Read Mousgoum Hoseya 13 Bible Online

Hoseya 13 - Mousgoum bible

Hoseya 13

¹Efrayim a naka ɗa, won hlai n’a faka li aŋ muɗa seŋ ɗa, ɗai paŋ e ziriyi, a naka ɗa a ɗif n’abai warɗi Izrayel. Amma a tuura sini kok, buri ɓa a hurga azumai alaw Baalˆ a nava mri warni hanɗa lai.

²Amma tiyana ɗa ɗai na Efrayim ɗa siɗi pini meefeŋ ɵa ɗaai, gaini arzaŋ na wiiɗi ɗa, e zizini alawai zi rgi, e zizini alawai zi rgi n’e hiiniŋ ɗa, hanɗa paŋ ɗa a sda na ɗai e ziŋ gaini tiɗi, e miɗi edi midini ɓa: Ziɗi ɓaka, ɗai ɗa e hûrgi azumai wuzani ali garakai lai.

³Buri nɵa aga e bindi maini ɗugul zi faŋ na gorof par nɵa, maini maaɗai na gorof par a vada edi ɗa nɵa, maini evek na smer a tikaŋ warni luluf par nɵa, maini agiyiŋ n’a niyasi arni fenetir par ɗa nɵa.

⁴Ta m’Epiɗ-ɗai Alaw na wiiku, haa warɗi Egipte par. Tuku ku sɗa Alaw zamai kai sai muta, ɗif zamai n’a kûriki edi aŋ kai sai mu ta.

⁵Ta mu suɗukusi ɗa edi warni basga na kaɗataŋ par, midini afti zi koɓro.

⁶Won hlai na mu kikisi war hlai na farai a suma woni, ki simi haa ki vi, won hlai na ki vi ca ɗa, kûlini-si a niya warki, nɵa midiki a wula gaya lai.

⁷Aga mu bunda buriɗi aŋ gurnai, maini ahraw na war futi nɵa, aga mu mula ara piɗi;

⁸Aga mu birgiɗi maini wala na buza n’e yikiŋ ɓa Urs n’e mili alini yaw nɵa, aga mu ɓasa didikki edi, aga mu limiki maiɗi gurnai na muni nɵa, kopoŋki, wazagai na buza aga a mijiɗaŋ edi.

⁹Izrayel, wala n’a tuuruku edi, a fiki na ku faka amai sa, sini ni n’a kiɗa a zna puku ɗa.

¹⁰Paiku ɗa aŋ wata praˆ a kurɗuku edi war fuŋku n’abakai par kir ka! Abakaiku zi ɵi wuze ɗa e ɗi wa, na ki ɗika ki miɗi gaiɗi ɓa: siŋa pai ta gaiɗi n’abakai zi ɵi wuze lai ɗa!

¹¹Mu suku pai ktai ta war hiyŋa ɗa, aga mu yimaŋ edi tuku par war suwarŋa lai.

¹²Meefeŋ na wiini Efrayim ɗa aŋ war gɗam, tuwurni ɗa aŋ gaini ŋûyi ta.

¹³Ŋiba na wiiɗi muni zi pûki ɗa aga a halasi midini, a ahi na yel midini kai, amma won hlai na mefeŋɗi zi pûki a cosi li ɗaˆ a dara a niyasi edi warɗi emini par kai.

¹⁴Aga mu piliɗisi edi war hlai zi simni na wiiɗi ɗai zi mri par, mu miliɗisi edi tini mri par. Mri, wazagaiku zi hatam ɗa aŋ wata ɗa? Mri spakku zi fiɗi ɗai aŋ wata ɗa? Hiinini-haw ɗa a na ara kir kai.

¹⁵Koo ɓa, Efrayim a za aŋ ɗif zi farai arbaɗi tawalakaini tekeɗeɗi, smer z'afu na piɗi futi na dawai par aga a halasi, a smer na wiini EPIƊ-ƊAI, n’a halasi edi war basga na kaɗataŋ par. Aga a siita sirdaini, a hiɗika yem na pini lai. Aga a mula godai n’a na ɗa, gaini wazagai na gaini futini futini lai.