Read Mousgoum Daniyel 9 Bible Online

Daniyel 9 - Mousgoum bible

Daniyel 9

¹War buza n’avut, na Dariyus ahini Asuwerus na war pinzibaɗi Medekai e tikiŋ aŋ pai midini afti na Babilon,

²war buza n’avut n’aŋ warɗi pai, ta Daniyel mu fufuka war ɗû na sɗik, piɵini buza na doogo doogo muguzak, na pini miɗi na wiini EPIƊ-ƊAI, n’a muɗa mini ɗif na mini Alaw Yeremiyas ɓ'aga a va amai buri hinin’edi war greŋ na wiiɗi Yeruzalem.

³Mu bunda ara sini EPIƊ-ƊAI, mu siiwa tini, mu tuwa sini war tikini sai, war sapa zi groho, mu sumna a ni alogodo.

⁴Mu siiwa EPIƊ-ƊAI, Alaw na wiya, mu hama wuzani maini nɵa: Sla kai ɗi EPIƊ-ƊAI, tuku k’Alaw n’abai, zi spak gara, n’a giɗima bonu n’arbani gaiɗi nagai n’e diri, n’e yimi gadaiku lai.

⁵Tiyi mi zi tuwur, mi zi meefeŋ, mi ɗi ɗai na haharai, mi ɗi ɗai na mi fiki amai suku, mi hini gadaiku gaiɗi gadai na ku ɗiyaŋ paŋ edi.

⁶Tiyi mi ɵini piɗi ɗaiku zi sda, ɗai na muku, n’e miɗi war yikiku wiiɗi paakaiyi, wiiɗi ɗaiyi n’abakai zi sda, wiiɗi tiyakaiyi, wiiɗi ɗai na midini afti paŋ kai.

⁷EPIƊ-ƊAI, jre ɗa a wiiku, tiyi mi tiki ɗa siyer, maini girna mi tiki siyerli nɵa, tiyi ɗai na Yuda, ɗai na Yeruzalem, ɗai na Izrayel paŋ n’e ɗa gobi zaw gaigai, midini afti na ku birgiɗi edi woni paŋ burini meefeŋ na mi ziŋ suku ɗa, mi ɗi na war siyer.

⁸EPIƊ-ƊAI siyer ɗa a wiyi, wiiɗi paakaiyi, wiiɗi tamaiyi, buri mi zi tuwur suku.

⁹Hiinini haw gaini hinini tuwur lai a wiini EPIƊ-ƊAI, Alaw na wiyi, buri tiyi mi fiki amai sini.

¹⁰Mi ɵini pini Epiɗ-ɗai Alaw na wiyi kai, aŋ piyi pin gadaini n’a saŋ war miɗi ɗaini zi sda, ɗai na mini.

¹¹Ɗai na Izrayel gai hlaiɗi e hi amai midini gadai na wiiku, e bindi edi war futi zamai, e ɵini muku kai. Nɵa tusa gaini yuvuk n’a ɗoli war ɗû na wiini Musus, ɵeŋ na wiiku, a kɵa midiyi, buri mi zi tuwur sini Alaw.

¹²Tuku Alaw, ku va miɗiku na ku muɗaŋ siyi gaiɗi nagai n’e ɵi wuzaɗi amai, ku hinasi gir n’abai midiyi war Yeruzalem; gir na maini nɵa a za ka midiɗi yai duk kai.

¹³Pin n’a ɗoli war ɗû na wiini Musus, gir hanɗa a cosi midiyi, amma tiyi mi piyi aŋ tikitini agulni EPIƊ-ƊAI, Alaw na wiyi azumai kai, mi hini meefeŋyi edi kaalai, mi zigi ɵimayi aŋ ziɓiri jre na wiiku kaalai.

¹⁴EPIƊ-ƊAI a ɗiya midini gir hanɗa a kaŋsi midiyi, buri EPIƊ-ƊAI, Alaw na wiiyi a na jre war sdani n’a na zaŋ paŋ, amma tiyi mi ɵini mini kai.

¹⁵Tiyana ɗa, Epiɗ-ɗai Alaw na wiyi na ku miliɗisi ɗaiku edi midini afti n’Egipte par gaini spak n’abai, na ku hina azuku a wa maini n’a na wa girna na ɵa, tiyi mi ɗifu tuwarai, haharai lai.

