Read Mousgoum Daniyel 3 Bible Online

Daniyel 3 - Mousgoum bible

Daniyel 3

¹Pai Nebukadnezar a za wala zi rgi n’a ziŋga ɗif gaini or: wilini n’amai kil doogo doogo ɵaara, bukni kil ɵaara lai. A ɗiyaŋ war hlai na plas na Dura, midini afti na Babilon.

²Pai Nebukadnezar a ɵina ɗai buri e diŋgiɗisi satrapai, lawanai, jawrakai, n’e si gadai, n’e giɗimi farai, n’e zi gadai, n’e ɗûkli sariya, zi sda paŋ na war provens paŋ kapai e hilisi miɗi fet na wiini alaw n’a rgaŋ.

³Nɵa satrapai, ɗai zi giɗimi wazagai, lawanai, ɗai zi si gadai, ɗai zi giɗimi godai, ɗai zi rgi gadai, zi ɗûkliti sariya, n’abakai zi ɵi wuze, ɗai zi sda paŋ e diŋgisi, e ɗiyi wuzani alaw zi rgi na wiini Nebukadnezar buriɗi fet.

⁴Paiɗi fet a ɗuula gaini wulani amai a muɗa: Mu na miɗiki tiki ɗai na war pinziba paŋ par, na midini afti na kiini kiini par, na war meme kiini kiini lai, ɵini seŋ hanɗa.

⁵Won hlai na ki ɵinili tuwini faana, algeta, gaŋgraŋ, amiyok, edil gaini wazagai zi yama zamai zamai ɗa, ki hûrgi azumai wuzani alaw zi rgi zi or na pai Nebukadnezar a ɗiyaŋ wuzaki.

⁶Asiya asiya paŋ n’a dara a hurga azumai wuzani kai, a siiwa tini kaalai, tizaw aga e bliŋ warni waŋ z'afu n’abai.

⁷Nɵa won hlai na ɗai paŋ e ɵinili wulani hum, algeta, gaŋgraŋ, edil gaini wazagai zi yama zamai zamai, ɗai na war pinziba, paŋ par, afti paŋ par, meme meme paŋ lai, e hûrgi azumai e siiwi tini alaw zi rgi zi or na wiini pai Nebukadnezar.

⁸Asakal par tar paakai zi ɓaka na wiiɗi e hilisi e pi seŋ midiɗi Yudiyakai.

⁹E tiki seŋ e miɗini wiini pai Nebukadnezar: Jaamus, wala a zuku kai!

¹⁰Jaamus, tuku gaini muduku dama ku sa miɗi ɓa: ɗif n’a ɵinali wulani hum, faana, gaŋgraŋ, amiyok, adill, gaini wazagai zi yama zamai zamai paŋ, a hurga azumai, a siiwa tini alaw zi rgi zi or kai ɗa

¹¹asiya ɗi paŋ n’a hurga azumai kai, a siiwa tini kaalai ɗa, e biliŋ warni waŋ z'afu n’abai.

¹²Amma Yudiyakai zamai na ku miliɗi midini sda n’abakai na midini afti na Babilon maini: Sadrak, Mesak, gaini Abed-Nego. Ɗai hanɗa jaamus, e diri e zi pini gadaiku hanɗa kai, e diri e hûrgi azumai wuzani alawai na wiiku kai, e diri e siiwi tinialaw na ku rgaŋ kaalai.

¹³Nɵa Nebukadnezar a niya war suwar gaini hiy n’abai, a sa miɗi buri e kinisi Sadrak, Mesak gaini Abed-Nego. Nɵa e kiɗisi wuzani.

¹⁴Pai Nebukadnezar a tika seŋ, a zilbiɗi, a muɗa: Sadrak, Mesak gaini Abed- Nego, seŋ na mu ɵinaŋ ɓa ki ɗa hûrgi azumai wuzani alawai na wiya kaalai, ki siiwi tini alaw zi rgi zi or na mu rgaŋ kaalai ɗa a futini ɗi?

¹⁵Tiyana ɗa, zizini siki, won hlai na ki ɵini li tuwini hum gaini algeta, gaŋgraŋ, edil, amiyok gaini wazagai zamai zamai zi yama ɗa, ki hûrgi azumai, ki siiwi tini alaw na mu rgaŋ, na ɓa ki siiwi tini kai ɗa, tiyana tar aga u pûkûki warni waŋ z'afu n’abai. Kapai mu siɗa alaw na halasi a pliki edi ta par ɗa.

¹⁶Sadrak, Mesak gaini Abed-Nego, e tiki seŋ e miɗini wiini pai: Jaamus, tiyi aga mi wiyuku seŋ ktai midini hanɗa kai.

