Read Mousgoum Ezekiyel 44 Bible Online

Ezekiyel 44 - Mousgoum bible

Ezekiyel 44

¹Ɗif a kaŋa min magala na wiini tempel n’anene par, na piɗi futi na dawai par, a nafu gai dûgi dug.

²EPIƊ-ƊAI a muɗaŋa: " Magala hanɗa a hina amai ɵa dug, ɗif a malaŋ edi kai; ɗif a niyasi aha warni par kaalai, buri Epiɗ-ɗai Alaw na wiiɗi Izrayel a niyasi amlai warni par; a hina gai dûgi ɵa dug.

³Amma pai ɗa, buri na ŋa a pai, aga a sumna woni aŋ suma simi wuzani EPIƊ-ƊAI. Aga a niyasi aha war dilimi n’agwi na min magala par, niya anene woni sek lai."

⁴Ɗif a kaŋa amlai war min magala na war gal n’azumai par, haa aha wuzani tempel ɗa. Won hlai na mu na ɵa ara, mu tiliti abai na pɗem na wiini EPIƊ-ƊAI te viti Dilimi na wiini EPIƊ-ƊAI ta. Mu pa kurnaiŋa azumai, mu pa ara azumai tiɓ Lai.

⁵EPIƊ-ƊAI a muɗaŋa: "Tuku ɗif, zuɓura pɗem, tala gaini arku, ɵina gai ɵimaku lai wala n’aga mu muɗuŋku burini gadai n’a na burini Dalamni EPIƊ-ƊAI gaini de na wiini paŋ lai; ku tika hangalku sin niyi na ɗai e niyisi amlai war tempel, gaini niyi n’e niyi edi war hlai na sɗik par lai.

⁶Aga ku miɗiɗi wiiɗi ɗai na hraŋai hanɗa, wiiɗi pinzibaɗi Izrayel ɗa: "Epiɗ-ɗai Alaw a na muɗa maini nɵa: Aliɗi Izrayel sdaki na haharai a suwa suwai:

⁷Ki kiɗisi ɗai na morkokoi, n’e ɵi gurgle war agulɗi kaalai, war siɗi kaalai amlai war hlaiŋa na sɗik kapai e bindi Tempelŋa aŋ wala kadai. Hlai na ki kisi simi na wiya gaini emel na gdaŋ gaini fel lai na ɗa, bonuŋa na gaiki a ɗukla daf burini sdaki na hi-hir.

⁸Ki zi sda na kadai tiɓ a za burini wazagaiŋa na sɗik kai, amma ki tikiɗi ɗai na morkokoi kapai e zi sda hanɗa buriki amlai war hlaiŋa na sɗik.

⁹Epiɗ-ɗai Alaw a na muɗa maini nɵa: " ɗif na morkoi, n’a ɵa gurgle warɗi agulni kai, war sini kaalai, aga a niya amlai war hlaiŋa na sɗik kai; koo ŋa a n’aŋ fuŋ arbaɗi aliɗi Izrayel.

¹⁰Levitekai n’e yimi warɗi edi sa par won hlai na ɗai na Izrayel e ɗi ka aŋ giliŋi edi war basga- e hiniŋa edi, e hili pin alawai zi rgi na wiiɗi- aga e libi gumani tuwur na wiiɗi.

¹¹Amlai war hlaiŋa na sɗik, sdaɗi a hanɗa: e giɗimi magalani tempel, e ɗi bagakai na wiya amlai war tempel, e fiɗi wazagai n’e kiŋsi aŋ zi ɓaka zi yi gaini gaini ɓaka na wiiɗi ɗai lai, e ɗi nagai; aga e zi sda wiiɗi ɗai e ɗi nagai lai.

¹²Buri e ɗi ka aŋ ɵeŋ na wiiɗi wuzani alawai zi rgi, buri e kiɗi aliɗi Izrayel war tuwur lai, buri hanɗa, aga mu ziɗi gir, aga e libi gumani tuwurɗi- a miɗi na sin Epiɗ-ɗai Alaw par.

¹³Aga e hilisi wuza aŋ zi sda na wiini pai zi ɓaka kir kai, aga e ki siɗi sin wazagaiŋa na sɗik kai, sin wazagai na sɗik gara kaalai; aga e libi siyerɗi gaini wazagai na haharai n’e ziŋ paŋ lai.

¹⁴Mu miliɗi aŋ zi sdaɗi n’amlai war tempel, aga e zi sda n’a na burini paŋ gaini sda n’a za amlai warni paŋ lai.

