Read Mousgoum Ezekiyel 4 Bible Online

Ezekiyel 4 - Mousgoum bible

Ezekiyel 4

¹Tuku ɗif murɗek tikiti briki ktai, ku tikiti azumai wuzaku ta, ku za deseŋ na wiini fuŋ n’abai ktai n’a sɗa maiɗi Yeruzalem ɵa midiɗi.

²Asakal par ku gûniti amlai gaiɗi gawɗi gun, ku ɓula waŋ zi ŋoyai edi par siɗi tiɓ tiɓ, ku zizina hlai n’e pri aha warɗi zilaagai midini ɗaw ɗa siɗi ta ta, ku zizina kaŋ edi par siɗi tiɓ tiɓ gaini wuli-n’afu n’abakai zi hatam paŋ lai.

³Ku paya kawai ktai na bebɗem ta, ku ɗiyaŋ arbaku gaini fuŋ n’abai ɗa maini ɵaga zi kawai nɵa. Ku mula arku li siɗi ɗa, aga ku gûniti, ku mula arku li siɗi ɗa, a fuŋ n’abai n’aŋ gaini ciki cak, a wala zi siŋki buriɗi ɗai na Izrayel ɗa.

⁴Ku fana midini galku na azumai sek ɗa, ku yima meefeŋ na wiiɗi pinzibaɗi Izrayel na doogo ɗa suku, mefeŋ n’aga ku zaŋ midini galku ni ta ɗa, a mefeŋ na wiini libini guma na wiini meefeŋ na wiiɗi ɗa.

⁵Ta aga mu suku mefeŋ n’a kata midini buza na nagai e ziŋ midini meefeŋɗi ta, a dara a muɗa mefeŋ miya hu gaini doogo doogo ɵeeŋe. Nɵa aga ku liba gumani meefeŋ na wiiɗi ɗa haa sini mefeŋ hanɗa ta.

⁶Won hlai na ku vada mefeŋ hanɗa li, ku fana midini galku n’amai sek, aga ku yima meefeŋ na wiiɗi ɗai na Yuda ɗa suku, aga ku za mefeŋ doogo doogo puɗu, mefeŋ paŋ ɗa a buza ktai ktai.

⁷Asakal par ku mula arku siɗi Yeruzalem na gaini ciki ɗa, ku miɗiti tuku na kadai siɗi sek lai, ku muɗa siɗi war wûle na wiiɗi ɗai na mini Alaw.

⁸Aga mu rguku gaini sogom, ku fana li waŋ ɗa, ku kiɗa ku bunda midini galku na ktai ɗa kai, haa mefeŋ na mu ɗiyuŋku, buri cikiɗi Yeruzalem ɗa a va amai.

⁹Ku paya algama gaini orge gaini anai z'awal gaini mefiye, gaini wai, gaini mocoko lai. Ku tapaŋ war tasa ktai ku za peŋ gaini. Hanɗa a wala n’aga ku sumaŋ war mefeŋ na miya hu gaini doogo doogo ɵeeŋe ɗa n’aga ku fana midini galku n’azumai sek ɗa.

¹⁰Simiku na war yuvai ɗa a na gram miya sulu, aga ku suma ɗa maini hanɗa ɵa, haa mefeŋ hanɗa a vada.

¹¹Yem zi ci ɗa ku ca viya kaalai, agwi gara kaalai, war yivai ku ca litir ktai.

¹²Aga ku luma ɗa a gamla na wiini orge, ku daŋ ɗa gaini fulai na wiiɗi ɗai, wuzani arɗi paŋ.

¹³EPIƊ-ƊAI a muɗa aliɗi Izrayel aga e simi na hi-hir edi arbaɗi ɗai n’aga mu birgiɗi edi arbaɗi ɗa maini hanɗa ɵa.

¹⁴Haai! EPIƊ-ƊAI, mu tetema ka wala na hihir duk kai gaini agwiya par haa tiyana, mu luma ka wala n’a mra kiini kai, zaw na wala na buza a ɓasaŋ edi kaalai, neŋ na hihir a niya ka war ma kai.

¹⁵EPIƊ-ƊAI a wayaŋa seŋ a muɗa: Pɗem, ku kiɗa ku bunda fulai na wiiɗi ɗai gaini fulai na wiini ɵaakai kapai ku da simiku midini.

¹⁶A muɗa pra: Ɗif murɗek, aga mu vada wala zi simi n’a na aha warɗi Yeruzalem ɗa edi, wala zi simi gaini yem aga a sa siɗi agwi agwi kadai, buri hanɗa ɗai aga e simni warni hunai.

¹⁷Wala zi simi gaini yem aga a kiɗiha, ɗai ɗa aga e giɵiɗi, gdaŋɗi a vada edi lai burini meefeŋ na wiiɗi.