Read Mousgoum Daniyel 2 Bible Online

Daniyel 2 - Mousgoum bible

Daniyel 2

¹War buza n’a gaŋ sulu na Nebukadnezar aŋ warɗi pai, weseŋ a pɵaŋ, hagalni a turla, weseŋ a ga arni kai.

²Pai a sa futi buri e yikiɗinisi ɗai zi hiila, zi siɗi wuti, zi zi evek

³Pai a miɗiɗi, weseŋ ktai a pɵaŋa, mu na gai turli, siŋkaŋa weseŋ hanɗa.

⁴Paakai zi ɓaka na wiiɗi e miɗini wiini pai war seŋɗi Arameyakai: Jaamus, paiku te hala wuzaɗi, wala a zuku kai! Ku za barka, ku siŋkiyi weseŋ na pɵuku ta, kapai tiyi murgakaiku ɗa mi siŋkuku ezini edi.

⁵Pai a waya seŋ a miɗiɗi: na ɓa ki siŋ kiŋa weseŋ na pɵaŋa kai, ki siŋkiŋa zini edi kaalai, aga mu fiɗiki edi kap, mu ɗikiliki edi daf daf, dalamki a bunda edi aŋ zilgit.

⁶Amma na ɓa ki siŋkiŋa weseŋ na pɵaŋa li, ki siŋkiŋa ezini li lai, aga mu siki kat viya, mu riya faraiki amai, aga ki nivi kol viya wuzaɗi ɗai lai. Nɵa siŋkiŋa weseŋ na pɵaŋa gaini ezini edi.

⁷Paakai zi ɓaka e wiyi seŋ azi n’ag'aŋ sulu pra e miɗini: Jaamus a pɗem ɓa ku siŋkiyi weseŋ n’a pɵuku wiyi tiyi murgakaiku ta, kapai tiyi mi siŋkuku ezini edi.

⁸Pai a waya seŋ a muɗa: Mu siɗa fakat ɓa ki tiki edi n’a hlai, buri ki siɗi ɓa seŋŋa aŋ gai ɗiyi zaw.

⁹Na ɓa ki siŋkaŋa weseŋ na pɵaŋa kai ɗa, sariya na te ɗiya buriki te na ktai; tiki ki kitisi miki aŋ duliŋa gaini seŋ zi rhai kapai haa hiiniŋa a bunda. Tiyana ki siŋkiŋa ɗa a weseŋ na pɵaŋa ɗa, kapai a yima mada ɓa ki kiɗi ta aŋ siŋkiŋa ezini edi lai.

¹⁰paakai zi ɓaka e wiyi seŋ e miɗini: Jaamus, ɗif ktai na midiɗi yai n’a kiɗa aŋ siŋka wala na pai a zilbaŋ na ɗa aŋ kai. Pai ktai n’a zilba ka wala na maini nɵa tini ɗif zi hiila, zaw zi siɗi wuti zaw, tiɗi paakai zi ɓaka aŋ kaalai, koo ɓa a pai n’abai zi spak tekeɗɗi.

¹¹Wala na pai a zilbaŋ na ɗa, a suwa gir gara, ɗif ktai n’a kiɗa aŋ siŋka weseŋ hanɗa wiini pai aŋ kai; sai e ɗi alawai na simniɗi a na arbaɗi ɗai kai tar.

¹²Pini seŋ hanɗa, pai a faka gaini hiy n’abai gara, a sa futi buri e fi! ɗɗi ɗai na yalakai na war Babilon paŋ edi.

¹³Miɗi na wiini pai a wa edi midini afti paŋ ɓa, ɗai na yalakai paŋ ɗa e fiɗiɗi edi, nɵa ɗai e piyi Daniyel gaiɗi marmakaini buri e fiɗiɗi edi lai.

¹⁴Nɵa Daniyel a siiwa Ariyok, abaiɗi ɗai zi gɗam na wiini pai, n’a niyasi edi aŋ fiɗiɗi ɗai na yalakai na war Babilon edi, a siiwaŋ gaini hangal gaini yel lai.

¹⁵A tika seŋ a miɗini wiini Ariyok, abaiɗi askarai na wiini pai maini nɵa: Pai a ɗiyasi seŋni gdaŋ nɵa buri maɗa? Nɵa Ariyok a virnini seŋ hanɗa wiini Daniyel.

