Read Mousgoum Daniyel 8 Bible Online

Daniyel 8 - Mousgoum bible

Daniyel 8

¹War buza n’ag'aŋ hu na Baltazar aŋ warɗi pai, ta Daniyel wala a siŋka sini ara, asakalni n’avut.

²Mu tala war wala n’a siŋka ara ɗa mu na war Sûz, fuŋ n’abai na midini afti na Elam. Mu tala sa, ta dama mu na agoɗom wulani ra Ulai.

³Mu yima ara amai, mu tala adime ktai wulani ra zaw. Amiyok midini sulu, ktai mugwi te sûwiti maiɗi, na mugwi gara te diyasi asakal par.

⁴Mu tala adime a daba piɗi futi na koskoi sek, war gal n’azumai sek, war gal n’amai sek lai, wala na buza ktai n’a ɗiya mini aŋ kai, ɗif n’a kiɗa a ɵa wala tini par aŋ kaalai. A za paŋ pin jaani. Spakni a riya amai sek sek.

⁵Won hlai na mu na hiina midini hanɗa, mu tala mempete ktai a halasi piɗi futi na koskoi par, a guna midini afti paŋ. Ezini a jo azumai midini afti kai, mempete hanɗa, aŋ gaiɗi amiyoki ktai amai midini arni tiɓ.

⁶A halasi haa sini adime na amiyokni sulu na mu talaŋ wulani ra zaw ɗa, a lawa midini gaini spakni paŋ.

⁷Mu talaŋ a cosi sini adime gaini hiy n’abai, a daba adime na amiyokni sulu, a haɗa amiyokni edi, adime gdaŋni n’a ɗiya wuzani gaini aŋ kir kai, a bulaŋ azumai, a kirpaŋ azumai pini ezini, ɗif ktai n’a kiɗa aŋ plaŋ war tini par aŋ kai.

⁸Mempete a za haa abai, won hlai na spakni a kiɗa a za wala, amiyokini n’amai te haɗa ɓaw, war balamɗi amiyok n’abakai puɗu a diya gaini hiŋili sini koŋɗi yai na puɗu sek sek.

⁹Siɗi ktai arbaɗi par amiyoki zamai agwi te diyasi, spakɗi viya viya war gal n’amai sek, piɗi futi na dawai sek, siɗi yai na pɗemei na te zuva gara sek lai.

¹⁰Spakɗi a wula amai haa sini wazagai zi rgi n’arbani hlai n’amai, te pokosi galni zamai gaini meeɵek lai azumai midini afti. Te kirpaŋ azumai pini eziɗi.

¹¹Spakɗi a riya amai haa sini paini wazagai zi rgi n’arbani hlai n’amai, te ɗala ɓaka n’e ziŋ war yivai kûreɗ-kûreɗ, hlaini na sɗik te bundaŋ hi-hir lai.

¹²Wazagai zi rgi na war hlai n’amai gaini ɓaka n’a za war yivai kûreɗ-kûreɗ lai a sa war tini buri meefeŋ na wiiɗi. Amiyoki te ɵiŋka yimi na jre azumai su, wala na te firya te zaŋ, a za paŋ.

¹³Mu ɵina wulani ɗif na sɗik ktai a na muɗa. Ɗif na sɗik a zilba ni n’a na muɗa maini nɵa: Seŋ n’aŋ warni wala n’a siŋka hanɗa, aga a za haa mefeŋ gama ɗa? Ɓaka n’e ziŋ kûreɗ-kûreɗ ɗa aga a ɗiya haa mefeŋ gama ɗa? Hi n’amai midini gadai n’a na tuura hlai, hlai na sɗik n’a bunda hi-hir gaini wazagai zi rgi n’arbani hlai n’amai, n’a kirpa azumai pini eziɗi lai ɗa aga a za nɵa haa mefeŋ gama ɗa.

¹⁴A wiyini seŋ: Haa ɓaka na koskoi gai na gorof par dubu sulu gai miya hu. Asakal hanɗa par, hlai na sɗik aga a waisi war balamni.

¹⁵Won hlai na ta Daniyel mu na tala wala n’a siŋka ara, mu paya aŋ siɗa ezini edi lai, mu tala wala ktai wuza zaw maini ɗif nɵa.

¹⁶Mu ɵina wulani ɗif warni ra Ulai par, a ɗuula a muɗa: Gabriyel, siŋkini ezini wala n’a siŋka arni Daniyel ɗa.

¹⁷A halasi gobi gai hlai na m’aŋ woni; won hlai n’a na halasi, hunai n’amai te yimaŋa, mu kɵa gaiɗi ara. A muɗaŋa ɵina pɗem tuku ɗif, buri ɓa wala n’a siŋka arku hanɗa a na buri dibini hlai.

¹⁸Won hlai n’a na muɗaŋa, muŋela waŋ, ara gai pi azumai tiɓ, a yimaŋa a ɗiyaŋa amai midini aza, won hlai na mu naka woni.

¹⁹Asakala hanɗa par a muɗa: Aga mu siŋkuku wala n’aga a za sini dibini swar na wiini Alaw, buri ɓa mefeŋɗi aŋ gai ɗiyi zaw.

²⁰Adime na gaini amiyok midini sulu na ku talaŋ hanɗa, a siŋka midini paina Mede gaini na Persus.

²¹Mempete z'ayir hanɗa a paiɗi Gres, amiyoki n’amai midini arni hanɗa a pai n’avut.

²²Asakal n’amiyoki hanɗa te haɗali, amiyok na puɗun’a diyasi warni balamɗi e ɗi paakai puɗu n’aga e simi midini afti hanɗa, amma, gdaŋɗi aga a kiɗa gaini na wiiɗi kai.

²³Won hlai na paakai hanɗa e vidili edi, won hlai na ɗai na maafanai e vi min sdaɗi na meefeŋ amaili lai, pai ktai aga a suma, kûlini-si warni abai, yel a sa sini aŋ rha ɗai.

²⁴Spakni aga a riya amai sek sek, amma war gadaŋni dama kai, aga a za wazagai zi ɓilki n’edi n’abakai, wala n’a tikaŋ mini paŋ a zaŋ paŋ, aga a tûûriɗi ɗai zi spak edi, a dara muɗa ɗai na sɗik.

²⁵Burini yel n’a sa sini aŋ za wazagai, aga a ɗûûliɗi ɗai viya, kûlini-si aga a niya warni, won hlai na hlai paŋ ɵeɗ, aga a fuɗa ɗai edi viya, aga a faka amai sini paiɗi paakai, amma aga a tuura edi, tini ɗif maa a tika sini kai.

²⁶Amma wala n’a siŋka arku burini gorof gaini koskoi, maini n’a muɗa suku nɵa, hanɗa a jre. Amma tuku, giɗma seŋ hanɗa warku, buri a na burini mefeŋ n’edi wuzaku sek gaigai.

²⁷Ta Daniyel, hangala a pra edi sa par, mu bunda veglek haa mefeŋ yaw. Asakal par, mu faka amai mu za sda na wiini pai, hunai n’amai te yimaŋa buri wala n’a siŋka ara, amma ɗif a siɗa hanɗa sa kai.