Read Mousgoum Ezekiyel 6 Bible Online

Ezekiyel 6 - Mousgoum bible

Ezekiyel 6

¹EPIƊ-ƊAI a muɗa seŋ a muɗaŋa maini nɵa:

²Tuku ɗif murɗek, bunda arku sini huwuŋ na Izrayel ɗa sek, muɗa sini war wûle na wiiɗi ɗai na mini Alaw.

³Ku miɗiɗi ɓa: Huwoŋai na Izrayel, ɵini seŋ na wiini Epiɗ-ɗai Alaw, Epiɗ-ɗai Alaw a na muɗa sini huwoŋai gaini boŋorai sini lolok gaini hudokai maini zila: Ta dama aga mu hinasi kaɵkar midiki, aga mu tuura hlai zi ɓaka na wiiki ɗa edi.

⁴Gûwiŋ zi ɓaka na wiiki aga mu tuuraŋ edi, wazagaiki zi yi wala zi ɗûgûdi zi lûgûzi warni ɗa aga mu tuuraŋ edi, kopoŋɗi nagai n’e nivi wuruk ɗa, aga mu pokoŋ azumai wuzani alawai zi rgi na wiiki ɗa lai.

⁵Aga mu mula kopoŋ na wiiɗi aliɗi Izrayel ɗa azumai wuzani alawai zi rgi na wiiɗi, aga mu ɵara keɵkeɗi edi sini gûwiŋ zi ɓaka na wiiki ɗawwa lai.

⁶Hlai n’aga ki simni woni paŋ ɗa fuŋki n’abakai ɗa aga a bunda edi aŋ greŋ, hlai zi ɓaka na wiiki ɗa aga a tuura edi, gûwiŋ zi ɓaka na wiiki aga a tuura edi, alawaik zi rgi ɗa aga mu haɗaŋ edi, mu vadaŋ edi, wazagai zi yi wala zi ɗûgûdi zi lûgûzi ɗa aga mu haɗaŋ edi, sdaki na ki ziŋ paŋ ɗa aga mu hazaŋ edi lai.

⁷Ɗai aga e mri arbaki nɵa aga a yima midiki ɓa ta m’EPIƊ-ƊAI.

⁸Amma mu hina ɗai zamai karɗi pini hatam par agwi, won hlai n’aga mu ɵiriki edi arbaɗi ɗai midini afti na zamai zamai ɗa.

⁹Nɵa edi arbaɗi pinzibaɗi ɗai n’e kiɗi woni aŋ bege par ɗa, ɗai n’e hini woni ɗa, midiɗi aga a kɵa gaya, midiɗi aga a kɵa gaini tûûri na mu tûûriɗi edi ɗa, buri ɓa e hiniŋa ta edi, agulɗi a tika edi mada par. Nagai mal sdaɗi na meefeŋ n’e ziŋ gaini sdaɗi na haharai n’e ziŋ lai ɗa, aga a bunda a tala arɗi hihir.

¹⁰Kapai a yima midiɗi ɓa ta m’EPIƊ-ƊAI, mu muɗa ɓa aga mu hinasi gir hanɗa midiɗi ɗa kadai meere kai.

¹¹Alaw Epiɗ-ɗai Alaw a na muɗa maini nɵa: Sliɓa gagraŋku, daba azuku azumai, za ɓa: Aiya, buri sda na maafanai na wiiɗi aliɗi Izrayel ɗa, zamai aga e mri mini gaw, na zamai miɗi wiyamai, na zamai min vlak lai.

¹²Ni n’aŋsi gai gai ɗa, aga a mra mini vlak, ni n’a na gobi aga a mra min gaw, n’aga a hinasi karni min wazagai hanɗa par ɗa, wiyamai aga te fuɗaŋ lai. Hiyŋa na siɗi ɗa aga mu hinaŋ a futi ta kai.

¹³Nɵa, aga a yima midiki ɓa ta m’EPIƊ-ƊAI, won hlai n’aga ki nivi kopoŋɗi zi mri arbaɗi alawai zi rgi, zamai ɵimani gûwiŋ zi ɓaka na wiiɗi, na zamai amai midini hlai na baŋa, zaw amai merfeŋni luwoŋai, na zamai azumai pin luwuŋ n’a goɗa, zaw azumai pini luwoŋai n’abakai na ɵimani hicik ɗa, hlai paŋ na nagai e ɗika e zi ɓaka na luguza pɗem wiini alawai zi rgi na wiiɗi woni ɗa.

¹⁴Aga mu siŋka spakŋa siɗi, aga mu tuura aftiɗi edi, aga a bunda ɗa basga na kaɗataŋ na Dibla maa pɗem a suwa, war hlai n’e ɗa woni ta ta ɗa paŋ, kapai a yima midiki ɓa ta m’EPIƊ-ƊAI.