¹⁶Daniyel a niya aha sini pai, a siiwaŋ buri a hinini hlai agwi, kapai a siŋkini ezini weseŋ na pɵaŋ ɗa.

¹⁷Nɵa Daniyel a waisi aha, a muɗa seŋ hanɗa wiiɗi marmakaini na hu: Hananiya, Mikayel gaini Azariya lai.

¹⁸A miɗiɗi: Siwumu Alaw n’Amai, kapai a hiina haw burimu, a siŋkumu weseŋ zi hiila hanɗa ta, kapai tumu gaiɗi na yalakai na war Babilon mu nuvumu mri n’edi kai.

¹⁹Wala ziŋoyai hanɗa a siŋka arni Daniyel war wala zi siŋki war duvuk. Nɵa Daniyel a sini tese wiini Alaw n’amai.

²⁰Daniyel a tika seŋ a muɗa: Yikini Alaw a nava kol, war hlai n’a vada kai par haa hlai n’a vada kai. Buri Yel gaini spak paŋ a wiini.

²¹Ni a pai midini hlai, gaini wazagai n’a na vuga paŋ. A ɵa paakai azumai, a tika paakai amai lai, a sa yel wiiɗi na yalakai, a sa siɗi wiiɗi nagai n’e zi ɓraw arbani pɗem gaini meefeŋ.

²²A ni n’a siŋka wazagai na hulamai ziŋoyai edi, a siɗa wazagai n’a na war gegeŋ, sini paŋ a gaglai

²³Tuku Alaw a na wiiɗi tamaiya, mu zuku tese, mu suku kol, buri ku saŋa yel gaini spak! Tiyana pra, ku siŋkaŋa wala na tiyi mi zilbuku midini ɗa; buri ku siŋkiyi wala na huwya pai ɗa.

²⁴Asakal hanɗa, Daniyel a hala sini Ariyok, na pai a sini futi aŋ fiɗiɗi na yalakai na war Babilon edi tini. A hala a miɗiɗi maini nɵa: Ku fiɗiɗi na yalakai na war Babilon kir kai, kaŋa pa sini pai, kapai mu siŋkini ezini weseŋni edi.

²⁵Nɵa, tizaw tar, Ariyok a ka Daniyel aha sini pai, a miɗini maini nɵa: mu navasi ɗif ktai arbaɗi nagai n’e miliɗisi war Yuda par, n’a kiɗa a siŋka ezini weseŋ n’a pɵa pai.

²⁶Pai a tika seŋ a miɗini wiini Daniyel na zinani Beltasar: Ku kiɗa aŋ siŋkaŋa weseŋ gaini ezini edi ɗi?

²⁷Daniyel a waya seŋ wiini pai a muɗa: Wala zi ŋoyai na pai a payaŋ na ɗa, ɗif na yel zaw, zi hiila zaw, zi siɗi wuti zaw, z'evek n’a kiɗa aŋ siŋkini wiini pai aŋ kai.

²⁸Amma Alaw ktai a na amai, ni a siŋka wazagai na warŋoyai, a siŋkini wiini pai Nebukadnezar na ɗa a wala n’aga a za wuzani sek. Weseŋ na pɵa pai gaini wala n’a siŋka arni midini walani zi feŋ a hanɗa:

²⁹Jaamus hlai na ku na hiina midini walaku zi feŋ ɗa, hiiniku a nafu midin wala n’aga a za avut sek, nɵa ni n’a siŋka wazagai ziŋoyai a siŋkuku wala n’aga a halasi.

³⁰Ta ɗa, wala zŋoyai hanɗa a siŋka arar buri yelŋa a sûwiɗi ɗai a zamai paŋ kai. Amma kapai mi siŋkini ezini weseŋ hanɗa edi wiini pai, kapai a siɗa wala n’a na war hiinini lai.

³¹Tuku pai arku a nafu edi ca, wala zi rgi n’abai a siŋka sini arku, n’a ziŋga ɗif ɵa, abai gara, ŋilini a bunda ɗif hiyak. A ɗiya wuzaku zaw, a wala zi mili hunai.

³²Wala zi rgi hanɗa, humokni a or na hilu, paɵani gaini graŋni a arzaŋ, warni gaini ɓulni a kiya,

³³Ezini a kawai, bubur n’ezini galni ktai a kawai, galni ktai a afti.

