Read Mousgoum Ezekiyel 39 Bible Online

Ezekiyel 39 - Mousgoum bible

Ezekiyel 39

¹EPIƊ-ƊAI a muɗaŋa: "Tuku ɗif murɗek, muɗa seŋ na sa par ktai wiini Gog, ku miɗini ɓa: ' Epiɗ-ɗai Alaw a na muɗa maini nɵa: Gog, mu na halɗi muduku, tuku pai n’abai a wiiɗi Mesek gaiɗi Tubal.

²Aga mu yimukusi edi war aftiku par, sin dibini gal n’azumai sek, aga mu ɵa wuzaku, aga mu kuku midini huwuŋ na wiiɗi Izrayel.

³Aga mu ɵiɓiti tuku na muni kpai taŋ a kɵa azumai, aga mu poka ɓaraw na war tuku na wus edi lai.

⁴Aga ku mra amai midini huwuŋ na wiiɗi Izrayel, tuku gaiɗi askaraiku gaiɗi ɗai na gaiku paŋ lai. Aga mu suku aŋ simi wiini bagasakai, wiini wala zi ɗifli paŋ, wiini wazagai n’edi buza lai.

⁵Aga ku mra edi war basga, buri mu muɗa ya - a miɗi na sin Epiɗ-ɗai Alaw par.

⁶Aga mu ɵina afu midiɗi Magog gaiɗi nagai n’e ɗa midini wudi n’e simni ɵeɗ; nɵa aga e siɗi ɓa ta m’EPIƊ-ƊAI.

⁷Aga mu siŋka yikiŋa na sɗik arbaɗ ɗaiŋa Izrayel. Aga mu hina ɗif a miisa yikiŋa na sɗik kir kai. Nɵa pinzibaɗi ɗai na zamai paŋ aga e siɗi ɓa ta m’EPIƊ-ƊAI, m’Alaw na sɗik aha war Izrayel.

⁸Tala, a na gizi, a gizi ya lai, efeŋ na mu muɗa midini ɗa. A miɗi na sin Epiɗ-ɗai Alaw par.

⁹Ɗai n’aha war fuŋ n’abakai na war Izrayel aga e niyisi edi, aga e pi afu, aga e yimi afu gaini wazagai zi gaw na wiiɗi: gamar n’agogoi, n’abakai, taŋ gaini ɓaraw, kaɵkar gaini kawai, aga e yi nɵa haa buza muguzak.

¹⁰Ɗai aga e piyiysi luwuŋ zi yi edi war basga par kai, aga e fiɗi luwuŋ edi arni jur par kaalai, buri aga e yimi afu gaini wazagai zi gaw hanɗa. Aga e virmiɗi nagai n’e virmiɗi, e hili wozagaiɗi nagai n’e hiliɗi lai - a miɗi na sin Epiɗ-ɗai Alaw par.

¹¹Nɵa war mefeŋ hanɗa, aga mu siŋka hlai n’aga e pi Gog woni, aga mu sini yelni aha war Izrayel, huduk na ɗai e vigi woni, tin yem-ra n’abai war gal na dawai par - huduk hanɗa a ɗûkliti futi wuzaɗi ɗai n’e vigi woni daf. Aga e pi Gog gaini vok na pini paŋ woni, aga e sin yiki ɓa Huduk na wiini Vok n’abai na wiini Gog.

¹²Aliɗi Izrayel aga e zi tile muguzak haw kapai e vidi gaini piɗi, kapai hi-hirni afti a tika edi.

¹³ɗai na Izrayel paŋ aga e piɗi zi mri, aga e firyi gara lai won hlai n’aga mu siŋkiti abai na wiya edi siɗi- a miɗi na sin Epiɗ-ɗai Alaw par.

¹⁴Aga e mili ɗai zamai ca aŋ guni midini afti paŋ aŋ piɗi zi mri, nagai n’e vigi war futi e zini piɗi lai, kapai kopoŋ n’a hina su su e piŋ azumai kapai afti a bunda hilu. aga e zi hanɗa haa tile muguzak.

