Read Mousgoum Ezekiyel 9 Bible Online

Ezekiyel 9 - Mousgoum bible

Ezekiyel 9

¹EPIƊ-ƊAI a ɗuula gaini gdaŋni a muɗa: Tiki na sdani ɓilki n’edi na wiini fuŋ n’abai a sa war tiki ɗa, tûûrsi gobi, ɗif paŋ walani n’a tuura hlai gaini ɗa tini ɗaw ɗaw lai.

²Nɵa ɗai e hilisi ɵaara war mini magala n’amai na war gal n’azumai sek ɗa par, ɗif paŋ walani n’a tuura hlai gaini ɗa tini ɗaw ɗaw. ɗif ktai a nafu arbaɗi gaini sapa zi leŋ sini ɗik, santir wuzani ɓak, guɓo na wazagai n’e ɗû gaini aŋ warni ɗa wuzani ɓak lai. E hilisi e ɗiyi ɵimani gûwiŋ zi ɓaka zi kiya ɗa ca.

³Abai na wiini Alaw na wiiɗi Izrayel ɗa te yima warɗi amai midiɗi kerubimkai na te naka midiɗi ɗa par, te hala mini magalani tempel ɗa sek. EPIƊ-ƊAI a yika ɗif na gaini sapa zi leŋ sini na gaini guɓo na wazagai n’e ɗû gaini aŋ warni wuzani ɗa.

⁴EPIƊ-ƊAI a miɗini: Hala ku gunasi arbani fuŋ n’abai na Yeruzalem ɗa blaŋ blaŋ, nagai n’e ɗa nûmi, n’e ɗa tûûwi lai wuzani wazagai na haharai na ɗai e ɗa e ziŋ arbani fuŋ ɗa, ku toro wala midini wuzani arɗi tor tor.

⁵Asakal par mu talaŋ a na miɗiɗi wiiɗi marni na zamai ɗa: Hili pini par arbani fuŋ n’abai ɗa, fiɗiɗi ɗai na warni edi, ki hiini haw buriɗi kai, ki zi pɗem sini ɗif ktai kaalai.

⁶Ki fiɗiɗi ɗai na walakai, na gawlakai, ɓulamakai, aliyagoi gaiɗi falakai lai paŋ edi, ki vidiɗi edi kafa, amma nagai na wala aŋ gaini tûûri wuzani arɗi ɗa ki titimiɗi kai. Ki tiki piki amlai warni hlai na sɗik na wiya par. Nɵa e tiki piɗi gaiɗi n’abakai n’arbaɗi ɗai n’e ɗa mini tempel ca ɗa.

⁷A miɗiɗi: Bindi tempel ɗa hi-hir, vi pakataini ɗa gaini kopoŋɗi zi mri ɗa lai, ɵiri edi warni fuŋ n’abai ɗa. E ɵiri edi, e fiɗiɗi ɗai edi lai.

⁸Won hlai n’e ɗa fiɗiɗi ɗai ɗa mu hina kiya zaw, mu pa kurnaiŋa azumai, mu ɗuula mu muɗa: Ai-yi, Epiɗ-ɗai Alaw, kapai ku vidiɗi aliɗi Izrayel ɗa edi kafa gaini hiyku na ku hinaŋsi midiɗi Yeruzalem ɗa ɗi!

⁹A waya seŋ: meefeŋ na wiiɗi ɗai na Izrayel gaiɗi na Yuda a suwa abai gara, tini ɗif a ɵa mini kai, afti ɗa a va gaiɗi ɗai zi ɵiɓi belek ɗa ta, fuŋ n’abai ɗa, a va gaini meefeŋ ta lai. Buri e hiini warɗi ɓa: EPIƊ-ƊAI a hina afti ɗa edi mak, EPIƊ-ƊAI a kiɗa a tala kai.

¹⁰Nɵa, ta lai, aga mu hiina haw buriɗi kai, mu za pɗem sini ɗif ktai kaalai, payaiɗi n’aga mu zilbaŋ tiɗi.

¹¹Ɗif na gaini sapa zi leŋ sini, na gaini guɓo na wazagai n’e ɗû gaini aŋ warni wuzani ɓak ɗa, a halasi a miɗini wiini Alaw ɓa: Sda na ku muɗaŋa midini ɗa mu vadaŋ ya.