Read Mousgoum Hoseya 8 Bible Online

Hoseya 8 - Mousgoum bible

Hoseya 8

¹Pa hum ɗa muku, gir a na yora maini muka nɵa, midini pinziba na wiini EPIƊ-ƊAI, buri ɓa e zi pin bonu na wiya kai, e fiki amai sini gadai na wiya lai.

²Aga e ɗûûliŋa ɓa: Alaw wiya! Tiyi ɗa, mu suɗuku ya, tiyi na Izrayel ɗa.

³Izrayel te ɗiya sin sda na pɗamai ɗa kai; gawɗi aga e tiki futi piɗi.

⁴E mili paakai midiɗi ca ca, gaini hiini na wiya kai, e mili ɗai n’abakai zi ɵi wuze ca ca lai, habar maa ta kai. Gaini arzaŋ na wiiɗi gaini or na wiiɗi lai e zizini alawai zi rgi gaini, na kapai a wûliɗi edi pɗem kiɗi.

⁵A bula ahi gari zi or na wiiku edi su Samariya, wara a na lumaŋa siɗi, kapai e zi aŋ ɗai na meefeŋɗi aŋ kai ɗa, haa kaswata ɗa?

⁶Buri ɓa ahi gari hanɗa a halasi war Izrayel par, a zizinaŋ ɗa a ɗif, a alaw kai, ahi gari na wiiɗi Samariya ɗa aga mu kukuɗaŋ edi.

⁷E sûûɗi azumai ɗa a smer, aga e hiɗi berber n’abai; algama ktai maa aga e nivi kai, n’a diya li ɗa ɗe, a za govoŋ, na ɓa a naiya li pɗem zaw ɗa, ɗai na morkokoi e simiŋ ta lai.

⁸Izrayel ɗa te rɓa li tiyana e ɗa arbaɗi pinziba na zamai na ɗa maini wala na ɗif mini pini kir kai ɵa.

⁹Buri ɓa nagai e hili war Asiriya. Muru ɗa a ɗiya edi kiini amma Efrayim ɗa a sa vrak na wiiɗi marmakaini n’a za maɵara gaiɗi ɗa,

¹⁰E siɗi gir ya arbaɗi pinziba na zamai ɗa sme, amma mu ŋa ya aŋ tipiɗi, agwiya aga e siɗi gir, azumai pini abaiɗi paakai na spakni abai gara ɗa.

¹¹Efrayim te riya gûwiŋ zi ɓaka ɗa amai ta ta kapai e hizi tuwur edi gaini, amma gûwiŋ hanɗa a bunda burini aŋ wala zi dibi azi n’a kaŋ aŋ za tuwur.

¹²Koo ɓa mu ɗûɗi gadai ɗa ktai ktai paŋ tekeɗeɗi, aga e tiliŋ arɗi maini wala na a na buriɗi kai nɵa.

¹³E ziŋa ɓaka gaini wazagai n’e siŋa ɓa a wiya ɗa, e limi neŋni miɗi ta ta lai, EPIƊ-ƊAI a yimaŋ tiɗi par kai. Tiyana ɗa midini a kɵa gaini meefeŋɗi su, a firya a ziɗi gir burini tuwurɗi: nagai aga e wiyi war Egipte.

¹⁴Izrayel midini a wula gaini ni n’a zaŋ ɗa, te zizina dalam na pɗamai gara, Yuda ɗa te rga fuŋ n’abakai ɗa wuzaɗi sek. aga mu ɵina afu aha war fuŋɗi n’abakai, aga a ya dalamai na pɗamai ɗa edi lai.