Read Mousgoum Daniyel 7 Bible Online

Daniyel 7 - Mousgoum bible

Daniyel 7

¹War buza n’avut na Baltazar a na aŋ pai war Babilon, weseŋ ktai a pɵa Daniyel won hlai n’a na midini hlaini zi feŋ waŋ. Wala a siŋka arni viya viya. Asakal par a ɗo weseŋ na pɵaŋ, weseŋ a tika pini maini nɵa:

²Daniyel a tika seŋ a muɗa war wala n’a siŋka ara war duvuk, smer a fakasi war koŋni hlai na puɗu par, a faka yem-ra n’abai amai.

³Wazagai puɗu n’abakai na siɗa kiini kiini a niyasi azumai par pin yem.

⁴N'avut a siɗa maini gurnai nɵa, baadani maini na wiini muka nɵa, ara sini nɵa ca, e rɗi baada na graŋni edi. E tikiŋ amai, e ɗiyiŋ midini ezini na sulu n’asakal maini ɗif nɵa hiini na wiini ɗif a sa sini.

⁵Asakal par mu tala wala zamai ktai n’ag'aŋ sulu, maini Urs nɵa, gaini ɗiyi amai midini gal ktai, hraw mini hu, e miɗini maini nza: ɗiya amai pɗem, lumaneŋ viya.

⁶Asakal hanɗa mu tala wala zamai ktai pra, siɗa maini ahraw nɵa, gai baadani wala zi ɗifli duɓani puɗu, humok pini puɗu, spak ziŋi a sa sini.

⁷Asakal hanɗa war wala n’a siŋka war duvuk, mu tala wala n’ag'aŋ puɗu, na sabab, zi mili hunai, na gdaŋ gara lai, sesiyeŋ zi kawai mini abakai, a luma neŋ, a ɓasa, a kirpa azumai pini ezini, ni a na maini marni na hu na wuzani par ɵa kai. Amiyok midini doogo.

⁸Won haly na mu na tala amiyok hanɗa, mu tiliti amiyoki n’agwiyeŋai ktai te diyasi azumai par piɗi marɗi, amiyoki hanɗa arai piɗi ca maini ɗif nɵa, meŋ piɗi tiɓ na te muɗa seŋ na ɗawakai gaini.

⁹Mu tala ara Paramai a zizina azumai. Ɗif na wel ktai a halasi a sumna azumai, sapa na sini muɗukwi maini fiyaw nɵa. Ayir na midini maini ayirni adumai na gaini mi edi nɵa, paramaini te ya pre pre maini alesni afu nɵa. Eziɗi n’a guna a za gaini afu na mekele hliz.

¹⁰Ra z'afu a kasi edi wuzani par, ɗai dubu dubu e zi sdani, ɗai dubu dubu doogo azi viya e ɗiyi wuzani, ɗai n’e ɗûkliti sariya e simni azumai, maktubai a mala edi.

¹¹Ara a nafu ca ɗai, buri bakawa na miɗi amiyoki na te muɗa seŋ na ɗewek - won hlai na mu na tala wala n’ag'aŋ puɗu, a fuɗa edi, a tuura edi, a ɵiŋka arni afu n’abai. -

¹²Wazagai na hu n’a hina, e ɗiyi spakni zaw, e hiniŋ buri hlai ktai n’agwi haa sin mefeŋ gaini sarti ktai ta.

¹³Mu tala war wala n’a siŋka ara duvuk, mu tala wala ktai maini ɗif nɵa, a halasi arni ɗugul, a halasi sini ɗif na wel sek, e kiŋ pini wuzani.

¹⁴Spak, abai na pɗem gaiɗi pai lai a sa sini. Ɗai na war pinziba paŋ, midini afti paŋ, war memememe paŋ lai aga e zi ɵeŋni, spakni a spak n’a vada kai, n’aga a sumna haa, paini te pai n’aga e ɓilka edi duk kai zaŋ.

¹⁵Sezeŋa ta Daniyel a kwima gara amlai war sa, wazagai n’a siŋka ara, a mulaŋa hunai pa gara.

¹⁶Mu halasi sini ktai arbaɗ nagai n’e ɗa ca ɗa, mu zilbaŋ: Jre n’aŋ war ni wala na mu talaŋ tiɓ ɗa a maɗa? A muɗaŋa, a siŋkaŋa ezini edi lai.

¹⁷Wazagai n’abakai na puɗu hanɗa a siŋka ɓa, paakai puɗu aga e simi midini afti;

¹⁸asakal hanɗa ɗai na sɗik na wiini Alaw n’Amai aga e niviti pai, paiɗi aga te hina tiɗi ɵa haa kureɗ, haa hlai n’a vada kai n’a vada kai.

¹⁹Mu paya aŋ nava gaglai midini wala n’ag'aŋ puɗu, n’a siɗa maini marni na hu ɵa kai, na maswar gara lai, na sesiyeŋni a zi kawai, tetrekni a zi kiiya lai, n’a luma wala, a ɓasaŋ, a kirpa pini n’a hina azumai pini ezini;

²⁰midini amiyok na doogo na midini gaiɗi na ktai na te diyasi asakal par, na amiyok hu a rɗa edi wuzaɗi, amiyoki hanɗa, na arai piɗi ca, meŋ piɗi tiɓ, te muɗa seŋ na ɗewek, te tala amai te suwa marɗi na zamai;

²¹Mu tiliti amiyoki hanɗa te na hitimiɗi ɗai na sɗik, te rɗa amai midiɗi lai,

²²haa ɗif na wel a cosi, sariyaɗi na sɗik na wiini Alaw n’Amai te suma, haa hlai na pai te sa siɗi ɗai na sɗik a va amai.

²³A muɗaŋa maini nɵa: wala n’ag'aŋ puɗu a siŋka midiɗi pai na te g'aŋ puɗu, n’aga te suma midiɗi yai. Pai na ɗa aga te kata gaiɗi na zamai ɗa kai, aga te suma hlai paŋ, te kirpa, te ɗukla hlai ɓok ɓok.

²⁴Amiyok na doogo a siŋka ɓa warɗi pai hanɗa, paakai doogo aga e simi. Asakal par ktai aga a halasi a suma. Ni aga a kata gaiɗi marni na wuzani par kai; aga a fuɗa paakai edi hu.

²⁵Aga a muɗa seŋ na ɗewek sini Alaw n’amai, aga a ziɗi gir wiiɗi ɗai na sɗik na wiini Alaw n’Amai; aga a paya futi aŋ bunda mefeŋ zi fet na wiiɗi gaini gadai na wiiɗi lai. Ɗai na sɗik aga e si edi war tini buri hlai ktai, hlai sulu gaini galni hlai ktai lai.

²⁶asakal par ɗai zi ɗûkli sariya aga e simni azumai, spakni aga a tika edi, e hiziŋ edi, e sini arni edi gamai.

²⁷Amma pai gaini spak gaiɗi abai na wiini pai na midiɗi yai aŋ a sa siɗi ɗai na sɗik na wiini Alaw n’Amai. Paiɗi te pai na te vada kai, ɗai zi spak na midini afti paŋ e hûrgi azumai wuzani, e gidi pini lai.

²⁸Weseŋ a ɗiya nɵa ta, ta Daniyel hiiniŋa a turla gara, keɵkeŋa a gzila dug, muŋoya seŋ hanɗa warɗi agula.