Read Mousgoum Daniyel 4 Bible Online

Daniyel 4 - Mousgoum bible

Daniyel 4

¹Ta Nebukadnezr mu nafu aha war dalamŋa, war haŋgala, war muluk.

²Weeŋ ktai a pɵaŋa, a mulaŋa hunai pa gara, wala na halasi war hiiniŋa war hlaiŋa zi feŋ gaini wala na siŋka ara a turlaŋa viya.

³Mu sa futi buri e yikiɗiŋasi ɗai na yalakai na war Babilon paŋ aha sa kapai e siŋkaŋa ezini weseŋ zi pɵi hanɗa.

⁴Won hlai na nagai zi hiila, zi zi evek, pkai zi ɓaka na wiiɗi, ɗai zi siɗi wuti e cûsi, mu virniɗi weseŋ na pɵaŋa ɗa, kapai e siŋkaŋa ezini edi, amma e kiɗi aŋ siŋkiŋa kai.

⁵Asakal par Daniyel na zinani Baltazar, na e yikiŋ midini alaw na wiya, na seze na wiini alawai na sɗik aŋ midini a halasi sa, mu virnini weseŋ na pɵaŋa ta ta.

⁶Mu miɗini Beltasar, abaiɗi ɗai zi hiila, tuku na mu siɗa ɓa seze na wiini alawai na sɗik aŋ muduku, na wala ziŋoyai ktai na suwuku aŋ kai, muɗaŋa midini wala n’a siŋka ara war weseŋ ɗa, siŋkaŋa ezini edi lai.

⁷Won hlai na mu na azumai midini walaŋa zi feŋ waŋ, mu tala wala ktai maini nɵa: Edi arbaɗi yai tar, mu tala luwuŋ ktai n’abai tiɓ, gai wili amai mogo.

⁸Luwuŋ hanɗa a bunda abai gargali, gdaŋ lai, wilini haa amai sini ɗugul ta, koŋɗi yai na puɗu paŋ arɗi sini paŋ.

⁹Sugaini zuf gara, ali sini viya lai, wazagai na buza paŋ a sumna pin sezeni, wazagai zi ɗifli a rga gutni amai tini, wazagai na karni paŋ a suma sini par.

¹⁰Won hlai na mu na midini hlaiŋa zi feŋ waŋ ɗai, mu tala ɗif zi giɗimi ktai a sɗik, a niyasi azumai amai war fuŋ n’Alaw par.

¹¹A ɗuula gaini gdaŋni a muɗa: bli luwuŋ azumai, ɗûkli tini edi, ɵûri sugaini edi, ɵiri alini edi lai, kapai wazagai n’a buza n’a suma pini sezeni a miywa, wazagai zi ɗifli n’a sumna amai ɵimani a zogo lai.

¹²Amma pini n’ahina dum, hiniŋ gaini sirdaini arni afti, ki rgiŋ gaini jaɓ zi kawai gaini jaɓ zi kiiya, a diyɓa gaini maɗai n’amai par a suma kuzum maini wazagai na buza nɵa.

¹³Hiinini zi ɗif aga a bunda a kata gaini na wiini ɗif kir kai, aga a tika hiini na wiini wala n’edi buza, aga a sumna maini hanɗa nɵa haa buza muguzak.

¹⁴Wala n’a za hanɗa a za pin ɗiyini seŋ na wiiɗi ɗai zi ɵeŋ zi giɗimi, seŋ hanɗa a za pin miɗi a wiiɗi na sɗik lai, kapai ɗai na karɗi e siɗi ɓa Alaw n’Amai a epin-gezaɗi paakai paŋ, a siti pai wiini ni n’a daraŋ a sa rɗi n’amai wiini ɗif n’asakal piɗi marni lai.

¹⁵Hanɗa a weseŋ na pɵaŋa, ta pai Nebukadnezar, tiyana tuku Baltazar, siŋkaŋa ezini edi. Buri ɗai na yalakai na warɗi paiŋa paŋ e kiɗi aŋ siŋkaŋa ezini edi kai, amma tuku ku kiɗa, buri k’aŋ gaini sezeni alawai na sɗik muduku.

¹⁶Nɵa arbani hlai ktai ta, Daniyel na zinani Beltazar hunai te yimaŋ gara, haa hiinini paŋ a turla. Pai a tika seŋ a muɗa: Beltazar, hina weseŋ gaini ezini zi wiyi edi a turluku kai. Beltazar a waya seŋ a muɗa: epin-geza, weseŋ hanɗa a zuva buriɗi gawku, ezini zi wiyi n’edi ɗe buriɗi nagai n’e duruku kai ɗa lai.

