Read Mousgoum Daniyel 5 Bible Online

Daniyel 5 - Mousgoum bible

Daniyel 5

¹Mefeŋ ktai, Pai Baltazar a ziti fet n’amai buriɗi ɗaini n’abakai zi sda, n’e ɗa dubu ɗaw, a sumna azumai gaiɗi a ca vin.

²Won hlai n’a tetema vin ɗa ya, a sa futi buri e milisi kopai zi or gaini zi arzaŋ na Nebukadnezar n’epini a mulaŋsi war tempel na Yeruzalem par, kapai ni gaiɗi ɗaini n’abakai gaiɗi falakai n’aha gaiɗi n’edi ca ca lai e ci gaini.

³Nɵa e kisi kop zi or n’e miliŋsi war tempel par, a dara muɗa war Dalam n’Alaw na Yeruzalem. Pai gaiɗi ɗaini n’abakai, falakaini n’edi gaiɗi n’aha lai e ci gaini.

⁴Won hlai na e ci li, e tiki piɗi aŋ kûli alawai zi or, zi arzaŋ, zi kiiya, zi kawai, zi luwuŋ, zi kriyit lai.

⁵Wo hlai ni tizaw, ali tini ɗif a niyasi edi, a ɗoha amai sini ɵaga na muɗukwi na wiini pai, wuzani wala zi higi petle sini. Pai a tala wulani tini ɗif n’a na ɗo.

⁶Nɵa pai sirdaini a gzila duk duk, hiinini a turla, huŋwai, a yima ammai wuzani kir kai, kurnaini a ɵiɓa sini marni kit kit.

⁷Pai a ɗuula gaini gdaŋni buri e yikiɗiŋsi ɗai zi zi evek, paakaiɗi zi ɓaka, gaiɗi zi siɗi wuti lai. Pai a tika seŋ a miɗiɗi wiiɗi ɗai na yalakai na Babilon: Asiaɗi paŋ naŋa ɗû hanɗa li, a siŋkaŋa ezini hanɗa li lai, aga mu witini sapai zi pai sini, aga mu ɵitini aiduwi zi or wulani, aga aŋa arbaɗi n’abakai na hu na midiɗi pai.

⁸Nɵa ɗai na yalakai na wiini pai e niyi aha sini, e kiɗi aŋŋi wala na ɗo amai sini hlai kai, e siŋkini ezini kaalai.

⁹Nɵa pai Baltazar a turla a suwa pɗemni, a kwima gara lai, ɗaini n’abakai hunai te yimiɗi.

¹⁰Won hlai n’emini pai te ɵina wulani gaiɗi n’abakai, te niyasi amlai warɗi dlimi zi simi, te tika seŋ te muɗa: Jaamus, wala a zuku kai! ku hina hiiniku turla kaalai, ku kwima kaalai!

¹¹ÀAvut par, war mefeŋ na wiini apuku, ɗif ktai a naka, yikini ɓa Daniyel, tiyana a na midini aftiku lai, seze na wiini alawai na sɗik aŋ sini, na siɗa wala n’a vuga gaini na wuze. A siɗa ezini wazagai n’a hulamai, yel na midiniɗa, maini na wiiɗi alawai nɵa. Pai Nebukadnezar n’apuku a tikaŋ aŋ abaiɗi ɗai zi hiila, z'evek, midiɗi paakaiɗi zi ɓaka gyɗi zi siɗi wuti lai. Hnaɗa a wala na pai n’apuku a zaŋ.

¹²Buri e nivi ɓa, Daniyel na pai a ɵini yiki ɓa Baltazar aŋ gaini seze na kiini ta sini, a siɗa ezini wazagai na hulamai lai. Gaini hanɗa a kiɗa a siŋka ezini weseŋ zi pɵi, a siɗa ezini seŋ zi joriyo, a zizina seŋ lai. Nɵa tiyana mu yukumusi Daniyel ɗa, aga a siŋkumu ezini hanɗa edi.

¹³Nɵa e ki Daniyel amlai wuzani pai, pai a tika seŋ a zilbaŋ: hanɗa ku tuku Daniyel, ktai arbaɗi nagai na pai n’apa a miliɗisi edi war Yuda par ɗi?

