Read Mousgoum Ezekiyel 46 Bible Online

Ezekiyel 46 - Mousgoum bible

Ezekiyel 46

¹Epiɗ-ɗai Alaw a na muɗa maini nɵa: Magala na min pakatai n’aha na piɗi futi na dawai par ɗa, war mefeŋ ɵaara na wiini sda, ɗif a malaŋ edi kai; amma mefeŋ na wiini Sabbat ɗa e miliŋ Edi, e miliŋ Edi war fet na wiini merfeŋ tile lai.

²Won hlai na pai a dara a niya amlai, a niyasi miɗi dilimi n’agwi na min magala hanɗa par ɗaw; asakal hanɗa paakai zi ɓaka e zi yi na wiini pai, gaini ɓaka zi ɵeɗ na wiini lai. Pai aga a hurga azumai min magala, asakal par a niyasi anene, amma e dûgi min hlai kai haa koskoi.

³Ɗai na doogo paŋ ɗa e hûrgi azumai wuzani EPIƊ-ƊAI, min magala hanɗa, war mefeŋ na wiini Sabbat gaini merfeŋ tile.

⁴Ɓaka na pai a saŋ sin EPIƊ-ƊAI war mefeŋ na wiini Sabbat a na ali adumai ɵaara na tirki sini kai, adime n’abai ktai na tirki sini kaalai.

⁵Midini adime ɗa a kasi Efa na wiini avdi ktai, amma burini alini adumai ɗa a sa like na pin dirini, emel Hin ktai midini Efa paŋ.

⁶Yivai na wiini merfeŋ tile, a kasi gari na tirki sin kai ktai, alini adumai ɵaara gaini adime n’abai ktai na tirki sini kaalai.

⁷Pai a sa Efa na wiini avdi ktai midini gari, Efa ktai midini adime, amma burini alini adumai ɗa, a sa sin kiɗini, emel ɗa Hin ktai midini Efa paŋ.

⁸Won hlai na pai a dara niya amlai warni tempel, a niyasi warɗi dilimi na min magala na par ɗaw, a niya edi warni ɗaw lai.

⁹Won hlai na ɗai na doogo paŋ e hilisi li wuzani EPIƊ-ƊAI min fet ŋa, nagai n’e niyisi amlai min magala n’azumai par aŋ hûrgi azumai wuzani EPIƊ-ƊAI, e niyi anene war min magala na war gal n’amai sek, nagai n’e niyisi amlai war magala n’amai par e niyi anene war magala n’azumai sek lai, ɗif a niyasi anene war magala n’a niyaɗi warni par kai, sai war magala n’aŋsi wuzaku par cir ɗa.

¹⁰Pai a niya amlai gaiɗi hlai na nagai e ɗa niyi amlai, a niyasi edi gaiɗi bonu lai.

¹¹Won hlai na ɗai e hilisi amai warni tempel aŋ siiwi, zaw miɗi fet, e si avdi Efa ktai midini gari gaini adime, amma midini alini adumai ɗa ɗif a sa pin jaani, emel ɗa Efa paŋ Hin ktai ktai.

¹²Won hlai na pai a dara a za ɓaka zi yi na pin dirini wiini EPIƊ-ƊAI, zaw ɓaka zi ɵeɗ na pin dirini ɗa, e milini min magala na piɗi futi na dawai par edi mal, a za ɓaka zi yi zaw na zi ɵeɗ, maini n’a na zaŋ war Sabbat nɵa; asakal par a niyasi edi, e dûgi min hlai amai duɓani n’a niyasi li edi.

¹³Aga ku za ɓaka zi yi wiini EPIƊ-ƊAI mefeŋ paŋ gaini ahiɗi adumi na buza ktai, na tirki sini kai, ku zaŋ ɵa gorof par paŋ.

¹⁴Gorof par paŋ ku sa gal n’ag'aŋ ɵaara na wiini Efa na wiini avdi, gaini gal n’ag'aŋ hu na wiini Hin na wiini emel lai kapai e hiɗɗi avdi gaini. Hanɗa a ɓaka na burini EPIƊ-ƊAI, a gadai n’a ɗiya zaw, haa dawai a bunda kai.

¹⁵Gorof par paŋ e zi ɓaka gaini ahiɗi adumi, e kisi emel gorof gorof paŋ, aga e ziŋ nɵa haa kureɗ.

¹⁶EPIƊ-ƊAI a na muɗa maini nɵa: Na ŋa pai a sini li wala wiini ahini ktai ta ɗa, wala hanɗa a hina aŋ der na wiini ahi hanɗa ɵa; wala ni ɗa a hina aŋ wiiɗi alini ahi hanɗa ɵa. A hina war pinziba ɵa.

¹⁷Na ŋa pai a sini wala wiini begeni ktai li, wala ni ɗa a pɵa aŋ wiini begeni ɗa haa sin buza na wiini plini n’edi ta, asakal par pai a waya a tikaŋ pra, a hina aŋ wiiɗi gamai ɗa a gal n’a saŋ wiiɗi alini ɗa.

¹⁸Pai ɗa aga a tika afti piɗi ɗai na wiya par kai, a tika walaɗi ktai kai. A sa hlai wiiɗi alini war hlai na wiini par, kapai ɗif arbaɗi ɗaiŋa par a hina amai blaŋ aftini aŋ kai kai.

¹⁹Asakal par ɗif a niyasi gaya war min hlai n’a na ɵimani magala n’azumai par ɗaw, a kaŋa amlai war dalamai na sɗik, n’arni azumai sek, n’a zizina buriɗi paakai zi ɓaka. Aha sek, piɗi futi na koskoi sek, baŋa a nafu su.

²⁰A muɗaŋa: " A hlai na paakai zi ɓaka aga e di neŋ zi ɓaka a buri zizinini meefeŋ zaw burini tuwur woni. Won hlai n’e di ɓaka hanɗa ɗif a niyasi anene war pakatai na anene gaini kai, kapai a ziɗi ɗai edi aŋ sɗik kai."

²¹A kaŋasi anene war pakatai na anene par, a vuga gaya war koŋni pakatai na puɗu paŋ. Koŋ hlai paŋ aŋ gai pakataini ta ta.

²²War koŋ Na puɗu na wiini pakatai hanɗa, pakatai ɗa agogoi gara. Mogoni kil doogo doogo puɗu, brukni kil doogo doogo hu; gai puɗogaini paŋ maini nɵa.

²³Hlai na puɗu paŋ aŋ gaini ɵaga sini su su, fur azumai par pini ta ta kafa, sini paŋ gunna.

²⁴ɗif a muɗaŋa: " Hanɗa a dugo zi di simi; ɗai zi sda na warni tempel aga e di ɓaka na wiiɗi ɗai warni.