Read Mousgoum Daniyel 11 Bible Online

Daniyel 11 - Mousgoum bible

Daniyel 11

¹Amma ta war buza n’avut na Dariyus na Mede aŋ warɗi pai, mu nafu gaini war sda aŋ zina pini aŋ sini gdaŋ lai.

²Tiyana ɗa, mu dara mu muɗuku wala n’aga a za gazi gazi. Tala paakai hu aga eŋi midiɗi Persus pra. N'a g'aŋ puɗu aga a suma pra, aga a tapa farai a suwa na wiiɗi na zamai. Won hlai n’a zali aŋ ɗif zi farai n’abai, aga a faka amai siɗi pai na Gres.

³Amma pai n’a siɗa hatam gara aga a faka amai, aga aŋa midini afti n’abai gaini spak n’abai, a za maini n’a dara nɵa.

⁴Won hlai na paini te zizina azumai gaini futiɗili, aga te ɓurwa, aga te sa edi kiiɗi kiiɗi war koŋɗi yai na puɗu paŋ. Aga te sa sini pinzibani kai, spakɗi aga a za maini na wiini ni nɵa kaalai. Buri paini aga te hurɗa amai, aga te sa siɗi na zamai, sini zibaɗi kir kai.

⁵Pai na war gal n’amai sek aga a bunda gdaŋ. Amma ktai arbaɗi n’abakai na wiini zi haam, spakni aga a suwaŋ. Aga aŋa a suwa ni lai.

⁶Buza agwi asakal par, aga e zi bonu arbaɗi, gaini pai na war gal n’amai par aga te tika pai na war galn’azumai sek, kapai e simni war ɵeɗ. Amma aga te nava zinai ktai kai, spakɗi aga a vada edi. Pinzibaɗi aga a hina kai. Aga e fiɗiti edi, na gaiɗi nagai n’e kiɗi piɗi, ahiɗi gaini mofaɗi war mefeŋ hanɗa lai.

⁷Ktai arbaɗi pinziba na wiini pai n war gal n’amai par a tika balamni epini. A hala, a niya aha pini vokɗi askarai na wiinipai na war gal n’azumai sek, a hitimiɗi a rɗa amai midiɗi lai.

⁸A liba alawai zi rgi gaini wazagai zi rgi n’e ziŋ gaini kiiya zi hiliyi, gaini wazagaiɗi na pɗamai n’a zizina gaini or gaini arzaŋ, a kaŋ maini der na e niviŋ pini hatam par nɵa, war Egipte. A waya pini pai na war gal n’azumai sek kir kai haa buza yaw.

⁹Amma pai n’azumai par a hala midini afti na wiini pai na war gal n’amai sek, Asakal par a waya aha midini aftini.

¹⁰Alini aga e hili wuzaɗi gaini hatam, aga e tipi vok viya piɗi. Ktai arbaɗi aga a hala wuzani gaiɗi askarai pini, a vuga hagani aftiɗi, a suma wuzani sek sek maini yem nɵa. Asakal par, won hlai n’a na waya aha midini aftini sek, aga a caka fuŋ n’abai na wiiɗi gawni na gaini ɵaga sini.

¹¹Pai na war gal n’amai par, aga a niya war hiy n’abai, aga a tapa ɗai pini a viya edi aŋ hitima pai na war gal n’azumai par. Vok n’azumai par aga a sa war tini.

¹²Won hlai n’a rɗa amai midini vok hanɗa li, kûlini-si aga a niya warni, aga a fuɗa ɗai dubu dubu, gai hanɗa paŋ spakni aga a sumna haa kai.

¹³Pai n’azumai aga a waya aha, a diŋga vok viya, a suwa n’avut. Buza asakal par agwi, a hala gaiɗi askaraini na viya, gaini wazagai zi gaw viya.

¹⁴War mefeŋ hanɗa, vok n’abai aga a faka amai sini pai na war gal n’amai sek, ɗai na karasai n’arbaɗi ɗaiku aga e fiki amai sini aŋ vi amai wala n’a siŋkasi arni. Amma aga e rɗi amai kai.

¹⁵Pai na war gal n’zumai par aga a hlasia cikiti ɵagai ɗa, a yimiti lai. E libisi afti amai eziɗi ɵagai kapai e pri aha sek midini par, e tikiti lai. Askarai na war gal n’amai par aga e ɗiyi mini kai, koo ɗai na tiɗi a pa edi kai paŋ, gdaŋɗi a ɗiya miɗi kai.

