Read Mousgoum Hoseya 12 Bible Online

Hoseya 12 - Mousgoum bible

Hoseya 12

¹EPIƊ-ƊAI a muɗa: Ɗai na Efrayim e gûniŋa azumai gaini rhai gun, ɗai na Izrayel ɗa, e gûniŋa azumai gaini eles lai. ɗai na Yuda e ɗa gaini Alaw ɗaai, ni a marmaiɗi nagai na sɗik.

²Ɗai na Efrayim ɗa, e vi warɗi na ɗa gaini smer, e liwi na ɗa pini smer n’afu na piɗi futi na dawai par lai, e zi eles, e virmi ɗai lai wuzaɗi sek, e zi bonu gaiɗi Asiriya, e ki emel wiiɗi ɗai n’Egipte ɗa lai.

³EPIƊ-ƊAI seŋ a na arbani gaiɗi ɗai na Yuda ɗa aga a zilbini mini Yakob pini payaini ɗa, aga a za sini pini sdani lai.

⁴Amlai warɗi emini par dam, a yima digini digini n’ezini tawalni kaai, won hlai n’a za li abai ɗa, a daba was gaini Alaw.

⁵A daba was gaini ɵeŋ na wiini Alaw ktai, ɵeŋ a rɗa amai midini, Yakob a tuuwa a siiwaŋ. A navaŋ ɗa war Betel, Alaw a muɗa gaimu na ɗa war hlai ni lai.

⁶EPIƊ-ƊAI a Alaw zi spak paŋ, EPIƊ-ƊAI, a yiki na ɗai e yikiŋ gaini ɗa.

⁷Amma tuku ɗa, aga ku wayasi sini Alaw na wiiku, ɗiya midini jre, za maini n’a na ɗa ɵa, kureɗ, ku pɵa midini Alaw na wiiku.

⁸EPIƊ-ƊAI a muɗa: Efrayim, tuku ku na maiɗi kananiyakai nɵa, ku na gaini kilo na maafanai tuku, ku kara ɗai gaini.

⁹Ku muɗa ɓa: Akam, mu za li aŋ ɗif zi farai, m’aŋ gaini farai viya, amma hanɗa a sda na mu zaŋ, mu za wala ktai na meefeŋ kai war piyini der hanɗa.

¹⁰Ta m’Epiɗ-ɗai Alaw na wiiku haa war Egipte par. Aga mu wuyukusi aŋ sumna pini gumu na wiiku pra maini na war mefeŋ na mu nuvumu ɗa nɵa.

¹¹War mefeŋ ni ɗa, mu muɗa war miɗi ɗai na mini Alaw, mu riya siŋki n’a za arɗi ɗai ɗa amai ta, war miɗi ɗai na mini Alaw mu muɗa seŋ na mu dara mu zaŋ ɗa lai.

¹²Ɗai na Galaad e ɗi ɗai na maafanai, war jreni tiɓ ɗa, e ɗi wala ktai kai, e fiɗi garakai aŋ ɓaka war Gilgal, gûwiŋ zi ɓaka na wiiɗi ɗa, aga a bunda maini kriyit na gaini pi tiɓ tiɓ edi war vuwai nɵa.

¹³Yakob a pra edi warɗi Mezopotamiya n’amai, Izrayel a za sda buriɗi muni, buriɗi muni a giɗima farai na wiini ɗif.

¹⁴EPIƊ-ƊAI a yimiɗisi ɗai na Izrayel amai war Egipte par gaini ɗif na mini Alaw, a giɗimiɗi gaini ɗif na mini Alaw lai.

¹⁵Ɗai na Efrayim ɗa e ɓilkini agulni Alaw viya gara, meefeŋɗi n’e ziŋ paŋ ɗa, EPIƊ-ƊAI aga a zilbaŋ war tiɗi, gaini tirki n’e tirkiŋ paŋ lai.