Read Mousgoum Hoseya 5 Bible Online

Hoseya 5 - Mousgoum bible

Hoseya 5

¹Slini pɗem, paakai zi ɓaka! Zigi ɵimaki, tiki pinzibaɗi Izrayel! Zigi ɵimaki, pinziba na wiini pai! Sariya hanɗa, te na buriki, buri ɓa, war Mispa, ki bindi aŋ azaw buriɗi ɗai, midiɗi huwuŋ Tabor ɗa, aŋ ava zi giŋi wuzaɗi ɗai lai.

²Ɗai na hangalɗi meefeŋ e fiɗi ɗai edi a suwa pɗemni, ta, aga mu ziɗi wala n’a yima midiɗi gai hlaiɗi paŋ.

³Ta mu sɗa pinzibani Efrayim ɗa ya, Pinzibaɗi Izrayel ɗe, aŋ gai ŋûyi wuzani ara kaalai. Aakam, tiyana ɗa, pinzibani Efrayim, ku za suku aŋ zawar ta, pinzibaɗi Izrayel e zi siɗi haharai ta lai.

⁴Sdaɗi a hiniɗi aŋ wiyisi sini alaw na wiiɗi kai, buri ɓa seze na wiini zini zawar aŋ siɗi, buri ɓa e siɗi EPIƊ-ƊAI kai.

⁵Kûlini-si na wiiɗi Izrayel ɗa, a wala n’a ka seŋ midiɗi, Izrayel gaiɗi Efrayim aga e dibi eziɗi sin meefeŋ na wiiɗi dama. Yuda aga te kɵa gaiɗi lai.

⁶Aga e hili gaini adumaiɗi gaini ɵaakaiɗi n’e zi ɓaka gaini lai aŋ piyi EPIƊ-ƊAI, amma aga e niviŋ kai: a yima warni edi siɗi par kaai.

⁷E zi war jre maini n’EPIƊ-ƊAI a firyaŋ nɵa kai, buri e wi ali na gamawai, tiyana ɗa, haa sini merfeŋ tile ta ɗa, aftiɗi aga a tuura edi.

⁸Piɵi hum, war Gibeya, piɵi faana war Rama, sûûri suura zi hatam aha war Bet-Aven, Benyamin, gawku aŋsi duɓaku par.

⁹War mefeŋ n’aga mu zini gir ɗa, pinziba na wiini Efrayim aga a vada edi, Na mu miɗiŋɗi wiiɗi pinziba na Izrayel na ɗa a wala n’a na ɵa fakat.

¹⁰N'abakai zi ɵi wuze na war Yuda ɗa e ɗa, maiɗi ɗai n’e zûgi hagani vowaiɗi edi nɵa; aga mu hinasi hiyŋa a ma midiɗi maini yem zi ki nɵa.

¹¹Pinzibani Efrayim a na sɗa gir, e ɗa kirpiŋ gaini sariya na jrekai ɗa lai, buri ɓa a tika futi pin smer.

¹²Ta aga mu bunda burini Efrayim ɗa maini guɗoŋ nɵa, burini pinzibani Yuda ɗa maini wuruk n’a zuula kai nɵa.

¹³Efrayim aga e tili veglekɗi, Yuda, wuruk na wiiɗi lai. Nɵa ɗai na Efrayim aga e hili war Asiriya, e ɵini ɗai sini pai Yareb, amma pai hanɗa aga a kiɗa a zuuliki kai, a kiɗa a piyiki kurgum na wiini wurukki kaalai.

¹⁴Aga mu bunda burini pinzibani Efrayim maini gurnai nɵa, maini ahi gurnai nɵa, burini pinzibani Yuda, ta, ta aga mu ɓisiki edi ɓas ɓas, asakal par a hiliŋa lai, aga mu yimiki, mu hala gaiki, ɗif n’aga a hûltiki ta par aŋ kai.

¹⁵Aga mu hala, mu waisi aha war hlaiŋa, haa e siɗi meefeŋɗi ɗa ba, e tiki piɗi e piyiŋa, War girɗi aga e piyi zinai ta par.