Read Mousgoum Daniyel 6 Bible Online

Daniyel 6 - Mousgoum bible

Daniyel 6

¹Dariyus a simiti pai won hlai n’a za buza doogo doogo ɵaara pi sulu.

²A tala arni Daniyel pɗem buri a miliɗi satrapai miya gai caaɓa war sda, kapai a tikiɗi edi midini aftini ta ta;

³A mula ɗai n’abakai midiɗi hu, Daniyel a ktai arbaɗi lai, kapai satrapai paŋ e kisi seŋɗi wuzaɗi, kapai e huwyi hiinini pai kai.

⁴Amma Danyel a sûwiɗi n’abakai gaiɗi satrapai, buri aŋ gaini seze na mini kiini ta. Nɵa pai a firiya a tikaŋ aŋ abaiɗi warɗi paini paŋ.

⁵Nɵa ɗai n’abakai gaiɗi strapai e piyi aŋ nivi wala ktai na meefeŋ sini, na pai te daraŋ kai, kapai e piŋni pini Daniyel, amma e nivi wala na meefeŋ kai, buri ni a na ɗikat, a za faali war wala kai. E nivi meefeŋ ktai n’e miɗiŋ midini kaalai.

⁶Nɵa ɗai hanɗa e miɗi: Aga mu nuvumu wala na meefeŋ ktai sini Daniyel hanɗa kai, sai ɓa mu ɵumu pumuli sini gadai na wiini Alawni par.

⁷Buri nɵa e pirmi e hili sini pai, e miɗini maini nɵa: Pai, wala a zuku kai!

⁸Ɗai n’abakai na warɗi pai paŋ, zi giɗimi wazagai, satrapai, zi si gadai, gaiɗi lawanai e kiti! miɗi buri e ɗiyi gadai ktai buriɗi pai, e ɗiyi gdaŋ midini lai. Seŋ a ɗiya maini nɵa: asiya asiya paŋ n’arbani mefeŋ na doogo doogo hu hanɗa, na siiwali alaw zamai zaw, zawɗif zamai, na ɓa ku tuku kai ɗa, e biliŋ warni waŋni gurnai.

⁹Tiyana Jaamus, a pɗem ɓa ku ɗiya gadai hanɗa, ku tika tampon pini ta, kapai ɗif a kiɗa a bundaŋ kai, maini a na za warni gadai na wiiɗi Medekai gaiɗi Persekai n’a bunda kai nɵa.

¹⁰Nɵa pai Dariyus a tika tampon pini gadai gaini wala zi ɗili hanɗa;

¹¹Won hlai na Daniyel a siɗa ɓa tampaon a tika pini gadai hanɗa li, a niya amlai warɗi dlimini. Dlimi hanɗa t'aŋ war porio n’amai, fenetreɗi a bula siɗi Yeruzalem sek. Azi hu war yivai, a hurga azumai wuzani Alaw, a siiwa Alaw, a kolaŋ lai, maini n’a na zaŋ avut par nɵa.

¹²Ɗai hanɗa e hili witaw tar, e nivi Daniyel a na siiwa, a na tuwa wuzani Alaw lai

¹³E wiyisi sini pai e miɗini buri wala n’a ɗalaŋ maini nɵa: Jaamus, tuku ku tika tampon pini wala zi ɗili ɓa, arbani mefeŋ doogo doogo hu hanɗa, ɗif n’a siiwa li alaw zamai, zaw ɗif zamai, na ɓa siiwuku ku tuku kai ɗa, e bliŋ war waŋni gurnai kai ɗi? Pai, a waya seŋ a muɗa: A na ɵa; pini gadai na wiiɗi medekai gaiɗi Persekai n’a bunda kai ɗa.

¹⁴Nɵa e tiki seŋ e miɗini wiini pai: Jaamus, Daniyel n’arbaɗi bagakai na war Yuda, a n suku hormo kai, a hiina midini wala na ku tika tampon pini kaalai, a siiwa na ma azi hu war yivai ɗa.

¹⁵Won hlai na pai a ɵina seŋ hanɗa a kwima gara, a pya dabarai buri a ɵa Daniyel gaini, haa futi te nawa.

¹⁶Nɵa gawni Daniyel e wiyi sini pai witaw tar, e miɗini: Jaamus, ku siɗa ɓa waa na pai a ɗalaŋli gaini gadai n’a ɗiyaŋli, ɗif a kiɗa a bundaŋ kir kai. Hanɗa a gadai na wiiɗi Medekai gaiɗi Persekai.

¹⁷Nɵa pai a sa futi, e kisi Daniyel, e ɵiŋ war waŋni gurnai. Pai a tika seŋ a miɗini wiini Daniyel, Alawku na ku yimaŋ gaiɗi agulku ktai hanɗa, ni aga a kurɗuku edi.

¹⁸E kitisi fukuni ktai, e tikiti min waŋ. Pai a tika tampon midiɗi gaini adoŋo na tini gaini na wiiɗi ɗaini n’abakai, kapai wala ktaia siɗa bunda burini Daniyel kai.

¹⁹Paya waya aha, a fana gaini mini, muni sini kaalai, weseŋ a dara arni kaalai.

²⁰Nɵa pai a faka amai gorof, hlai rum rum ɓa, a purma edi min waŋni gurnai.

²¹Won hlai naŋasi gobi gaini waŋ, a ɗuula Daniyel gaini wule zi tuwi. A tika seŋ a miɗini: Daniyel, ɵeŋ na wiini Alaw na karni, Alawku a na ku yimaŋ gaiɗi agulku ktai ɗa a kurɗuku edi min gurnai par ya tiɓ ɗi?

²²Daniyel a wiyinisi seŋ wiini pai: Jaamus, wala a zuku kai.

²³Alaw na wiya a ɵinasi ɵeŋ na wiini, a doogo min gurnai, gurnai a zaŋa wala na meefeŋ kai, buri mu nafu wuzani arni gaini seŋ ktai mada kai, wuzani arku tuku pai kaalai. Mu za wala na meefeŋ ktai kai.

²⁴Nɵa pai firyini a va amai gara, a sa futi buri e yimisi Daniyel amai war waŋ par. E yimisi Daniyel amai, e nivi wuruk ktai maa sini kai, buri a tika yimini midini Alawni.

²⁵Asakal par pai a sa futi buri e yikiɗinisi nagai n’e pi seŋ midini Daniyel, e pûkiɗi war waŋni gurnai, nagai, aliɗi gaiɗi falakaiɗi lai. E kiɗi maa azumai pini waŋ kai, gurnai a priɗi, a ɓisiɗi edi.

²⁶Nɵa pai Dariyus a ɗo siɗi ɗai na war pinziba paŋ, na midini afti paŋ, war meme paŋ na midiɗi yai maini nɵa: A zuva ɓa Alaw a kasi ɵeɗ midini afti ɗa!

²⁷Mu sa miɗi na ɓa, midini aftiŋa paŋ, ɗai paŋ aga e ziriyi gai hunai wuzani Alaw na wiini Daniyel. Buri a Alaw na karni, a ni n’a na haa kureɗ, paini aga te vada edi kai, spakni aga a sumna haa hlai n’a vada kai.

²⁸A pulta, a kora ɗif lai, a za wazagai zi siŋki n’abakai gaini zi hiila arbani hlai n’amai midiɗi yai lai, buri a kurɗasi Daniyel edi mini gurnai par.

²⁹Asakal par Daniyel a nava sda n’abai warɗi pai n wiini Dariyus gaiɗi na wiini Sirus na Persus.