Read Mousgoum Daniyel 12 Bible Online

Daniyel 12 - Mousgoum bible

Daniyel 12

¹War mefeŋ hanɗa, Mikayel ɗif zi ɵeŋ n’abai n’a giɗimiɗi ɗaiku aga a faka amai. A mefeŋ zi gir, war piɗi yai zi tiki par haa girna, gir na maini hanɗa nɵa a za ka duk kai. War mefeŋ hanɗa ɗaiku aga e kûrɗi, nagai paŋ na yikiɗi a ɗoli war maktuɓ zi suŋfa na wiini Alaw.

²Viya arbaɗi n’e kili weseŋ aga e ɵiyi amai, zamai buri e nivi suŋfa n’a vada kai, na zamai e nivi siyer gaini hunai n’abai n’a vada kai.

³Ɗai n’e siɗi ezini seŋ aga e ŋili maini war hlai n’amai nɵa. Nagai n’e ziɗi ɗai viya edi aŋ jre-ɗikat aga eŋili haa kureɗ maini meeɵek nɵa.

⁴Amma tuku Daniyel, ŋoya seŋ hanɗa warɗi agulku, seŋ n’aŋ war maktuɓ hanɗa siŋkaŋ edi wuzani dibini hlai kai. Ɗai viya aga e siɗi wala n’e ziŋ kai, won hlai na maktuɓ hanɗa a mala edi li, ɗai viya aga e tiliŋ, siɗiɗi aga a riya amai.

⁵Won hlai na ta Daniyel mu mula ara, mu tala ɗai zamai sulu amai wulani ra ɗa ca, ktai na par zaw, ktai anene na par zaw lai.

⁶Ktai arbaɗi na sulu a zilba ɗif na gaini sapa zi leŋ sini, na ɗiyasi amai par pini yem agwi, a miɗini: dibini wazagai n’abakai n’a bunda ɗif hiyak hanɗa aga a za kaswata ɗa?

⁷Mu tala ɗif na ahini sapa zi leŋ sini, n’amai par pini yem a yima tini sulu paŋ amai a ha wala mini gaini Alaw na karni a muɗa: A na buri hlai ktai, hlai sulu gaini galni hlai. Won hlai na gadaŋɗi ɗaini a vada li tak, wazagai hanɗa aga a vada.

⁸Mu ɵina wala n’a muɗaŋ, amma mu ɵina ezini edi kai. Nɵa, mu zilbaŋ ɓa Epin-geza, wazagai hanɗa a vada maɵa maɵa ɗa?

⁹A wayaŋa seŋ a muɗa: Hala wiiku Daniyel, wazagai hanɗa a na gaini ŋoyai cok, ɗif a muɗa midini kai, haa sini dibini hlai.

¹⁰Ɗai viya aga e zi edi hilu maini wala n’e hiliyiŋ nɵa, e mi edi muɗukokai gaini titimi tam lai tini gir na e ziŋɗi. Ɗai na maafanai aga e hili wuzaɗi gaini sdaɗi na meefeŋ, aga e siɗi wala n’a na za kai. Amma ɗai n’e siɗi ezini seŋ aga e siɗi hanɗa.

¹¹Sini mefeŋ na ɓaka na war yivai aga a ɗala par, n’aga e kisi wala na hi-hir na wiini ɓilki n’edi war hlai zi ɓaka lai, mefeŋ aga a za dubu gaini miya sulu gaini doogo doogo ɵeeŋe.

¹²Sleɗ midini ni n’aga a siika, haa a co sini mefeŋ na dubu gaini miya hu gaini doogo doogo hu pi ɵim.

¹³Amma tuku Daniyel ɗiya ɗikat haa sini dibini suŋfaku, nɵa aga ku nava si n’amla, asakal aga ku ɵiya amai, ku nava vrakku na war mefeŋ zi dibi.