Read Mousgoum Ezekiyel 43 Bible Online

Ezekiyel 43 - Mousgoum bible

Ezekiyel 43

¹A kaŋa edi min magala, magala na piɗi futi na dawai sek ɗa.

²Woni mu tiliti abai na pɗem na wiini Alaw te na halasi, piɗi futi na dawai par, gaini suura na maini suurani yem-ra n’abai nɵa, afti paŋ te ŋala piɗi abai na pɗem hanɗa.

³Hanɗa a za war siŋki. Wala n’a siŋka ara a tala maini na siŋka ara won hlai n’EPIƊ-ƊAI a halasi aŋ tuura fuŋ na Yeruzalem edi nɵa; a tala maini wala n’a siŋka ara won hlai na mu naka midini ra Kebar nɵa. Nɵa mu bula azumai, mu pa ara azumai tiɓ.

⁴Abai na wiini EPIƊ-ƊAI te niyasi amlai warni tempel, war mini magala na piɗi futi na dawai par par.

⁵Seze a tikaŋa, a kaŋa aha war pakatai n’aha. Mu tiliti abai na wiini EPIƊ-ƊAI te va tempel ɗa ta.

⁶Mu ɵina wulani ɗif a na muɗaŋa seŋ amlai war tempel par, won hlai na ɗif na hanɗa a nafu ɵima zaw.

⁷Wule a muɗaŋa ŋa: " tuku ɗif, hanɗa a balamɗi paramaiŋa, a hlai na mu mula aza woni; Woni aga mu za hlai zi simni na wiya arbaɗi aliɗi Izrayel haa kureɗ. Pinzibaɗi Izrayel aga e ki tirki sin yikiŋa na sɗik kir kai, nagai kai, paakaiɗi kaalai aga e piyi payaiɗi na hi-hir kai, aga e piɗi paakaiɗi n’e mri won na kir kaalai.

⁸Paakaiɗi e ɵi min magalaɗi, gaini luwuŋ na sini min hlai na wiiɗi, na min dalam na wiini pai gobi ɵimani min magala gaini luwuŋ na sin magala na wiini tempel na wiya, arbani Dalamŋa gaini na wiiɗi hlai zi rgi a na su. Nagai e miisi yikiŋa na sɗik gaini sda na haharai n’e ziŋ; pra lai war hiy na wiya mu vidiɗi edi.

⁹Tiyana aliɗi Izrayel aga e ɗiyi sdaɗi na haharai, aga e ɗiyi piɗi paakaiɗi na won na lai, nɵa aga mu sumna arbaɗi haa kureɗ.

¹⁰Amma tuku ɗif, siŋka tempel hanɗa wiiɗi pinzibaɗi Izrayel, hina siyer a yimiɗi burini meefeŋ na wiiɗi n’e ziŋ paŋ, e tiki haŋgalɗi sini rgi n’aga a rga gaini.

¹¹Na ŋa siyer a yimiɗi li fakat burini sda n’e ziŋ ɗa, ku siŋkiɗi rgi na tempel aga a rga gaini, ɗiyini n’a ɗiya, hlai n’e niyi anene warni par, n’e niyi amlai warni lai, sdani rgini paŋ kap, gadai n’aga e zi gaini war tempel, sdani rgini paŋ kap, de na wiini lai. Ku ɗohoŋ Wuzani arɗi kapai e giɗimi sdani rgini paŋ gaini gadai n’e zi gaini paŋ lai war hohotɗi, kapai e zi gaini lai.

¹²Gadai n’abai na burini tempel a na maini nɵa: Hlai n’aŋ sini amai merfeŋɗi huwuŋ paŋ a na sɗik gara, a wiini Alaw. Hanɗa a gadai n’abai n’a na burini tempel.