¹⁶Pai n’aga a halasi azumai par mini pai n’amai ɗa, aga a za pin jaani, ɗif ktai maa aga a ɗiya wuzani kai. Aga a halasi a sumna midini afti na zuf n’a suwa paŋ gaini ɓilk n’edi war tini ɗaw.

¹⁷Asakal par aga a rga warni buri a halasi war spak na wiiɗi paini, aga a za bonu gaiɗi pai na war gal n’amai sek. A paya yel aŋ dula maini gaini, a sitini muni kapai a ɓilkaŋ edi gaiɗi, amma yel hanɗa aga a suma kai, wala hanɗa aga a za kaalai.

¹⁸A hitima wudi, a mula arbani par viya, haa ɗif n’abai ktai a ɗiya kûlini-si na wiini, a za sini pin sdani na meefeŋ lai.

¹⁹Asakal ar aga a bunda arni sin fuŋ n’abakai zi ɵaga na warni aftini. Amma aga ɵiɓa tukum, a kɵa, arni ɗif a tika midini kir kai.

²⁰Ɗif zamai aga a sumna war balamni, aga a ɵinasi ɗif zi garmas ktai aŋ vurma wazagai n’amlai war dilimi na zufi te suwa paŋ na warɗi pai. Amma mefeŋ agwi kadai, aga a nava mri, war hiy kaalai, war hatam kaalai, arbaɗi ɗai kaalai, war kuɗuhai.

²¹Ɗf n’aga a sumna war balamni, a ɗif na hormoni kai, na hormo na wiiɗi pai a zuva sini kai. Aga a halasi war ɵeɗ, a tikiti pai ahini yel zi rhai.

²²Aga a rɗa amai midini vok zi tiki hlai paŋ, a kirpiɗi lai, aga a fuɗa ɗif n’abai na midiɗi ɗai na war bonu.

²³Pin bonu n’a zaŋ gaiɗi ɗai, aga a duliɗi, aga a caka hlai, aga a rɗa amai midini lai. Koo ɓa vok pini viya tekeɗeɗi.

²⁴Won hlai na hlai paŋ ɵeɗ, aga a halasi midini afti z'alam na war proveŋs. Aga a za wala na tamain e ziŋ ka duk kai, na tamaiɗi tamaini e ziŋ ka duk kaalai. Aga a ɓirwiɗi der na pin hatam gaini der zamai zamai viya, gaini wazagai zi gaw lai wiiɗi ɗaini aga a paya aŋ hitima hlai ziŋoyai. Amma hanɗa buri hlai n’agwi kadai.

²⁵Won hlai n’a tala gadaŋni, a tala sini ɓa a kiɗa ta, a faka, a hala hitima pai na war gal n’amai sek gaini vok n’abai pini. Pai na war gal n’amai par a niyasi edi gaini vok n’abai griŋ gara, spak n’abai griŋ gara lai. Amma a ɗiya mini kai, buri ɓa ɗaini warɗi gaini kai.

²⁶Nagai n’e simi gaini ktai ɗa aga e fiɗiŋ edi. Askaraini ɗa gdaŋ aga a sûwiɗi, ɗai aga e mri viya.

²⁷Paakai na sulu ɗa, agulɗi a va gaini meefeŋ siɗi marɗi, e simni miɗi marɗi aŋ kiti seŋ, amma miɗi wiiɗi marɗi a seŋ zi rhai. Amma na e piyiŋ aga a va amai kai. Buri mefeŋni dibi a cosi kai hai.

²⁸Pai na war gal n’azumai par, aga a waya midini aftini gaini wazagai zi der tini viya. Hiini na meefeŋ n’aŋ warni siɗi ɗai n’Alaw a za bonu gaiɗi aga a vaŋ amai. Asakal pr aga a waya aha midini aftini.

²⁹Won hlai na hlai a zali, aga a waisi aŋ hitima pai na war gal n’amai sek pra, amma aga a vada maini azi n’avut nɵa kai.

³⁰Ɗai na piɗi futi na koskoi par aga e hilisi, e hitimiŋ gaini hulamai n’abakai, hili na wuzani sek aga a baza mini, a waya aha duɓani. Aga a waya pini hiy na gaiɗi ɗai n’Alaw, a za bonu gaiɗi pra. Aga a tapa seŋni gaiɗi n’e hini bonu na wiini Alaw edi.

