Read Mousgoum Hoseya 11 Bible Online

Hoseya 11 - Mousgoum bible

Hoseya 11

¹EPIƊ-ƊAI a muɗa: Won hlai na Izrayel a naka agwi hai ɗa, mu daraŋ gara, War Egipte par mu yikasi ahiya.

²Amma, hlai na mu na yikaŋ ɗa, a yima warni edi sa par, e zi ɓaka wiini alawai Baal, e yi wazagai zi ɗûgûdi zi lûgûzi wiini alawai zi rgi lai.

³Mu hitrini azi zi tiki wiini Efrayim mu ta, mu yimaŋ ta kai, amma e siɗi ɓa mu na tika hangala siɗi, e siɗi ɵa kai.

⁴Mu yimiɗisi amai sa gaini hangal, mu yimiɗi sa war diri, Mu naka buriɗi mu ɗif n’a pla zugɗi edi wulaɗi par, mu siɗi simi miɗi lai.

⁵Aga e wiyi war Egipte kai, ag te ŋa midiɗi ɗa te Asiriya, buri ɓa e firyi e wiyisi sa kai.

⁶Buri nɵa, Gaw aga a halasi midini fuŋɗi n’abakai ɗa, a vada tiɗi na te waŋ edi ɗa edi, aga a tuura hlai paŋ edi, pin hiini na maafanai n’e rgiŋ warɗi ɗa.

⁷Ɗaiŋa e sûûri ɗa pin wazagai na maafanai n’e ziŋ sa ɗa, e yikiɗi amai ɗa, ktai n’a fakasi amai aŋ kai.

⁸Kapai mu zuku ɗa maɵa maɵa ɗa, Efrayim? Mu kiɗa mu siki edi war tiɗi gawki ɗi, Izrayel? Mu kiɗa mu za suku maini na mu za siɗi Adma ɵa maɵa maɵa ɗa? Mu bunduku maiɗi Seboyim ɵa maɵa maɵa ɗa? hangala gai tuuri marwai, sa paŋ a jiriya paŋ.

⁹Aga mu za sda gaini hiyŋa na gdaŋ kai, aga mu waisi aŋ tuuriti Efrayim edi kir kai, buri ɓa ta mu ɗif kai, amma m’Alaw, Arbaki ɗa, ta m’Alaw na sɗik, aga mu waisi aŋ za siki gaini suwar na wiya kai.

¹⁰Nagai n’e wiyisi edi par aga e ɵi pini EPIƊ-ƊAI, n’aga a nuuma maini gurnai ɵa. Won hlai n’a nuuma li ɗa, alini aga e liwisi edi min yem-ra n’abai par gaini jiriyi.

¹¹Aga e liwisi war Egipte par gaini jiriyi, maini wala zi ɗifli nɵa, war Asiriya par lai, maini farani dere nɵa. Aga mu wiyiɗisi e simni midini aftiɗi, a miɗi na sini EPIƊ-ƊAI par.