¹³Mogoni gaini brukni hlai zi ɓaka na kata gai kil war kiti n’avut par a na maini nɵa: Kil ktai a za kil ktai gai tiy ŋa war mefeŋ na girna. Warni hudukni a za kil ktai, brukni kil ktai lai mini n’amai par e rgi wala edi ɵimani gunna, brukni a za ti ŋa.

¹⁴Azumai par pin afti haa sin pini hlai zi ɓaka n’azumai par ta, a za kil sulu, brukni kil ktai lai. Sin pin n’azumai par n’agwi haa sin pin n’abai ta a za kil puɗu, amma brukni kil ktai lai.

¹⁵Midini n’amai na yikini ɗa "Huwuŋ na wiini Alaw" a za kil puɗu, koŋni na puɗu paŋ e rgi wala maini miyok ɵa warni tiɓ tiɓ.

¹⁶"Huwuŋ na wiini Alaw" mogoɗi a za kil doogo pi sulu, brukɗi kil doogo pi sulu lai. Galɗi puɗu paŋ kal kal.

¹⁷Pin n’abai n’a tika midini ɗa mogoni gaini brukni a za kil doogo pi puɗu. Galni puɗu paŋ kal kal. Mini n’amai par e ɵi wala mini suwa, brukni a za gal kil ɗaw, waŋ na sini edi sini par kil ɗaw ɗaw war gal paŋ. Wala n’e niyi amai midini a na piɗi futi na dawai par sek.

¹⁸Ɗif a muɗaŋa: " Tuku ɗif, Epiɗ-ɗai Alaw a na muɗa maini nɵa: ' Won hlai na hlai zi ɓaka hanɗa a rga li, kapai e kisi ɓaka zi yi midini, e mi fel midini lai, gadaini a na maini nɵa:

¹⁹Wiiɗi paakai zi ɓaka na Levitekai, na war pinzibani Sadok, n’aga hilisi wuza aŋ zi ɵeŋŋa, ku siɗi gari ktai, n’e zi ɓaka buri tuwur gaini, a miɗi na sin Epiɗ-ɗai Alaw par.

²⁰Ku ma felni, ku maŋ amai sin koŋni hlai zi ɓaka na puɗu paŋ, sin koŋɗi pin n’abai n’azumai na puɗu, sini wala na mini suwa lai. Hanɗa a ɓaka buri zi n’edi aŋ hilu gaini girdini tuwur edi midini hlai zi ɓaka.

²¹Ku tika gari n’e zi ɓaka gaini ɗa, ku yaŋ Midini hlai zi ɓaka warni tempel, anene par duɓani hlai na sɗik.

²²Mefeŋ n’ag'aŋ sulu, ku yima yek na tirki sini kai, ku za hlai zi ɓaka edi aŋ hilu gaini maini na ku zaŋ gaini ahi gari nɵa.

²³Won hlai na ku vada li gaini zini n’edi aŋ hilu, ku yima gari na tirki sini kai, gaini adime na tirki sini kaalai na warni fara par.

²⁴Ku kaŋsi wuzani EPIƊ-ƊAI, paakai zi ɓaka e pûki manda sini, e ziŋ aŋ ɓaka zi yi wiini EPIƊ-ƊAI.

²⁵Haa mefeŋ muguzak, yivai paŋ ku za ɓaka burini tuwur gaini yek; gaini gari na tirki sini kai gaini adime lai na ku yimaŋsi warni fara na wiiku par.

²⁶Mefeŋ muguzak aga ki zi hlai zi ɓaka edi aŋ hilu, aga ki ziziniŋ Edi burini EPIƊ-ƊAI, kapai e tiki pin sdaɗi warni.

²⁷Won hlai na mefeŋ hanɗa a vugali, paakai zi ɓaka ɗa sin mefeŋ n’ag'aŋ mitwis par wuzani sek, e zi ɓaka zi yi gaini ɓaka zi ɵeɗ lai; nɵa aga mu waisi miki- a miɗi na wiini Epiɗ-ɗai Alaw."