Read Mousgoum Hoseya 10 Bible Online

Hoseya 10 - Mousgoum bible

Hoseya 10

¹Izrayel te naka te vowai zi luwuŋ zi vin na juf gara, te wa ali viya gara. Won hlai na te na wa ali viya ɗa, te rga gûwiŋ zi ɓaka ɗa wuzaɗi sek, afti a juva gara, nɵa a zizina ali-fuŋ z'alaw na jufai a suwa pra lai.

²Hiiniɗi a nafu gai ɓûrwi: Tiyana ɗa sai e zizini seŋɗi haw. EPIƊ-ƊAI aga a ho gûwiŋ na wiiɗi azumai, a tuura ali-fuŋ z'alaw na wiiɗi edi lai.

³Tiyana e miɗi ɓa: pai na wiyi aŋ kai, buri mi sini hormo wiini EPIƊ-ƊAI kai, girna ɗa, pai ɗa a kiɗa a za buriyi ɗa a maɗa?

⁴E miɗi viya viya, e hi wala miɗi war jre kai, e zi bonu gai ɗai. Amma, ɗiyi na midini jre ɗa, a na arɗi maini luwuŋ zi masnaw, n’a diya war vuwai n’e hirmiŋ nɵa.

⁵Nagai n’e ɗa war Samariya ɗa, hunai aga a yimiɗi gara, burini ahi ɵeŋ zi or na Bet-Aven ɗa. Ɗai aga e tûwi alaw zi rgi ɗa, paakai zi ɓaka na wiini aga e jiriyi burini, burini kol na wiini n’a na hala edi midini afti zamai, edi gaigai siɗi par.

⁶Aga a sa siɗi Asiriya, aŋ katu wiini pai Yareb. Siyer aga a yimiti Efrayim. Izrayel siyer a yimiti burini sdaɗi lai.

⁷Samariya, miɗi aga a doogo, paiɗi aga a vada edi, maini meɵeɵeɓe na midini yem nɵa.

⁸Hlai zi ɓaka na war Aven, na Izrayel te za tuwur warni ɗa, aga a tuura edi; hedek gaini duvuɗvuɗ aga a diya midini hlai zi gûwiŋ na wiiɗi ɗa, Aga e miɗi sini huwuŋ ɓa: "Ŋûyiyi" wiini boŋorai ɓa: "Kɵasi midiyi"

⁹Izrayel, haa a Gibeya par, suku aŋ za tuwur ɵa! Ku bunda kai, Gaw na siɗi ali n’e ɵini Gat kai ɗa, aga a za siɗi war Gibeya kai.

¹⁰Aga mu gidiɗi maini na mu dara nɵa, pinzibaɗi ɗai aga e tipisi siɗi, won hlai na ɗai aga e rgiɗi buri meefeŋɗi n’e ziŋ azi sulu ɗa.

¹¹Efrayim ɗa t'ahi ɵai n’agunai, na gai hitri ta, na te gzila algama gara, amma, hlai na mu tala wulaɗi na gai futini ɗa, mu firya mu pa zug wulaɗi aŋ za sda gaiɗi, Yuda aga te hirma gaiɗi, Izrayel te gzila darɓazilai gaiɗi lai.

¹²Tiki ɗa, sûûɗi jre-ɗikat, aga ki hiɗi pɗem, Bli vowai a hehe! hanɗa a mefeŋ na ki piyi EPIƊ-ƊAI woni ɗa, haa a cosi, a hina jre-ɗikat a ɵa midiki maini faŋ nɵa.

¹³Tiki ki hirmi ɗa a meefeŋ, hiɗi jre-ɗikat kai ɗa, simi alini siyerki ɗa lai. Buri ku tika hiiniku midini yel na wiiku, ku pɵa midini pɵaɗi ɗaiku zi hatam ɗa.

¹⁴Buri nɵa, suura n’abai aga a faka arbaɗi ɗaiku, fuŋ n’abakai zi gɗam ɗa paŋ aga a tuura edi, maini na Salman a tûûriti Bet-Arbel edi, war mefeŋ na wiini hatam nɵa, hlai n’a fiɗiɗi tamai na falakai edi gaiɗi aliɗi nɵa.

¹⁵Hanɗa a wala na Bet-El aga te kaŋsi midiki ɗa, burini meefeŋ n’abai na ki ziŋ ɗa, Pai na Izrayel ɗa aga a mra hlai na hlai a maa rum rum hai.