuŋ na wiini Yosef n’a na war tini Efrayim- gaini na wiiɗi aliɗi Izrayel n’e ɗa bonu gaini lai aga mu taɗaŋ mini a dara muɗa min luwuŋ na wiini Yuda; aga mu zaŋ aŋ luwuŋ na mogo ktai, aga e bindi ktai war ta.

²⁰Luwuŋai na sulu na ku ɗo midini, ku yimaŋ tuku yaw, kapai ɗif paŋ a talaŋ.

²¹Ku miɗɗi ɓa: Epiɗ-ɗai Alaw a na muɗa maini nɵa: aga mu yimiɗisi aliɗi Izrayel edi arbaɗi ɗai n’e hili edi arbaɗi par; aga mu tipiɗisi edi war hlai paŋ par, mu diŋgiɗisi aha midini aftiɗi.

²²aga mu bindiɗi aŋ pinziba na ketekeɗik midini afti, midini huwuŋ na wiiɗi Izrayel paŋ; pai n’aga a ŋa midiɗi paŋ ketekeɗik lai, nagai aga e zi aŋ afti sulu kir kai, aga e zi aŋ pai sulu kir kaalai.

²³Aga e zi siɗi haharai gaini alawai zi rgi na wiiɗi kir kai, gaini sdaɗi na haharai kai, gaini hi n’amai midini gadai na wiiɗi kaalai; aga mu pliɗisi edi war hlai n’e ɗa warni paŋ, hlai n’e zi meefeŋ woni. Aga mu ziɗi edi hilu, nagai aga e bindi aŋ ɗai na wiya, ta aŋ Alaw na wiiɗi lai.

²⁴David ɵeŋ na wiya aga a ŋa midiɗi, ɗif zi giɗimi na ketekeɗik buriɗi paŋ; aga e piyi pin gadaiŋa, e yimi wala na mu gidiɗi midini, e zi pini lai.

²⁵Aga e simni midini afti na mu siŋni wiini ɵeŋ na wiya Yakob, afti na tamaiki e simni woni, nagai aga e simni woni, aliɗi e simni woni, aliɗi aliɗi, haa kureɗ; ɵeŋ na wiya David aga a sumna aŋ pai na wiiɗi haa kureɗ lai.

²⁶Aga mu za bonu zi ɵeɗ gaiɗi; bonu hanɗa aga a vada edi arbaɗiyi par kai. Aga mu wiyiɗisi aha, mu bindiɗi viya. Aga mu za hlaiŋa na sɗik arbaɗi haa kureɗ.

²⁷Hlaiŋa zi simni aga a za ɵimaɗi gobi, aga mu bunda aŋ Alaw na wiiɗi, nagai aga e bindi aŋ ɗaiŋa lai.

²⁸Nɵa, ɗai n’edi par paŋ aga e siɗi ɓa ta m’EPIƊ-ƊAI, n’a ziti Izrayel edi aŋ sɗik, won hlai n’aga mu ɗiya hlaiŋa na sɗik arbaɗi haa kureɗ."