¹⁵Amma paakai zi ɓaka na Levitekai na war pinzibani Sadok, n’e zi sda amlai war hlaiŋa na sɗik, won hlai n’aliɗi Izrayel e ɗi ka warɗi edi sa gaigai, aga e hilisi wuza e ɗi nagai, aŋ zi ɵeŋ na wiya. Aga e kiŋasi emel na gadaŋ Gaini fel lai- a miɗi na sin Epiɗ-ɗai Alaw par.

¹⁶Aga e niyi amlai war hlaiŋa na sɗik e ɗi nagai, aga e hilisi wuzani table na wiya aŋ zi ɵeŋ na wiya, aga e ziŋ wuzaɗi sek lai e ɗi nagai.

¹⁷Nɵa won hlai n’e niyili amlai war min magala na wiini pakatai n’aha sek, e wi sapa zi leŋ Siɗi. Won hlai n’e diri zi ɓaka min magala na wiini pakatai n’aha sek, zaw, amlai war tempel ɗi ŋa, e wi sapa z'ayirni adumai siɗi kai.

¹⁸E rgi kadamul zi leŋ Midiɗi, sapa zi leŋ Wuzaɗi lai. Aga e rgi wala n’a glasi hlai z'afu siɗi kai.

¹⁹Won hlai n’e niyisili anene war pakatai na anene sek, siɗi ɗai ɗa, e wi sapa n’e zi sda gaini edi yaw, e hiniŋsi amlai war dalam n’agogoi n’a na war hlai na sɗik ɗa. E wi sapa zamai siɗi, kapai e ziɗi ɗai edi aŋ sɗik gaini sapa hanɗa kai.

²⁰E wiiɗi ayir na midiɗi edi kai, e hiniŋ A suwa gara kaalai, amma e ziziniŋ gai futini.

²¹Pai zi ɓaka a ca vin kai, won hlai n’a dara a niya aha war pakatai n’aha sek ɗa.

²²E tikiti muni na war greŋ kai, na mofoɗi a ɵitisi kaalai; sai e tikiɗi e ɗi ɓulamai n’e siɗi wus kai, na war pinzibaɗi Izrayel lai. Amma e kiɗi tikiti munini pai zi ɓaka na te hinali war greŋ.

²³Aga e hitriɗi ɗaiŋa aŋ zi ɓraw arbani wala na yika ŋa a wiini Alaw gaini wala na kadai, aŋ zi ɓraw arbani wala na hilu gaini wala na hi-hir lai.

²⁴Won hlai na ŋa seŋ a na arbaɗi ɗai, aga zitiɗi sariya e ɗi nagai, aga e ziti sariya war jre, pin gadai na wiya. Nagai aga e zi pin gadaiŋa na mu ɗiyaŋ, gaini na mu siŋɗi burini fet paŋ lai, aga e yimi Sabbat na wiya aŋ walani Alaw.

²⁵E niyi ahani ɗif zi mri kai, buri ɓ'aga a bindiɗi haharai, amma na ŋa a: epini zaw t'emini, zaw ahini na wus, zaw na muni, tawalni na gawla zaw na ɓulumi ɗa, e kiɗi e bindi siɗi haharai.

²⁶Asakal par a za sini edi hilu. Won hlai n’a za sinili edi aŋ hilu, e sini mefeŋ muguzak.

²⁷Mefeŋ n’a dara a niya amlai war hlai na sɗik ɗa- amlai war pakatai n’aha, aŋ za ɓaka amlai war hlai na sɗik, a za ɓaka buri tuwurni avut- a miɗi na sin Epiɗ-ɗai Alaw par.

²⁸Bulum na wiiɗi a na, bulum haɗa muta; afti aha war Izrayel ɗa aga ki siɗi kai: afti na wiiɗi muta.

²⁹Wazagai n’a ki siŋsi, wala n’e fiɗiŋ burini tuwur gaini ɓaka zi zizini seŋ ɗa, e simiŋ e ɗi nagai: Wala paŋ n’a tusa li aha war Izrayel a wiiɗi.

³⁰Merfeŋni seyem n’avut na wiini wala paŋ, na pɗem a suwa paŋ a wiiɗi, gal n’a tikasi edi buriya war wala paŋ n’a pɗem a suwa lai a wiiɗi paakai zi ɓaka, avdiki na pɗem a suwa paŋ ki siŋɗi wiiɗi paakai zi ɓaka kapai ɓaka a sumna midini dalamki.

³¹Paakai zi ɓaka aga e limi wala na mra kiini, zaw na wala a luma pini ɗa kai, koo ŋa a wala zi ɗifli, zaw wala na gaini ezini puɗu ɗi.