Read Mousgoum Ezekiyel 41 Bible Online

Ezekiyel 41 - Mousgoum bible

Ezekiyel 41

¹A kaŋa amlai warɗi dilimi n’amai na wiini tempel; a kata potokaiɗi: brukni a za kil ɵaara na nsek lai, kil ɵaara na nzaw lai- brukni gororo.

²Brukni min hlai kil doogo, ɵaga na ɵimani kil ɵim war gal hanɗa nzaw, kil ɵim war gal hanɗa nsek lai. A tika mogoɗi dilimi n’amai ɗa a za kil doogo doogo puɗu; brukɗi kil caaɓa pi ɵim.

³Won hlai n’a niya aha, a kata poto na min hlai a za kil sulu; min hlai a za kil ɵaara ɵaga na ɵimani a za kil muguzak.

⁴a kata mogoɗi dilimi ktai a za kil caaɓa, brukɗi kil caaɓa lai, t'aŋsi wuzaɗi dilimi n’amai na wiini tempel par, a muɗaŋa: "Hanɗa a hlai na sɗik gara."

⁵A kata mogoni ɵaga na wiini tempel, a za kil ɵaara, brukni dalamai n’agogoi na ɵimani gunna a za kil puɗu puɗu.

⁶Dalamai hanɗa a rga amai midini marni haa arni hu, arni hlai paŋ dalam warni doogo doogo hu, a rga amai midini ɵaga n’a na sini tempel gunna, amma midini ɵaga na wiini tempel tar kai.

⁷Warni dalamai ɗa a riya edi sek sek hlai na ɵaga ŋa a wula amai, brukni ɗa a waya amlai, sini tempel kafa. Nɵa dalamai a bunda abakai amai sek sek. Ɗif a kiɗa a niya azumai par war hlai n’avut, a vuga war n’arba ɗaw haa a ga amai war hlai n’ag'aŋ hu.

⁸Mu tala sini tempel hlai gai libi amai haa kil ɵaara, hlai n’a dalamai n’agogoi a rga midini gai libi amai haa kil ɵaara.

⁹Brukni ɵaga n’a wiini dalamai n’agogoi a na kil ɵim; amma baŋa na kadai n’a hina arbani dalamai n’agogoi na wiini tempel

¹⁰gaini dalamai zamai brukni a na kil caaɓa, gai gunni sin tempel gun.

¹¹Min dalamai n’agogoi a na sin hlai na baŋa su sek, min hlai a na sulu: na ktai war gal n’azumai sek, na ktai war gal n’amai sek lai. hlai na baŋa su brukni a na kil ɵim, gai guni sini gun.

¹²Dilimi ktai n’amai te nafu piɗi futi koskoi par, arɗi aha arba sek. Brukɗi kil doogo doogo muguzak; ɵaga na wiiɗi dilimi hanɗa brukni a na kil ɵim, mogoɗi a na kil doogo doogo ɵeŋ?e.

¹³A kata tempel ɗa; mogoni a nava? Kil miya ɗaw; pakatai, dilimi n’amai gaini ɵagaɗi lai mogoni kil miya ɗaw.

¹⁴Brukni galni tempel na piɗi futi na dawai par gaini pakatai lai a za kil miya ɗaw.

¹⁵Ɗif a kata mogoɗi dilimi n’amai na ɗû?aɗipar par sin pakatai sek, gaini futi n’a vuga arbani paŋ paŋ a za kil miya ɗaw. Dilimi n’amai n’aha arba gaini veranda n’aŋsi sin pakatai sek,

¹⁶min hlai, baŋa n’arni hlai na gai griyas, futi n’a sini dalamai na jaga amai midini marni haa hu n’aŋsi min magala par e ziziniŋ gaini luwuŋ sini paŋ azumai par arni afti haa amai arni baŋa n’arni hlai, baŋa n’arni hlai paŋ a za gaini luwuŋ kafa.

¹⁷Warni tempel amlai par gaini duɓani na anene lai, sin ɵaga gai hlaini, amai par min hlai haa edi pin hlai e hini hlai ktai su

¹⁸kapai e ziziniɗi Kerubinkai warni gaini ɵimani hura lai: arbaɗi kerubinkai sulu e zi ɵimani hura ktai, kerubin paŋ wuzani arni sulu sulu:

¹⁹Wuzani arni na ktai a wiini ɗif murɗek, a tala sini ɵimani hura war gal ktai sek, wuzani arni na hanɗa a wiini gurnai a tala sin ɵimani hura war gal na hanɗa sek lai, nɵa nɵa sin tempel gai guni gun, edi sini par lai.

²⁰Azumai par haa amai midini min hlai, sin ɵaga na wiiɗi dilimi n’amai sai ku tala ɗa e ɗi kerubinkai gaini ɵimani hura.

²¹Miɗi dilimi n’amai ɗa luwaŋ n’e pin mini, mogoni gaini brukni kal kal. Wuzani hlai na sɗik, wala ktai a n’a tala maini

²²gûwiŋ! n zi ɓaka na gaini luwuŋ nɵa, mogoni amai zawkil hu, mogoni n’edi zaw kil sulu, dalamai zamai a na edi war koŋni zaw zaw; pin n’a tora midini gaini sini n’amai a na gaini luwuŋ. ɗif a muɗaŋa: "hanɗa a tabel n’a na wuzani EPIƊ-ƊAI."

²³Tempel gaini hlai na sɗik gara mini a nafu sulu. Na ktai aŋ niya amlai war tempel, na ktai aŋ niya amlai war hlai na sɗik gara lai.

²⁴Wala na min hlai a guna. A kiɗa a doogo amai zaw a mala edi na nzaw lai na nzaw lai. Min hlai na sulu paŋ wala n’a doga? Sulu sulu.

²⁵Sin min hlai e zi kerubinkai gaini ɵimani hura maini n’e ziŋ amai sin hlai nɵa. Balak zi luwuŋ na midini gai fiɗi faɗ e anene par min veranda zaw.

²⁶Arni hlai na gaini giryas gaini ɵimani hura war galni veranda hanɗa par lai, hanɗa par lai, sini dalamai n’agogoi na sini tempel gaini balak na midini gai fiɗi faɗ faɗ lai.