¹⁷Na ɓa Alawyi na mi ɗa hûrgi azumai wuzani a kiɗa piltiyi edi ɗa, aga a pliyi edi mini waŋ z'afu n’abai hanɗa par, tuku tuku par lai, jaamus.

¹⁸Koo ɓa a za hanɗa kai tekeɗeɗi, jaamus, tiyi aga mi hûrgi azumai wuzani alawai na wiiku kai, mi mi siiwitini alaw zi rgi zi or na wiiku kaalai.

¹⁹Nebukadnezar a niya war hiy n’abai, a raka arni amai sini Sadrak, Mesak gaini Abed-Nego. A tika seŋ a muɗa buri e swi waŋ z'afu azi muguzak a suwa n’avut par.

²⁰A sa futi siɗi ɗai na gdaŋai arbaɗi askaraini, buri e rgi Sadrak, Mesak gaini Abed-Nego, kapai e pûkiɗi war waŋ z'afu zi yûvigi n’abai.

²¹Nɵa e rgiɗi ɗai hanɗa gaini sirla na piɗi, jaŋfana siɗi, barlusɗi gaini cuki na midiɗi gaini harabak n’eziɗi paŋ e pûkiɗi warni waŋ z'afu n’abai.

²²pini miɗini pai na ɗiya gdaŋ, e swi waŋ z'afu a suwa pɗemni. Ɗai na'e hili e pûkiɗi miɗi Sadrak, Mesak gaini Abed-Nego warni waŋ ɗa, alesni afu a yiɗi edi yi.

²³Amma Mesak, Sadrak gaini Abed-Nego, e yikki war waŋ z'afu gaini rgi ɓak ɓak.

²⁴Pai Nebukadnezar a tala e ɗa zini yama, hunai te yimaŋ. A faka kot tar, a tika seŋ a zilbiɗi ɗaini n’abakai a muɗa: Mu pukumu ɗai gaini rgi ɓak ɓak arni afu hu kai ɗi? E wiyini seŋ e miɗi: Nkam, a na nɵa! jaamus.

²⁵Pai a waya seŋ a muɗa: Mu tala na ɗai puɗu gaini rgi kai, e hili arbani afu yaw yaw, wuruk siɗi kai, ɗif n’ag'aŋ puɗu a tala maini ahini Alaw nɵa.

²⁶Nɵa pai Nebukadnezar a torosi mini waŋ z'afu n’abai, a ɗûliɗi a muɗa: Sadrak, Mesak gaini Abed-Nego, ɗai zi sda na wiini Alaw n’Amai, niyisi amai, hilisi. Nɵa Sadrak, Mesak gaini Abed-Nego, e niyisi edi arni afu par.

²⁷Satrapai, ɗai zi giɗimi wazagai, lawanai, gaiɗi ɗai zi si gadai na wiini pai, e tipisi e tiliɗi ɗai hanɗa: Afu a za wala ktai siɗi kai, ayir na midɗi maa afu a zibiyaŋ kai, sapa na siɗi maa sini ɵa hiyak, lugosni afu maa siɗi kai.

²⁸Nebukadnezar a tika seŋ a muɗa: Kol sini Alaw na wiini Sadrak, Mesak gaini Abed-Nego, n’a ɵinasi ɵeŋni aŋ kûriɗi zi sda edi, buri e hini siɗi war tini. E hiy amai midini gadai na wiini pai, e si siɗi edimin mri, e diri e hûrgi azumai wuzani alaw na zamai kai, aŋ siiwi tini kaalai, sai tini alaw na wiiɗi ktai.

²⁹Tiyana, ta mu sa miɗi na ɓa, asiya asiya paŋ, war pinziba na woɗi paŋ, war meme meme paŋ lai, midini afti na woɗi paŋ na miisa Alaw na wiini sadrak, Mesak gaini Abed-Nego, ki fiɗiŋ ei, dalamni a bunda aŋ zilgit. Buri Alaw zamai n’a kiɗa aŋ pla ɗif edi maini nɵa aŋ kai.

³⁰Nɵa pai a riya Sadrak, Mesak gaini Abed-Nego amai war sdaɗi midini afti na Babilon.

³¹Pai a sa miɗi siɗi pinziba paŋ, sini afti paŋ, war meme meme paŋ na midini afti paŋ lai maini nɵa: A zuva ɓa Alaw a kasi ɵeɗ midini afti ɗa.

³²A tala ara pɗem buri mu siŋkiki wazagai zi siŋki, gaini zi hiila n’Alaw n’amai a zaŋ sa.

³³Wazagai n’a siŋka ara a na abakai, hiila n’a zaŋ sa a zi spak lai. Paini na te vada kai, spakni a vada kaalai.