³⁴Won hlai na ku na tala, ahi-fuŋ ktai a hawasi, tini ɗif sini kai, a kɵa ezini wala zi rgi, a saraŋ edi.

³⁵Nɵa kawai, afti, kiya, arzaŋ gaini or lai a sara edi paŋ, a bunda maini bra na fana edi war luluf nɵa, smer a fanaŋ, balamni a hina kir kai. Amma ahi-fuŋ n’a kɵa ezini wala zi rgi, a bunda aŋ huwuŋi n’amai na te va afti paŋ.

³⁶Hanɗa a weseŋ na pɵa pai ɗa tiyana aga mu suŋkuku ezini edi lai.

³⁷Jaamus, paiɗi paakai, tuku n’Alaw n’amai a sutuku pai, spak, gdaŋ gaiɗi abai na pɗem war tuku;

³⁸tuku n’a siɗi ɗai, wazagai n’edi buza, wazagai zi ɗifli n’arbani hlai n’amai n’a na woɗi woɗi paŋ war tuku, n’a tukuku aŋ pai midini paŋ lai humok zi or hanɗa ku tuku.

³⁹Duɓaku par pai ktai aga te halasi, na wiiku amai te sûwiti, asakal par na te g'aŋ hu aga te halasi, na te kata gaini kiiya, n’aga te ŋa midini afti paŋ.

⁴⁰Asakal par pai na te g'aŋ puɗu aga te halasi, gdiŋi maini kawai nɵa. Maini na kawai a sara, a haɗa, a kirpa wala lai nɵa, pai hanɗa aga te siriɗi, te kirpiɗi nagai na wuzaɗi paŋ edi.

⁴¹Ku tala azi gaini alini azi; galni ktai a kawai, galni ktai a afti lai, nɵa a siŋka ɓa pai hanɗa aga te ɓuruwa, amma aga te za gdaŋ maini kawai nɵa, maini na ku tala kawai aŋ gaini diŋgi gaini afti nɵa.

⁴²Amma alini azi na galni a kawai, galni a afti lai a siŋka ɓa: pai hanɗa galɗi ktai aga a za gdaŋ, galɗi zamai aga a za huruf lai.

⁴³Ku tala kawai gaini diŋgi gaini afti. Hanɗa a siŋka ɓa nagai e zi bonu gaiɗi marɗi war tiki, amma aga etipi amlai gaɗi marɗi pɗem kai, maini kawai gaini afti a diŋga gaini marni kai na ɵa.

⁴⁴War mefeŋɗi paakai hanɗa, Alaw n’amai aga a kitisi pai ktai n’aga te ɓulka edi kai zaŋ, na paiɗi te sa tini pinziba zamai kai, aga te sara, te vada paakai hanɗa paŋ edi, aga te suma haa, haa kureɗ.

⁴⁵Kal kal maini na ku tala ahi-fuŋ a hawasi amai sini huwuŋ par, tini ɗif sini kai, a sara kawai, kiiya, afti, arzaŋ gaini or lai edi nɵa. Alaw n’abai a siŋkini wiini pai na ɗa a wala n’aga a za avut sek. Weseŋ zi pɵi hanɗa a jre, gaglai na midini ɗa, a na ɵa lai.

⁴⁶Nɵa pai Nebukadnezar a hurga azumai, a pa arni azumai wuzani Daniyel, a sini kol, a sa futi buri e zini ɓaka gaini wazagai zi lûgizi na pɗem.

⁴⁷Pai a miɗini wiini Daniyel: A jre, Alawki a Alaw na wiiɗi alawai, a epin-gezaɗi paakai. A ni n’a siŋka wazagai ziŋoyai. Buri ku kiɗa aŋ siŋkaŋa wala ziŋoyai hanɗa.

⁴⁸Nɵa pai a riya Daniyel amai, sini katu n’abakai viya lai, a tikaŋ aŋ Lawan na wiiɗi Babilon, a tikaŋ aŋ abai midiɗi ɗai na yalakai na war Babilon paŋ.

⁴⁹Pini zilbi na wiini Daniyel, pai a tika Sadrak, Mesak gaini Abed-Nego midini sda n’abakai war Babilon. Daniyel a hina ahani pai ɵa.