Read Mousgoum Daniyel 1 Bible Online

Daniyel 1 - Mousgoum bible

Daniyel 1

¹War buza n’ag'aŋ hu na Yoyakim aŋ warɗi pai na Yuda, Nebukadnezar pai na Babilon a halasi a cikiti Yeruzalem.

²EPIƊ-ƊAI a sa Yoyakim, pai na Yuda, gaini galni wazagai zamai n’e zi ɓaka gaini amlai war empel na wiini Alaw lai war tini. A kaŋ midini afti na Sinear, a mulaŋ warni tempel na wiini alawai na wiini amlai war dilimi zi godai.

³Asakal par pai a sa futi wiini Aspenas, abaiɗi ɗaini zi sda, buri a piyinisi ɗai arbaɗi aliɗi Izrayel par, na war pinzibaɗi pai gaiɗi aliɗi ɗai n’abakai lai.

⁴E ɗi gawlakai na tirki siɗi kai, n’e tili zafai, na yalakai gar, n’e siɗi wala gara n’e siɗi zini seŋ paŋ, na gadaŋai lai kapai e siɗi aŋ zi sda ahani pai, aga e hitriɗi ɗû gaini miɗi na wiiɗi ɗai na Babilon.

⁵Pai a sa miɗi buri mefeŋ paŋ aga e simi ɗa a wala na ni a sumaŋ ɗa, e ci ɗa a wala na ni a caŋ ɗa lai. E hitriɗi haa buza hu, asakal par kapai e niyi war sda si ɵeŋ na wiini pai.

⁶Arbaɗi ɗai n’e niviɗisi ɗa, ɗai na war pinzibani Yuda e ɗi fu, e ɗi miɗi: Daniyel, Hananiya, Mikayel gaini Azariya.

⁷Abaiɗi ɗai zi sda a ɵiɗi yiki zamai. Wiini Daniyel a ɵini yiki ɓa Beltasar, na wiini Hananiya e ɵini yiki ɓa Sadrak, wiini Mikayel e ɵini yiki ɓa Mesak, wiini Azariya e ɵini yiki ɓa Abed-Nego lai.

⁸Danieyel a rga warni buri a bunda sini hi-hir gaini smi na wiini pai kai, gaini vin zi ci na wiini kaalai. A siiwa abaiɗi ɗai zi sda buri a zini dewele aŋ suma simi na bundaŋ hi-hir ɗa kai.

⁹Alaw a zina pini Daniyel aŋ nava pɗem gaini yim arni abaiɗi ɗai zi sda.

¹⁰Abaiɗi ɗai zi sda a miɗini wiini Daniyel: Mu huna buri pai n’Epin-geza, n’a kata walaki zi simi gaini zi ci lai. Na ɓa a tiliki li gai hûgi arbaɗi marki, agaki kiŋasi seŋ n’abai mada. Pai a kiɗa a fuɗaŋa edi buriki.

¹¹Daniyel a miɗini wiini ni n’abaiɗi ɗai zi sda a tikaŋ midini gaiɗi marmakaini na hu: Hanania, Mikayel gaini Azariya.

¹²Tiyi miɗi ɗaiku, titimiyi buri mefeŋ doogo haw ɗa, ku siyi aŋ simi ɗa a mama, ku siyi aŋ ci ɗa a yem lai.

¹³Asakal par ɗa, ku kitiyi gaiɗi maryi n’e simi simi na wiini pai, nɵa aga ku za siyi pini wala n’aga ku talaŋ.

¹⁴A yima seŋɗi ɗa a siɗi mefeŋ na doogo lai.

¹⁵Sin vidini mefeŋ na doogo, arɗi a tala juf, gai liki e sûwiɗi marɗi n’e simi simi na wiini pai paŋ.

¹⁶Nɵa ɗif n’e tikiŋ midiɗi a siɗi simi gaini vin na wiini pai kir kai, a hina aŋ siɗi ɗa a mama ɗa.

¹⁷Wiiɗi gawlakai na puɗu hanɗa Alaw a siɗi siɗi, a hitriɗi midini ɗû paŋ midini yel paŋ lai; amma Daniyel ɗa a siɗa ezini wala zi siŋki gaini weseŋ zi pɵi n’a za paŋ.

¹⁸War vidini mefeŋ na pai a ɗiyaŋ buri e kiɗinisi warni, abaiɗi ɗai zi sda a kiɗisi wuzani Nebukadnezar.

¹⁹Pai a haɗa kalaŋ gaiɗi kafa, amma arbaɗi paŋ a nava ɗif na maini Daniyel, Hananiya, Mikayel gaini Azariya Ly nɵa kai. Nɵa e niyi war sda zi ɵeŋ na wiini pai

²⁰War seŋ zi yel gaini hiini zi hulum paŋ na pai a payaŋ siɗi par ɗa, a niviɗi ɗa e sûwiɗi ɗai zi hiyla gaiɗi ɗai zi siɗi wuti n’e ɗa midini aftini paŋ azi doogo.

²¹Daniyel a hina war sda na wiini pai Nebukadnezar ɵa haa sin buza n’avut na Sirus a sumna aŋ pai war Babilon.