Read Mousgoum Ezekiyel 45 Bible Online

Ezekiyel 45 - Mousgoum bible

Ezekiyel 45

¹" Won hlai n’aga ki ɓûrwi afti arbaki ɗa, ki hini gal hlai ktai su wiini EPIƊ-ƊAI, hlai ni ɗa a wiini Alaw. Mogoni a za kil dubu caaɓa pi ɵim, brukni kil dubu doogo. Hlai ni ɗawwa a hlai na wiini Alaw.

²Amlai arbani hlai ni ɗa, e hini hlai na mogoni gaini brukni kal kal, kil miya ɵim, gaini baŋa zamai dai dai n’a za kil doogo doogo ɵim.

³Midini hlai n’a tika edi ɗa a wiini EPIƊ-ƊAI na mogoni kil dubu caaɓa pi ɵim, brukni dubu doogo lai, hlai na sɗik aga a za woni, hlai na sɗik gara.

⁴Galni afti na tika edi war aftiɗi par burini Alaw hanɗa aga a sa siɗi paakai zi ɓaka n’e ɗa zi sda amlai war hlai na sɗik, n’e ɗa wuzani EPIƊ-ƊAI aŋ zi ɵeŋni. Hanɗa a hlai na nagai aga e rgi dalamɗi woni, aga e rgi hlai na sɗik woni lai.

⁵Hlai na mogoni kil dubu caaɓa pi ɵim, brukni kil dubu doogo lai aga a sa siɗi Levitekai n’e zi sda warni tempel, woni aga e nivi fuŋ n’abakai na e simni warni lai.

⁶Slimani hlai hanɗa, ki ɗûkli hlai na mogoni a za kil dubu caaɓa pi ɵim, brukni kil dubu ɵim lai, ki rgi fuŋ n’abai woni, hanɗa a na burini ɗif na Izrayel paŋ na dara.

⁷Aga e sini hlai wiini pai ɵimani hlai na sɗik na par su lai na par su lai, ɵimani fuŋ n’abai na par su lai na par su lai; na piɗi futi na koskoi par, arni agoɗom min Yem-ra n’abai na Mediteraneya sek, na piɗi futi na dawai par, arni sin hagaɗi Izrayel na piɗi futi na dawai par sek lai; mogoni gaini gal na wiiɗi nagai na zamai kal kal, sin hagaɗi na min Yem-ra n’abai na ɗa par haa sin hagaɗi na piɗi futi na dawai par

⁸na wiini afti; Hanɗa a aftini n’aha war Izrayel. Nɵa paakai ɗa aga e kiriɗi ɗaiŋa kir kai; aga e si afti wiiɗi aliɗi Izrayel, sin pinzibaɗi.

⁹Epiɗ-ɗai Alaw a na muɗa maini nɵa: "Paakai na Izrayel, suwi! hini karai gaini hil edi; zi pin gadai gaini jre lai; ɗiyi gai huwyi na ki huwyiɗi ɗaiŋa gaini -a miɗi na sin Epiɗ-ɗai Alaw par!

¹⁰Hina ɗif paŋ a paya wala na tika kilo na gai futini, n’a ŋa wala gaini futini lai.

¹¹Hina wala zi ŋi seyem na yikini ŋa Efa gaini zi ŋi wala na gaglai na yikini ŋa Bat, warni a za kal kal. War wazagai na sulu paŋ a za gal n’ag'aŋ doogo na wiini wala n’e yikiŋ ɓa Homer. Warni na kal kal a siŋka edi sin wala na yikini ŋa Homer par.

¹²Sulai Sikel ktai a za sulai Gera caaɓa; sikel caaɓa, zamai caaɓa pi ɵim, zamai doogo pi ɵim lai a za sulai Mine ktai.

¹³Gal n’aga yimasi edi buriya a na maini nɵa: War Homer na wiini algama, ki ɓûrwi Efa arni ɵaara, ki tikisi edi ktai, war na wiini orge ŋa, ki ɓûrwi Bat arni ɵaara, ki tikisi edi ktai lai.

¹⁴Gadai na burini emel Bat na wiini emel: War Kor par, ki tikisi gal n’ag'aŋ doogo na wiini Bat edi ɗaw, Bat doogo ɗa a za Homer ktai, buri ŋa Bat doogo ɗa a za Kor ktai.

¹⁵War farani adumai zaw hakai na miya sulu war hlai zi geɗam na wiiɗi Izrayel par. Hanɗa paŋ aga ki zi ɓaka na wiini seyem, gaini ɓaka zi yi, ɓaka zi ɵeŋ, aŋ zi de na wiini hinini tuwur na wiiɗi ɗaiŋa lai - a miɗi na sin Epiɗ-ɗai Alaw par.

¹⁶Ɗai na war Izrayel paŋ aga e tipisi wazagai hanɗa, e siŋni wiini pai.

¹⁷Pai aga a sa ɓaka zi yi, ɓaka na wiini seyem, gaini vin zi mi azumai na wiiɗi ɗai n’e hilisi amai war tempel, na wiini merfeŋ tile, na wiini Sabbat, na wiini fet paŋ n’a za war Izrayel. A za ɓaka na buri ŋa a ni, ɓaka na gaini alini seyem, ɓaka zi yi gaini ɓaka zi ɵeɗ lai, a za de na wiini hinini tuwur na wiiɗi aliɗi Izrayel a ni.

¹⁸Epiɗ-ɗai Alaw a na muɗa maini nɵa: War mefeŋ n’avut na wiini tile n’avut, ku yima gari na tirki sini kai, ku za ɓaka buri hlai na sɗik.

¹⁹Pai zi ɓaka a tika felni wala n’a fuɗali burini tuwur, a girdaŋ sin luwuŋ na sin tapra na wiini tempel, sin koŋni pin hlai zi ɓaka n’abai na puɗu, sin luwuŋ na sin tapra na wiini pakatai n’aha lai.

²⁰Ku zaŋ nɵa pra war mefeŋ n’ag'aŋ muguzak, burini ni n’a za mefeŋ war siɗi kai, zaw pin tikini hangal kai. Aga ki zi de na wiini zi n’edi aŋ hili na wiini tempel maini hanɗa nɵa.

²¹War mefeŋ n’ag'aŋ doogo pi puɗu na wiini tile n’avut, te fet na wiini Paska, te za mefeŋ muguzak; ɗai e limi ɗa a peŋ na gaini eheŋ Arni kai.

²²Mefeŋ ni ɗa, pai a za ɓaka na buri tuwur ɗa gaini gari ktai, a zaŋ burini ni dama, buriɗi ɗai paŋ lai.

²³War mefeŋ na muguzak na wiiɗi fet hanɗa, a za ɓaka zi yi burini EPIƊ-ƊAI: Garakai muguzak, gamalakai muguzak lai na tirki sini kai, mefeŋ mefeŋ paŋ a za hanɗa, haa mefeŋ muguzak, a za ɓaka na burini tuwur gaini yek ktai war yivai yivai lai.

²⁴Midini gari paŋ aga a za ɓaka gaini avdi Efa ktai, na wiini adime ɗi Efa ktai lai; emel ɗa a sa Hin ktai midini Efa paŋ.

²⁵War mefeŋ doogo pi ɵim na wiini tile n’ag'aŋ muguzak, miɗi fet na wiini gororo ɗa, aga a za maini na wiini Paska nɵa pra, haa mefeŋ muguzak: ɓaka na buri tuwur ni ɵa, ɓaka zi yi ni ɵa, ɓaka na wiini alini seyem ni ɵa, emel ni ɵa lai.