¹⁴Mu ɵina ɓa k’aŋ gaini seze na wiini alawai suku, ku siɗa wala n’a vuga gaini na wuze, ku siɗa ezini wazagai na hulamai, k’aŋ gaini yel na mini kiini ta lai

¹⁵E yikiɗiŋasi ɗai na yalakai, gaiɗi ɗai zi zi evek, kapai eŋi wala na ɗoha amai sini hlai, kapai e siŋkiŋa ezini lai. Amma e kiɗi aŋ siŋkiŋa ezini wala hanɗa kai.

¹⁶Amma ta, mu ɵina ɓa tuku ku kiɗa aŋ siŋkaŋa ezini wazagai edi, ku vada seŋ lai. Tiyana ɗa, na ɓa ku kiɗa kuŋa ɗû hanɗa, ku siŋkaŋa ezini edi lai ɗa, aga ku wûti sapai zi pai suku, aiduwi zi or wulaku, aga kuŋa arbaɗi na hu na midiɗi pai lai.

¹⁷Nɵa Daniyel a tika seŋŋa amiɗini wiini pai: Katu na wiini ai ɗa a wiini, farai zi riyi amai ɗa a siŋɗi wiiɗi na zamai, amma wala na ɗoha ɗa, aga muŋiŋni wiini pai, aga mu siŋkini ezini edi lai.

¹⁸Jaamus, alaw n’Amai ɗa a sitini pai, abai na pɗem gainihormo lai wiini Nebukadnezar n’apuku ta;

¹⁹Buriɗi abai na te sa sini ɗa, ɗai na war pinziba paŋ, midini afti paŋ, war meme meme paŋ e ziriyi tiɗi hunai wuzani, a fuɗa ɗif pin dirini, a hina ɗif karni pin dirini, a sa rɗi n’amai wiini ɗif pin dirini, a hosa ɗif azumai pin dirini lai.

²⁰Won hlai n’niya war kûlini-si, sezeni a bunda hiriyik, haa hunai a in alaw warni kir kai, alaw a birgaŋ edi midiɗi paramaiɗi pai par, hormoni a tika edi lai:

²¹A birga edi arbaɗi ɗai par, hiinini a bunda maini wala na buza nɵa, a suma gaini muru, a suma kuzum maini ɵakai nɵa. Maɗai a waŋ haa a siɗa ɓa Alaw n’amai a epin-gezaɗi paakai. A sitini pai wiini asiya n’a daraŋ.

²²Amma tuku Baltazar n’ahini, ku siɗa wazagai hanɗa paŋ ɵa lai, ku hosa suku azumai kai.

²³Ku faka amai sini Alaw n’amai, kopai na war tempelni par ku mulaŋsi anene. Tuku gaiɗi ɗaiku n’abakai, gaiɗi falakaiku n’edi ca ca gaiɗi n’aha lai, ki ci vin gaini. Ku sa kol sini alawai zi arzaŋ, zi or, zi kiiya, zi kawai, zi luwuŋ gaini zi kriyit lai n’tala kaalai a ɵina kaalai a siɗa wala kaalai. Amma Alaw na suŋfaku aŋ war tini, na siɗa payaiku, gaini hiiniku, ku sini kol kai.

²⁴Nɵa wulani tini ɗif a ɵinaŋsi a ni aŋ ɗoha wala hanɗa:

²⁵Wala n’a ɗoha a na ɓa MENE MENE, TEKEL, PARSIN lai.

²⁶A waya edi maini nɵa: MENE a dara muɗa: Pɵa. Alaw a pɵa mefeŋku na warɗi pai ya, a ɗiyaŋ zaw.

²⁷TEKEL a waya edi ɓa tikini kilo. E tukuku midini kilo ta, ku gomoŋ kadai.

²⁸PARSIN a dara muɗa ɓa ɓûrwi. Paiku te ɓurwa ca. Te sa tiɗi Medekai gaiɗi Persekai.

²⁹Nɵa Baltazar a sa futi buri e witini sapai zi pai sini Daniyel, a ɵitini aiduwi zi or wulani lai. E si miɗi edi midini ɓa ni aga aŋa arbaɗi nagai na hu na wiiɗi pai.

³⁰Duvuk ni haa, Baltazar py na Babilon a nava fiɗi n’edi.