¹⁷Luwuŋ na ku talaŋ n’a bunda abai gargali, gdaŋ lai, na wilini haa amai sini ɗugul ta, na ɗai na war koŋɗi yai na puɗu paŋ arɗi sini ca ca,

¹⁸na sugaini a zuva gara, ali sini viya gara lai, na wazagai paŋ a suma sini par, wazagai n’edi buza paŋ a sumna pini sezeni, na wazagai zi ɗifli n’arbani hlai n’amai a za gutni tini lai ɗa:

¹⁹hanɗa ku tuku, jaamusburi ku bunda abai gaini spak lai, abaiku te wula haa te daba pini ɗugul ta, spakku a wa tini edi haa sini koŋɗi yy na puɗu paŋ.

²⁰Asakal par pai a tala ɗif zi giɗimi kai na sɗik, a niyasi azumai, amai war fuŋ n’Alaw par, a muɗa: Ɗukli luwuŋ azumai, tûûriŋ edi, pini n’a hina dum gaini sirdaini, ki hiniŋ arni afti, ki nigiŋ gaini jaɓ zi kawai gaini jaɓ zi kiiya lai, a diyɓa gaini maɗai, aga a suma kusum gaini wazagai na buza haa buza muguzak

²¹Jaamus, hanɗa a ezini weseŋ n’a pɵuku ɗa, hanɗa a wala n’Alaw n’Amai a ɗiyaŋ buriku ɗa, a suŋkuku arku na ɗa a ni ɗa epin-geza.

²²Aga e burguku edi arba! di! ɗai par, aga ku sumna gaini wazagai n’edi buza, aga a suku kuzum muku maini garakai nɵa. Maɗai aga a diyɓuku lai haa buza muguzak, haa kapai ku siɗa ɓa Alaw n’amai ɗa a epin-gezaɗi paakai paŋ, a siti pai wiini asiya paŋ pin dirini.

²³Miɗi na ɓa hini pini na dum gaini sirdaini lai azumai arni afti tiɓ ɗa a siŋ ka ɓa won hlai na ku siɗali ɓa Alaw n’amai a epin-gezaku ɗa, aga ku waisi warɗi paiku.

²⁴Buri nɵa, jaamus, mu siiwuku ɓa ku yima seŋŋa ɗa, ku hina tuwur edi, ku za jre-ɗikat, ku hina meefeŋku edi, ku hiina haw buriɗi ɗai na murgakai lai, ablaŋtaŋkai ɗa aga ku nava simniku na war ɵeɗ, aga ku toraɗi ka agwiya ɗi ɗa

²⁵Wazagai hanɗa paŋ a za sini pai Nebubadnezar.

²⁶A za buza dam asakal par, a niya amai midiɗi porio a guna blaŋ blaŋ.

²⁷Pai a tika seŋ a muɗa: Hanɗa te Babilon n’amai, na mu rgiti aŋ dalamni pai gaini spakŋa n’abai gara, aŋ kol na wiiɗi paiŋa lai kai ɗi?

²⁸Pai a ɵa mini edi kai hai, wule a wasi amai war fuŋ n’Alaw par a muɗa: Pai Nebukadnezar, e miɗi na ɓa paiku te tika edi ɗaw

²⁹Aga e burguku edi arbaɗi ɗai par, aga ku sumna arbani wazagai n’edi buza, aga e suku kuzum muku maini ɵakai nɵa, haa buza muguzak. Haa ku siɗa ɓa Alaw n’Amai a epin-gezaɗi paakai paŋ, a siti pai wiini asiya paŋ pin dirini.

³⁰Tizaw tar miɗi hanɗa a va amai sini Nebukadnezar, a birga edi arbaɗi ɗai par, a suma kuzum maini ɵakai nɵa, maɗai a waŋ, haa ayir na midini a diya mogokai maini baadani muka nɵa, tetreŋni a bunda maini na wiini wala zi ɗifli nɵa.

³¹War vidini buza na muguzak hanɗa, ta Nebukadnezar mu yima ara amai war hlai n’amai, hiiniŋa a waisi sa, mu sini tese wiini Alaw n’Amai, mu sini kol gaiɗi abai wiini ni n’a na karni haa kureɗ, buri spakni a spak n’a vada kai, paini te na haa kureɗ lai.

³²Ɗai na midiɗi yai paŋ e ɗi wala ktai wuzani arni kai, a za pini dirini sini wazagai zi rgi n’arbani hlai n’amai gaiɗi ɗai a midiɗi yai. Ɗif n’aga a yima tini amai arni aŋ kai, na miɗini ɓa: ku za na ɗa a maɗa aŋ kaalai.

³³Tizaw tar hiiniŋa a waisi sa, buriɗi abai na wiiɗi paiŋa, paiŋa gaiɗi abaiŋa a waisi sa, ɗaiŋa n’e siŋa gadai gaiɗi ɗaiŋa n’abakai e piyiŋasi, e tikiŋa warɗi paiŋa; abaiŋa te bunda te suwa n’avut.

³⁴Tiyana ɗa ta Nebukadnezar, mu kola pai n’amai, mu siŋka edi midiɗi abaini, mu sini kol lai buri sdani a jre, futini a na ɗikat. A kiɗa a hûsiɗi azumai nagai n’e kûli siɗi amai