Read Mousgoum Ezekiyel 5 Bible Online

Ezekiyel 5 - Mousgoum bible

Ezekiyel 5

¹Tuku ɗif murɗek ku paya kaɵkar na mini a suma gara ta, ku za sda maini lazuwar ɵa. Ku tikaŋ, ku faɗa ayir na muduku gaini muɗugwi na muku gaini. Asakal par, ku paya kilo ta, ku ɓurwa ayir ɗa kiini kiini hu.

²Won hlai na mefeŋ na wiini tikiɗi Yeruzalem a vada li ɗa, ku ya gal ktai aha arbani fuŋ n’abai ɗa gaini afu, asakal par ku tika gal n’ag'aŋ sulu ɗa, ku ɓulaŋ gaini kaɵkarku anene duɓani fuŋ n’abai ɗa par, gal n’ag'aŋ hu ɗa ku pokoŋ amai arbani smer, ta aga mu tika futi pini gaini kaɵkar lai.

³Amma aga ku mula ka pini agwi, ku rgaŋ mini sapaku ɓak.

⁴Pini ayir n’agwi hanɗa par, ku mula zamai agwi ku pokoŋ arni afu aŋ yaŋ edi, afu aga a niyaɗi edi, a yiɗi pinzibaɗi Izrayel ɗa paŋ.

⁵Epiɗ-ɗai Alaw a na muɗa maini nɵa: Yeruzalem ɗa te na maini hanɗa ɵa, mu tikiti ɗa amlai arbani pinziba na zamai, gaini gûni azumai gaini pinziba na zamai gun.

⁶Te faka amai sini gadai zi ɗiyi gaini gadai zi ɗû na wiya, meefeŋ na wiiɗi a suwa na wiiɗi pinziba n’edi par gaini afti n’a gûniti azumai ɗa, buri e yimi gadaiŋa zi ɗiyi ɗa kai, e zi pini gadaiŋa zi ɗû ɗa kaalai.

⁷Buri hanɗa Epiɗ-ɗai Alaw a na muɗa maini nɵa: Tiki ɗa, ki fiki amai sa ɗa a sûwiɗi pinziba n’e gûniki azumai ɗa paŋ; tiki ɗa ki zi pini gadaiŋa zi ɗû gaini gadaiŋa zi ɗiyi kaalai, tiki ɗa, sda na ki ziŋ ɗa a kata pin de na wiiɗi na wiini pinziba n’e gûniki azumai ɗa kai.

⁸Buri hanɗa Epiɗ-ɗai Alaw a na muɗa maini nɵa: Ta dama aga mu faka amai siki tiki ɗai na Yeruzalem, aga mu ziti sariya na wiya aha arbaki, wuzani arɗi pinziba n’edi par ɗa.

⁹Buri sdaki na haharai na ki ziŋ ɗa, aga mu ziki wala na mu zaŋ ka duk kai, n’aga mu zaŋ pra kaalai.

¹⁰Buri nɵa aha arbaki ɗa, tamai aga e limiɗi aliɗi, ali aga e limiɗi tamaiɗi lai. Aga mu zitiki sariya na wiya ɗa, n’e hini piki agwi ɗa, aga mu ɵiriɗi edi arbani smer lai.

¹¹Buri hanɗa, jre zaŋ, Ta Epiɗ-ɗai Alaw mu na miɗiki, buri ki bindi hlaiŋa na sɗik hihir gaini alawaiki zi rgi, gaini sdaki na haharai lai ɗa, ta lai aga mu yima sa edi arbaki par, aga mu hiina haw buriki kai, ta ɗe aga mu hina ɗif ktai piki kai.

¹²Aga mu ɓurwa arɗi ɗaiki ɗa ta ta hu, gal n’avut ɗa vlak aga a fiɗiɗi edi, ɵa kai ɗe wiyamai aga a vidiɗi edi lai aha warni fuŋ n’abai ɗa. Gal n’ag'aŋ sulu ɗa aga e mri mini kaɵkar edi par sini fuŋ n’abai ɗa. Gal n’ag'aŋ hu ɗa, aga mu ɵiriɗi edi arbani smer, mu tika kaɵkar piɗi lai.

¹³Hiy na wiya ɗa aga a hala haa sini dibini ta, aga mu hinasi suwar na wiya na gdaŋ midiɗi haa agula te ɵaɗa wara. Won hlai na mu daba suwar na wiya na siɗi li edi ɗa, aga a yima midiki ɓa, mu muɗa ɗa mu ta n’EPIƊ-ƊAI war hiini zi war murɗek.

¹⁴Aga mu bunduku aŋ greŋ, aŋ wala zi tirki arbaɗi pinziba n’a gunuku azumai ɗa wuzani arɗi ɗai n’e vigi ɗa paŋ.

¹⁵Aga ku bunda aŋ wala na ɗai e riyi pini, aŋ wala zi tiki siyer lai, aŋ wala n’a sa hiini, aŋ wala zi mili hunai buriɗi pinzibaɗi ɗai n’e gunuku azumai ɗa. Won hlai na mu faka li aŋ ziti sariya na wiya gaini hiy, gaini suwar, gaini ɵiɓi na gdaŋ lai ɗa. Mu muɗa na ɗa, muta EPIƊ-ƊAI.

¹⁶Aga mu ɵinaɗi wiyamai midiki aŋ fiɗiki edi, aga a ziki wuruk kal kal maini ɓaraw n’a za wuruk nɵa. Aga mu fiɗiki edi gaini wiyamai, wazagaiki zi simi na ki giɗimi siki gaini aga mu vadaŋ edi lai.

¹⁷Aga mu ɵinasi wiyamai gaini wazagai n’edi buza na sabapai midiki aga a fiɗiɗi aliki edi, vlak gaini fel aga a vuga arbaki, aga mu hinasi gaw midiki lai. Mu muɗa na ɗa, mu ta EPIƊ-ƊAI.