³¹Aga a ɵinasi askarai, e pi sini ɵaga na sini tempel gobi, aga e niyi amlai war hlai na sɗik, e bindiŋ hi-hir, aga e ciki ɓaka na e ziŋ yivai yivai paŋ wiini Alaw, aga e kisi hi-hir zi ɓilki n’edi amlai war tempel.

³²Nagai n’e tûûri bonu, pai aga a tirɗiɗisi edi gaini seŋ zi rhai. Amma ɗai n’e siɗi Alaw na wiiɗi ya, aga e ɗiyi gdaŋ, aga e hini siɗi war rhai kai.

³³Na yalakai gara arbaɗi aga e hitriɗi ɗai viya. Amma ɗai zamai aga e mri mini kaɵkar, zaai mini afu, zamai mini bege, zamai e virmiɗi gaini virmi haa mefeŋ yaw.

³⁴Won hlai n’aga e kɵi war gir hanɗa, ɗai aga e zini piɗi viya kai. Amma ɗai viya aga e tipisi gaiɗi war rhai.

³⁵Zamai arbaɗi ɗai zi siɗi ezini seŋ hanɗa viya aga e mri. Pin mriɗi, ɗai viya aga e ziedi aŋ hilu, e mi edi muɗukwi tal lai, haa sin mefeŋ zi dibi. Buri mefeŋ ni a gizi kai hai.

³⁶Pai aga a za pini jaani, aga a zila sini amai, aga kola sini midiɗi alawai paŋ, mini aga a muɗa miɗi n’a bunda ɗif hiyak sin Alaw na wiiɗi alawai, wala n’a zaŋ paŋ a va amai, haa sin mefeŋ na hiy na wiini Alaw a siŋkasi edi. Buri wala n’aŋ gaini ɗiyi zaw aga a va amai.

³⁷Aga a sini hormo wiini alawai na wiiɗi tamaini kai, wiini alaw na falakai e diriŋ gara ɗa kai, wiini alaw zamai kaalai. Buri aga a tala sini a sûwiɗi paŋ.

³⁸War balamni aga a hurga azumai wuzani alaw na wiini fuŋ n’abai zi ɵaga, na tamaini e hûrgi azumai wuzani duk kai. Aga a hurga azumai wuzani gaini or, gaini arzaŋ gaini ali-fuŋ na wûrini abai, gaini wazagai zamai na zuva gara.

³⁹Aga a faka amai sini fuŋ n’abai zi ɵaga, war yikini alaw hanɗa. Nagai n’aga e yimi pini alaw na hehe hanɗa, aga a viɗi gaini wazagai na pɗamai. Aga a siɗi spak aŋŋi midini vok n’abai, aga a siɗi afti viya aŋ vrakɗi.

⁴⁰Sin dibini hlai, pai na war gal n’amai par aga a faka amai, aga a hitimaŋ amma pai na war gal n’azumai aga a diɵaŋ gaini saretaini zi gaw gaini plasai, gaini hulamai n’abakai lai. Aga e niyi war afti viya, aga a vuga wuzani sek sek maini yem na suma nɵa.

⁴¹Aga a cosi midini afti n’a zuva gara, ɗai viya aga e nivi mri, amma Edom, Mowab gaiɗi ɗai n’abakai na war pinzibani Ammon aga e mili mini yaw.

⁴²Aga a wa tini edi midini afti zamai zamai, koo afti n’Egipte tekeɗeɗi aga a mula mini par kai.

⁴³Aga a ŋa midini wazagai n’a sa kol wiiɗi Egipte maini or, arzaŋ gaini wazagai na pɗamai na suwa paŋ. Ɗai na war Libiya gaiɗi Etiopiya aga e wi midiɗi amlai pini.

⁴⁴Labar n’a wasi piɗi futi na dawai par, na war gal n’azumai par, aga a milini hunai pini gara. War hiy n’abai aga a faka, a hala tuura wazagai viya, a fuɗa ɗai edi viya lai.

⁴⁵Aga a pa gororoni zi pai arbani yem-ra n’abai gaiɗi huwuŋ na sɗik na te na midini afti na zuva gara. Woni aga a nava mri, ɗif ktai maa aga a zina pini kai.