Read Mousgoum Hoseya 4 Bible Online

Hoseya 4 - Mousgoum bible

Hoseya 4

¹Slini seŋ na wiini EPIƊ-ƊAI, tiki ɗai na Izrayel, buri ɓa seŋ a na arbani gaiɗi ɗai na midini afti ɗa, buri ɓa jre aŋ kai, pɗem aŋ kai, midini afti hanɗa, ɗai e siɗiŋa aŋ Alaw kai.

²A na ɗa a tusa gaini rhai, fiɗini humok, hill gaini maɵara, a yimi n’e yimi ɗai gai gdaŋ, a fiɗi n’e fiɗi ɗai bas.

³Buri nɵa afti aga a hina war tuwi, ɗai na midini afti ɗa paŋ, gdaŋɗi aga a vada edi; gaini wazagai n’edi buza paŋ gaini wazagai zi ɗifli paŋ lai; hilif n’arni yem ɗa paŋ aga a vada edi.

⁴Ki zi hangal, hini ɗif a pa seŋ midini maini kai, ɗif a ɓara maini kaalai, buri ɓa ɗaiku ɗa, seŋɗi a na gaiɗi paakai zi ɓaka.

⁵Tiki aga ki ɵiɓi tukum girvudi n’arba, ɗif na min Alaw n’a na arbaki ɗe, a ɵiɓa tukum duvuk lai, aga mu fiɗiti Izrayel n’emiki edi.

⁶Ɗaiŋa e mri na ɗa, buri ɓa e siɗiŋa kai, Tiki ɗa, ki firyi ki siɗiŋa kai. Aga mu birgiki edi war sda zi pai zi ɓaka par; tiki midiki a wula gaini gadai na wiini Alaw na wiiki, ta lai aga mu wula mada gaiɗi aliki nɵa lai.

⁷Pɵaɗi a riya amai viya a suwa n’avut, tuwurɗi n’a sa, a riya amai viya a suwa n’avut ɗa lai. Kol na wiiɗi aga mu bundaŋ aŋ miisi.

⁸E vi warɗi gaini wazagai zi ɓaka na ɗaiŋa e fiɗiŋ burini tuwurɗi, e hûgiɗi ɗaiŋa aŋ zi meefeŋ na nagai e ɗa ziŋ ɗa lai.

⁹Paakai zi ɓaka gaiɗi ɗaiŋa lai aga mu zilbiɗi miɗi, aga mu za siɗi pini payaiɗi n’e piyi, pin sdaɗi n’e ziŋ ɗa lai.

¹⁰Aga e simi, amma aga e vi kai, aga e zi siɗi aŋ zawarai, amma aga e wi ali kai, buri ɓa e hini EPIƊ-ƊAI edi, e tiki hangalɗi sini kai.

¹¹Maɵara gaini vin, vin na hehe ɗa, a turla humokni ɗif.

¹²Ɗaiŋa e zilbi luwoŋai n’e kilɗiŋ aŋ alawai ɗa, a wiyiɗi seŋ ɗa a luwuŋ hanɗa, buri ɓa seze na wiini maɵara a niya siɗi dak, a na wûliɗi edi. War maɵaraɗi e gûnisi sini Alaw gobi kir kai.

¹³E zi ɓaka amai merfeŋni huwaŋai, e yi wazagai zi ɗûgûdi zi lûgûzi amai midini boŋorai, azumai pin luwoŋai n’abakai, na sezeni gai futini ɗa. Buri nɵa aliki na falakai aga e zawar, falakaiɗi aliki ɗa aga e zi maɵara lai.

¹⁴Aga mu zilbiɗi miɗi aliki na falakai ɗa, buri zini zawarɗi kai, falakaiɗi aliki burini maɵaraɗi kaalai, buri ɓa tiki paakai mal, ki ɗa kokoni hlai gaiɗi falakai zi zawar, ki zi ɓaka piɗi marki gaiɗi falakai zi zawar na war tempelki lai. "Pinziba na yel midini kai ɗa, a pinziba na gai bi ta" maini na ɗai e miɗiŋ ɗa nɵa.

¹⁵Ɗai na Izrayel, na ɓa ki zi a zawar ɗa, ɗai na Yuda ɗa, ki tikiti futi hanɗa kai; Ki hili war hlai zi ɓaka na Gilgal ɗa kai, ki hili amai a Bet-aven kai, ki hi wala miki ɓa: "gaini EPIƊ-ƊAI jaŋ" kaalai.

¹⁶Buri ɓa Izrayel ɗa humokɗi gdaŋ maiɗi ɵai na te firya te za sda kai ɗa ɵa, tiyana EPIƊ-ƊAI aga a giɗimaŋ, maini adumai na war hlai zi kuzum zi simi farai n’abakai nɵa.

¹⁷Pinzibani Efrayim e ɗa pin alawai na jrekai kai ɵa teɓ. hiniɗi wiiki!

¹⁸E cisi yaaha, tiyana e hiniŋsi li ɗa, e jûgi ɗa pin zini zawar; abakaiɗi zi ɵi wuze, e firyi ɗa a miisi.

¹⁹Smer aga a miliɗi graŋni, aga e tiki siyer gaini ɓakaɗi n’e ziŋ ɗa lai.