Read Mousgoum Ezekiyel 47 Bible Online

Ezekiyel 47 - Mousgoum bible

Ezekiyel 47

¹Ɗif a wayaŋa anene min magalani tempel; mu tala yem a cirɗasi azumai par min hlai na wiini tempel, a ka piɗi futi na dawai par sek, buri ŋa arɗi dilimi a nafu piɗi futi na dawai par lai; yem a niya azumai ɵimaɗi dilimi amai par, amai par midini hlai zi ɓaka.

²A kaŋa anene war min hlai n’azumai sek; asakal par a gonna hlai na anene par gaya haa sin magala na anene n’a na piɗi futi na dawai par, mu tala yem a naka amai par ɵimani su.

³Won hlai hanɗa, a hala piɗi dawai sek agwi, gaini sogom zi kiti hlai tini yaw, a kata hlai na kil dubu ɗaw, a vuga gaya arni yem, yem a yimaŋa sin huhunai n’aza ta.

⁴A kata katawai kil dubu ɗaw, a vugasi arni yem ɗaw, yem amai sin kurnaiya ta, a kata zamai kil dubu ɗaw, yem amai blafŋa ta.

⁵A kata zamai kil dubu ɗaw, yem hanɗa a ra, a vuga ta kai, buri yem a riya amai abai ta, a yem n’a hinɵa gai hinɵi, a ra na vuga kai.

⁶A muɗaŋa: " ɗif, ku tala li ɗi?" A hala edi gaya agwiya, a waiyasi agoɗom wulani ra gaya pra.

⁷Won hlai na waiyasi, mu tala luwoŋai viya ɵimani ra hanɗa, wulani ga sulu paŋ.

⁸A muɗaŋa: " Yem hanɗa a ka na midini afti na piɗi futi na dawai par, a vuga azumai warɗi arba ɗaw, a ɵa edi war Yem ra n’abai su; won hlai n’a niyali agoɗom war yem-ra n’abai, yem hanɗa aga a bunda aŋ yem na pɗem.

⁹Nɵa ɗa wazagai na karni paŋ n’a na muguza aga a sumna karni, woɗi paŋ na yem hanɗa aga vuga.

¹⁰Nɵa ɗai zi tum aga e ɗiyi amai wulani ga; Ein-Gedi par haa a Ein- Eglaiim ta, hlai hanɗa aga a bunda aŋ hlai zi huuli ava. Pinzibani hilif aga a za viya maini na war yem-ra n’abai nɵa lai.

¹¹Amma hlai zi yem zamai n’a na ɵimani Yem ra n’abai aga a bunda pɗem kai, a hina ɵa kapai e nivi manda woni par.

¹²Agoɗom wulani ra, wulani ga na sulu paŋ, pinzibani luwuŋ z'ali paŋ aga a diya; ɵimani a huula kai, ali zi wii a vada kaalai, tile paŋ a wa paŋ buri ŋa yem na war ra hanɗa a niyasi war hlai na sɗik par. Alini ɗa ɗai aga e limiŋ, ɵimani e zi kurgun gaini lai."

¹³Epiɗ-ɗai Alaw a na muɗa maini nɵa: " Arni aftiki n’aga ki ɓûrwiŋ Arbaɗi pinziba na doogo pi sulu, a na maini nɵa. Yosef a nava hlai sulu.

¹⁴Hanɗa a bulum na wiiki, ki ɓûrwiŋ tiki kal kal, buri mu ha wala ma gaiɗi ta mai kai buri mu siŋɗi wiiɗi tamaiki, afti hanɗa a aga a sa siki tiki aŋ bulum.

¹⁵Arni afti a na maini nɵa: War gal n’azumai sek ɗa aŋsi sin Yem ra n’abai Mediteraneya par, siɗi futi na Hetlon- n’a te hala a Sedat zaw ɗa.

¹⁶Hamat ɗaw, Berotai ɗaw, a Sivrayim na -te na arbani afti na wiiɗi Damas gaini na wiiɗi Hamat ɗa ɗaw, a Haser ɗaw, a Tiklon na te na ɵimani afti na wiini Hauran ɗaw.

¹⁷Nɵa, arni aftiɗi a fakasi sin Yem ra n’abai Mediteraneya par haa a Hasar-Einan, aft na Damas gaini na Hamat a na war gal n’azumai sek. Hanɗa a gal n’azumai par.

¹⁸Piɗi futi na dawai sek ɗa, ki ɗisi arbaɗi Hauran gaiɗi Damas, arbaɗi Galaad gaini afti na wiiɗi Izrayel; ra Yurdan arni aftiki lai, haa sin Yem ra n’abai zi mri n’a na piɗi futi na dawai par. Hanɗa a gal na piɗi futi na dawai par ɗa.

¹⁹Gal na Negev sek, amai sek ɗa: a Tamar par haa agoɗom min yem na Meriba na Kades, a Nahala ɗaw haa a Yem ra n’abai Mediteraneya ta. Hanɗa a gal n’amai a Negev sek.

²⁰Piɗi futi na koskoi sek ɗa, sin Yem ra n’abai Mediteraneya par, sin arni hlai n’amai sek par haa wuzaɗi Lebo- Hamat ta. Hanɗa a gal na piɗi futi koskoi sek ɗa.

²¹Aga ki ɓûrwi afti arbaki tiki pinziba na doogo pi sulu na wiiɗi Izrayel.

²²Aga ki ɓûrwiŋ Pin wala zi vili, kapai ɗif paŋ a nava gal n’a wiini zi bulum, wiiki gaiɗi nagai n’e zûkisi arbaki aŋ fuŋ, n’e wi ali arbaki; aga ki yimiɗi maiɗi ɗai n’e wi woni arbaki tiki na Izrayel; aga e nivi afti aŋ bulum pin wala zi vili gaiki aŋ bonu.

²³Hlai na ɗif na morkoi a na woni, aga ki sini bulum na wiini woni- a miɗi na sin Epiɗ-ɗai Alaw par.