¹⁵Pin sda n’a sa war tiɗi, nagai aga e hili hlai paŋ, na ɓa e nivi li keɵkeni ɗif, e tipi kiryitai amai midini marni ɵimaniɗuk ɗuk, haa, ɗai zi pi e piŋ azumai war Huduk na wiini Vok n’abai na wiini Gog.

¹⁶Aga e sini yiki wiini fuŋ n’abai ktai ɓa Hamona- Vok n’abai- gai hanɗa afti aga a za edi hilu.

¹⁷EPIƊ-ƊAI a muɗaŋa: " Tuku ɗif murɗek, Epiɗ-ɗai Alaw a na muɗa maini nɵa: Miɗini wiini pinzibani wala zi ɗifli paŋ, wiini wazagai n’edi buza paŋ lai ɓa: Tipi siki, hilisi, diŋgisi war hlai paŋ par burini ɓaka n’aga mu saŋ siki, a ɓaka n’abai amai midini huwuŋ na wiiɗi Izrayel. Aga ki limi neŋ ki ci fel lai;

¹⁸aga ki limi neŋɗi gaŋgalaŋai, ki ci felɗi paakai na midini afti; e ɗi gamalakai, gaini ali alini adumai, mapatakai gaini garakai lai, gai hlaiɗi e ɗi farai na gai liki na Basan par.

¹⁹Aga ki limi emel haa ki kiyi, ki ci fel haa ki ciini: a ɓaka na mu zaŋ buriki.

²⁰Midini tabel na wiya, aga ki vi warki gaini neŋni plasai gaini na wiiɗi ɗai na duɓani paŋ, gaini plasai na wiiɗi ɗai zi hatam paŋ- a miɗi na sin Epiɗ-ɗai Alaw par.

²¹Aga mu siŋkiti abaiŋa arbaɗi pinzibaɗi ɗai, nagai paŋ aga e tiliti sariya n’aga mu ziti, gaini spakŋa n’aga mu ŋaŋ midiɗi.

²²Sin mefeŋ hanɗa par haa avut sek, pinzibaɗi Izrayel aga e siɗi ɓa ta m’EPIƊ-ƊAI, Alaw na wiiɗi."

²³" Pinziba na zamai aga e siɗi ɓa aliɗi Izrayel e hili edi midini afti zamai burini tuwurɗi, buri e ɗi fu ɗikat kaalai; mu ŋoya sa wuzani arɗi, mu hiniɗi war tiɗi gawɗi, e mri edi min hatam na buri hanɗa.

²⁴Mu ziɗi nɵa pin hi-hir na wiiɗi gaini hi n’amai midini gadai, mu ŋoya sa wuzaɗi buri hanɗa.

²⁵Amma Epiɗ-ɗai Alaw a na muɗa maini nɵa: " Tiyana par aga mu tika gir na midini pinzibani Yakob edi, aga mu hiina haw burini pinzibaɗi Izrayel paŋ, aga mu siŋka sile na wiya na burini yikiŋa na sɗik edi lai.

²⁶Midiɗi aga a wula burini sda zi siyer gaini payaiɗi na ɗikat kai na e ziŋ sa, won hlai n’e ɗi ka gai hangalɗi aha midini aftiɗi par, na ɗif ktai maa a huwyiɗi kai.

²⁷Won hlai na mu wiyiɗisi li edi arbaɗi ɗai par, aga mu tipiɗi edi gaigai sin afti na wiiɗi gawɗi par, gaiɗi nagai aga mu siŋka edi siɗi pinziba viya ɗa m’Alaw na sɗik.

²⁸Nɵa pinzibaɗi Izrayel aga e siɗi ɓa ta m’EPIƊ-ƊAI, Alaw na wiiɗi, buri ɓa mu kiɗi edi arbaɗi pinzibaɗi ɗai, amma aga mu wiyiɗisi aha midini aftiɗi mal; aga mu hinasi ktai maa edi woni kai.

²⁹Aga mu ŋoya sa wuzaɗi kir kai, buri aga mu hina Sezeŋa midiɗi pinzibaɗi Izrayel - a miɗi na sin Epiɗ-ɗai Alaw par."