¹⁶EPIƊ-ƊAI, pin sdaku na jre, ku za barka, ku hina hiyku gaini swarku a tika edi midiɗi Yeruzalem, fuŋku n’abai, huwuŋi na sɗik na wiiku par! buri Yeruzalem gaiɗi ɗai na warɗi e bindi aŋ wala na zi miisi buriɗi ɗai na ɵimaɗi lai burini tuwur na wiyi gaini meefeŋ na wiiɗi tiyakaiyi.

¹⁷Tiyana ɗa Alaw na wiyi, ɵina siiwa na wiini ɗifkuzi sda gaini tuwini lai. Mula arku midini hlaiku na sɗik, na gaini tûûri edi kok, buri hormoku tuku dama.

¹⁸Alaw wiya, zagasi ɵimaku ma zak, mulasi arku, tala ɓilki n’edi na wiyi gaini fuŋ n’abai na yikiku a na yika woni. Mi tûwi suku na burini sdaɗi na ɗikat kai, amma mi tûwi na buri yimku n’abai.

¹⁹EPIƊ-ƊAI, ɵina tûwiŋa, EPIƊ-ƊAI tika pini meefeŋyi kai, EPIƊ-ƊAI zaga ɵimaku miyi zak, za wala buriku tuku Alaw, ku baiya kai, buri fuŋ n’abai hanɗa gaiɗi ɗai hanɗa lai e ɗi wiiku.

²⁰Mu hala wuza gaiɗi siiwa ɗai, mu hama tuwurŋa gaini na wiiɗi ɗaiŋa na Izrayel mu ka tûwiŋa wuzani Epiɗ-ɗai Alaw a wiya, burɗi huwuŋ na sɗik na wiini Alaw na wiya.

²¹Won hlai na mu na siiwa hai, ɗif zi ɵeŋ Gabriyel na mu talaŋsi war wala n’a siŋka ara a ɗuflasi gaini gdaŋni a cosi sa, war piɵiɗi futi na wiini ɓaka na koskoi.

²²A siŋkaŋa ezini seŋ a muɗa: Daniyel mu halasi buri mu suku siɗi.

²³Won hlai na ku tika puku aŋ tuwa wuzani Alaw, miɗi a niyasi edi. Mu halasi aŋ suku labar hanɗa. Buri tuku ku ɗif n’Alaw a duruku gara. Slina ezini wala n’a siŋka arku hanɗa lai.

²⁴Hlai a ɗiya muguzak muguzak azi doogo doogo muguzak, midiɗi ɗaiku na sɗik, gaini fuŋku n’abai kapai sili n’edi war futi na mafini sek a ɗiya, kapai zini tuwur a ɗiya lai kapai meefeŋ paŋ a haza edi, Alaw a kasi jre-ɗikat n’a vada kai, Kapai wala n’a siŋaka arɗi gaiɗi seŋ na wuze lai a va amai, kapai hlai na sɗik gara na warni tempel a za edi sɗik urini EPIƊ-ƊAI pra

²⁵Aga ku sɗa, aga a yima muduku lai ɓa: sini miɗi n’a niyasi edi buri wiyi na pin rgiɗi Yeruzalem par haa sini gizini mesiyas na Pai ta, kitini hlai na muguzak muguzak ag a za muguzak, Yeruzalem gaini ɵaga na siɗi paŋ aga a rga amai pra war kitini hlai na muguzak muguzak haa azi doogo doogo ɵaara pi sulu. Amma hanɗa aga a za war mefeŋ zi gir.

²⁶Asakala kitini hlai na muguzak muguzak haa azi doogo doogo ɵaara pi sulu par, mesiyas aga a yima edi, amma ɗif n’aga a zina pini aŋ kai. Fuŋ n’abai gaini tempel ɗa, ɗai na wiini pai n’a na halasi, aga e tûûriŋ edi, amma vidi n’edi na wiini pai hanɗa aga a za pin hiy na wiini Alaw. Haa sini vidini hatam ta ɗa, wazagai n’a ɓilka edi aga a za viya maini n’a muɗasi ɗa nɵa.

²⁷War kitini hlai na muguzak n’asakal aga a za dewele midiɗi ɗai viya aŋ zi bonu gaini. War galni hlai na muguzak n’asakal hanɗa, aga a ɗala wazagai n’e fiɗiŋ aŋ ɓaka, gaini avdi, emel gaini vin lai n’e kiŋsi war hlai zi ɓaka, ɗif zi ɓilki hlai hanɗa aga a za wazagai na haharai gara viya witaw tar tar, haa ɓilki n’edi n’a muɗasi midini a cosi midini a vadaŋ edi.