Read Mousgoum Ezekiyel 7 Bible Online

Ezekiyel 7 - Mousgoum bible

Ezekiyel 7

¹EPIƊ-ƊAI a muɗaŋa seŋ, a muɗaŋa maini nɵa:

²amma tuku ɗif murɗek, wala n’Epiɗ-ɗai Alaw a na muɗaŋ sini afti na wiiɗi Izrayel a na maini nɵa: Hanɗa a dibini hlai, dibini hlai ɗa a na halasi midini koŋni afti na puɗu paŋ.

³Tiyana ɗa dibini hlai na wiiku a cosi li, aga mu hinasi hiy na wiya midiki, aga mu zitiki sariya pin payaiki, aga mu hina sdaki a haharai paŋ a pɵa midiki.

⁴Aga mu hiina haw buriki kai zaŋ, aga mu za pɗem sini ktai arbaki kai, buri ɓa payaiki na meefeŋ aga mu pɵaŋ midiki, sdaki na haharai ɗa aga a hina arbaki ɵa, kapai a yima midiki ɓa: Ta m’EPIƊ-ƊAI.

⁵EPIƊ-ƊAI a na muɗa maini nɵa: gir ktai a na halasi, a gir na maini mini kai.

⁶Dibini hlai a na halasi, a na halasi dibini hlai ɗa, a na fakasi amai suku, a na halasi.

⁷Tiki ɗai na midini afti ɗa, hlai na wiiki a cosi ya, a na halasi sarti na wiiki ɗa, mefeŋ ɗa a ŋasi gobi, mefeŋ zi mili hunai ɗa, Ɗuula zi firiyi aga a za amai sini huwuŋ kir kai.

⁸Tiyana ɗa, tiyana tar, aga mu hinasi suwarŋa miɗiki, hiyŋa na siki ɗa aga mu ɗiyaŋ afti ta kai, aga mu zitiki sariya ɗa pini payaiki, sdaki na haharai ɗa aga mu zilbaŋ war tiki.

⁹Aga mu hiina haw buriki kai zaŋ, aga mu za pɗem sini ktai arbaki kai, payaiki na meefeŋ ɗa aga mu zilbaŋ war tiki, sdaki a haharai ɗa aga a hina arbaki ɵa, nɵa kapai a yima miɗiki ɓa a ziki gir na ɗa a EPIƊ-ƊAI

¹⁰Mefeŋ zi sariya ɗa a na, a na halasi, hlaiki ɗa a na halasi, karai ɗa a n’a riya amai, kûlini-si ɗa a na hala wuzani lai.

¹¹Karai ɗa aŋ gaini yimi amai kaai, t'amaraŋai na wiini meefeŋ, ɗif aga a hina piki kir kai, faraiki na viya kaalai, vokki na viya kaalai, abaiki t'aŋ kir kaalai.

¹²Sarti a na gizi, mefeŋ zi sariya ɗa a ŋasi gobi, ni n’a wura wazagai ɗa aga a firiya pini kai, n’a sakala wazagai ɗa aga a kwima pini kaalai, buri ɓa m’aŋ gaini hiy siɗi ɗai gaini hlaiɗi paŋ.

¹³Ɗif zi sakala ɗa a kiɗa a waya pini wazagaini n’a wuraŋ edi kai, koo ɓa ɗifni a na karni hai maa kal, buri ɓa wala zi siŋki n’a muɗa midini ɓilki n’edi na wiiɗi ɗai paŋ ɗa aga a va amai, nagai paŋ ɗa e piyi na war tuwur, buri hanɗa e kiɗi e wiyi warni eziɗi n’avut ɗa kir kai.

¹⁴Ɗai aga e yibi faana, e zizini siɗi lai, amma ɗif ktai n’aga a hala edi mini hatam aŋ kai, buri ɓa m’aŋ gaini hiy siɗi ɗai gaini hlaiɗi paŋ.

¹⁵Edi par ɗa a gaw, aha ɗa a vlak gaini wiyamai, ɗif n’aŋsi edi basga ɗa aga a mra mini gaw, n’a na aha war fuŋ n’abai ɗa, wiyamai gaini vlak aga a baŋ lai.

¹⁶Nagai n’e hini piɗi karɗi ɗa aga e pri edi, e hili amai midini huwaŋai, nagai aga e nûmi warni tuwurɗi ɗa kal kal maini dere na war huduk n’a tuwa ɗa nɵa.

¹⁷Tiɗi a kiɗa a yima wala kai, kurnaiɗi a ɗiya amai kaalai.

¹⁸Aga e wii sapa zi tuwi siɗi, aga e ziriyi tini hunai, arɗi aga a yima amai kai tini siyer aga e fiɗi humokɗi paŋ edi gaini hlaiɗi paŋ.

¹⁹Aga e pûkû arzaŋɗi edi warɗi futi puk puk, or na wiiɗi ɗa aga a tala arɗi maini zilgit nɵa. War mefeŋ zi hiy na wiini EPIƊ-ƊAI ɗa, or na wiiɗi gaini arzaŋ na wiiɗi lai ɗa aga a kûrɗiɗi edi kai. Miɗi a va kaalai, warɗi a va kaalai, buri ɓa arzaŋ na wiiɗi gaini or na wiiɗi ɗa a bunda aŋ azaw buriɗi.

²⁰Hlaiɗi na juf ɗa, a kiɗi warni kûlini-si, e zizini alawai zi rgi n’a tala haharai gara amlai warni, nɵa aga mu bundaŋ buriɗi aŋ wala na hi-hir.

²¹Aga mu hiniɗi ɗai n’edi par ɗa e virmiŋ, aga mu hiniɗi ɗai na maafanai na midini afti ɗa e virmi der na mini gaw ɗa, kapai e bindiŋ aŋ wala na hi-hir.

²²Aga mu bunda ara edi siɗi par, ɗai aga e bindi hlai na sɗik na wiya aŋ na wala hi-hir, gorɓolokai aga e niyi amlai warni e bindiŋ hi-hir lai.

²³Zizina jaɓ, buri afti paŋ a va gaiɗi ɗai zi ɵiɓi belek ta, fuŋ n’abai ɗa ɗe a va gaini karai ta lai.

²⁴Aga mu hiniɗisi pinzibaɗi ɗai na sabapai na hiinini-haw warɗi kai, kapai e mili dalamki ɗa. Kûlini-si na wiiɗi ɗai zi spak ɗa aga mu ɗiyaŋ, hlaiɗi na sɗik n’a na ta ta ɗa, a bunda aŋ hlai na kadai.

²⁵Hunai n’amai te na gizi, ɗai aga e piyi ɵeɗ, amma aga e niviŋ kai.

²⁶Gir ɗa arbani a ɗukla kai, labar na maafanai ɗe arbani a ɗukla kaalai, ɗai aga e zilbiɗi ɗai na mini Alaw buri e miɗiɗi midini wala zi siŋki, pai zi ɓaka ɗa gadai zi ɗû n’a hitraŋ aŋ kir kai, n’abakai n’arbaɗi ɗa, gadai n’e siŋ wiiɗi ɗai aŋ kir kaalai.

²⁷Pai aga a za groho, pai ɗa aga a ba arai zi pi na wiini edi, ɗai na midini afti paŋ hunai n’amai aga te yimiɗi. Aga mu za siɗi pini payaiɗi ɗa, aga mu zitiɗi sariya ɗa maini na sariya te ɗiyaŋ ɵa, nɵa aga a yima midiɗi ɓa: Ta m’EPIƊ-ƊAI.