Read Mousgoum Ezekiyel 8 Bible Online

Ezekiyel 8 - Mousgoum bible

Ezekiyel 8

¹War mefeŋ n’ag'aŋ ɵim na wiini tile n’ag'aŋ ɵaara na wiini buza n’ag'aŋ ɵaara ɗa, mu nafu ahaya dam, n’abakai n’arbaɗi ɗai na Yuda ɗa n’e hili maa n’e ɗifu wuza ca, spakni Epiɗ-ɗai Alaw a halasi mada tizaw.

²Mu tala ara ɗa, mu sɗa wala ktai zaw maini ɗif ɵa, sini wuzani par ta haa azumai sek ɗa, a afu, sini wuzani par ta haa amai sek ɗa, a gaglai n’a luma pre pre maini or n’a hiliya ya nɵa.

³A wasi wala ktai edi maini tini ɗif ɵa, a yima ayir na mada yaw. War wala zi siŋki hanɗa, smer na sini Alaw par a yimaŋa amai arbani hlai, a kaŋa a Yeruzalem, mu sɗa sa ɗa aha mini magala n’aha na war gal n’azumai sek na wiini fuŋ n’abai ɗa, won hlai n’alaw zi rgi n’a kasi tirki sini Alaw, n’a kasi sile warni Alaw lai ɗa aŋ woni.

⁴Abai na wiini Alaw na wiiɗi Izrayel ɗa a nafu woni a tala kal-kal maini na mu talaŋsi kaa warni huduk ɗa nɵa.

⁵Alaw a muɗaŋa: Ɗif murɗek, za barka, mula arku war gal n’azumai sek ɗa. Mu mula ara war gal n’azumai sek ɗa, gûwiŋ zi ɓaka ktai a nafu woni, alaw zi rgi n’a kasi sile warni Alaw a nafu woni tiɓ, gobi gaini mini magala n’a ka amlai mini gûwiŋ zi ɓaka sek ɗa.

⁶A muɗaŋa pra ɓa: Tuku ɗif murɗek, tala wala n’e ɗa e ziŋ ɗa haw le, Tala wazagai na haharai n’abakai n’aliɗi Izrayel e ɗa e ziŋ woni na kapai e birgiŋa edi warni hlai na sɗik na wiya par ɗa haw. Aga ku tala wazagai na haharai n’abakai zamai pra.

⁷A kaŋa mini magala na wiini pakatai, mu tala waŋ ktai sini ɵaga tiɓ.

⁸Alaw a muɗaŋa: Tuku ɗif murɗek, ɓula waŋ sini ɵaga ɗa. Mu ɓula ɵaga ɗa, baŋa ktai a ɵa su.

⁹A muɗaŋa: Niya amlai, tala sda na haharai na ɗai e ɗa ziŋ woni na ɗa.

¹⁰Mu niya amlai mu tala ara, sini hlai n’amai ɗa paŋ e zizini wazagai zamai na maini wala meefeŋ ɵa amai sini hlai ta ta. Alawai zi rgi na wiiɗi aliɗi Izrayel ɗa paŋ a nafu gaini zizini amai sini hlai ta ta lai haa gaini gûni amlai gun.

¹¹Mu tala ɗai n’abakai n’arbaɗi na Izrayel doogo doogo muguzak gaini ɗiyi amai wuzani alawai zi rgi ɗa ca ca, Yazaniya n’ahini Safaŋ ɗa a na arbaɗi lai, ɗif paŋ gaini wala zi yi wazagai zi ɗûgûdi zi lûgûzi tini ɗaw ɗaw, agiyiŋ na wiini wazagai zi ɗûgûdi zi lûgûzi ɗa a ɗuguda amai suulla.

¹²Alaw a muɗaŋa: Ɗif murɗek, tala wala na ɗai n’abakai n’arbaɗi ɗai na Izrayel e ɗa e ziŋ warni ŋoyai ɗa kai ɗi ɗa, ɗif paŋ aŋ gaini balamni wuzani alaw zi rgi na wiini ta ta. E miɗi lai ɓa: EPIƊ-ƊAI a kiɗa a siɗiyi kai, buri a hina afti na wiyi ɗa edi mak.

¹³Alaw a muɗaŋa pra ɓa: Aga ku tala wazagai zamai n’abakai na haharai n’e ɗa e ziŋ ɗa pra.

¹⁴A kaŋa min magala na wiini tempel na wiini EPIƊ-ƊAI, war gal n’azumai sek ɗa. Falakai e ɗifu azumai ca, e ɗa tûwi alaw Tammuz.

¹⁵A muɗaŋa ɓa: ɗif murɗek, ku tala li kaa, aga ku tala wazagai zamai n’abakai na haharai n’a suwa hanɗa pra.

¹⁶A kaŋa warɗi pakatai n’aha na wiini tempel na wiini EPIƊ-ƊAI, anene par mini hlai na sɗik ɗa, arbani diɓir gaini gûwiŋ zi ɓaka ɗa, ɗai na maɵagai woni e zi caɓa pi ɵim, e si duɓaɗi wiini tempel na wiini EPIƊ-ƊAI ta ta, e bindi arɗi piɗi futi na dawai sek, e hûrgi azumai wuzaɗi futi aŋ siiwi.

¹⁷Alaw a muɗaŋa ɓa: Ɗif murɗek, wazagai na haharai na ɗai na Yuda e ɗa e ziŋ woni na ɗa, a tala arku a wala n’agwi ɗiɗ pra, e diviŋa agula, e vi afti paŋ gaini zini karai, Tiyana ɗa e ɗa tûûri tini luwuŋ n’a pa hehe amai merfeŋɗi pra.

¹⁸Ta ɗe aga mu za siɗi war hiy n’abai, aga mu hiina haw buriɗi kai, aga mu za pɗem sini ktai arbaɗi kai. Koo ɓa e tûwisi wuza gaini gdaŋɗi paŋ tekeɗeɗi, aga mu yima tuwiɗi kai.