Read Mousgoum Hoseya 9 Bible Online

Hoseya 9 - Mousgoum bible

Hoseya 9

¹Tiki ɗai na Izrayel, ki firiyi kai, aga ki firyi gara maiɗi pinziba na zamai ɗa ɵa kai. Buri ɓa ki niyi war zini zawar dak, ki hini Alaw na wiiki edi mak, ki nivi vrak na hi-hir pin hanɗa, war luluf n’e gɵi algama warni ta ta ɗa paŋ.

²luluf n’e gɵi algama warni gaini hlai zi cipiɗi vin ɗa aga a viɗi kai, vin na hehe ɗa aga a kiɗa kai.

³Aga e simni midini afti na wiini EPIƊ-ƊAI kai, Pinzibani Efrayim aga e wiyi aha Egipte, aga e simi simi na haharai war Asiriya.

⁴Aga e mi vin azumai aŋ ɓaka wiini EPIƊ-ƊAI kai, ɓaka n’e ziŋni ɗa aga a sini firyi kai. Aga a bunda buriɗi maini peŋ na wiini tuwi nɵa, nagai paŋ n’e simiŋ li ɗa, aga e bindi haharai; peŋɗi ɗa e simiŋ ɗa e ɗi nagai dama, aga a niya amlai war dalam na wiini alaw kai.

⁵War mefeŋ zi fet na ki diŋgi warni ɗa, ki zi woni ɗa a ma ɗa? War mefeŋ zi fet na wiini EPIƊ-ƊAI ɗa?

⁶Aga e hili burini ɓilki n’edi na wiini aftiɗi ɗa, Egipte aga te yimiɗi siɗi, Mofa aga te za aŋ waŋ n’e piki warni, sugoi na maafanai aga a diya midini wazagaiɗi na faraini caŋ gara ɗa, luwoŋai zi hedek a diya amlai war gumuɗi lai.

⁷A na gizi, mefeŋ n’EPIƊ-ƊAI aga a zilbiɗi miɗi ɗa, a na gizi, mefeŋ na wiini vrak ɗa, Izrayel aga te siɗaŋ siɗi Tiki ki miɗi ɓa: ɗif na min Alaw ɗa a zi duuli, ɗif zi seze ɗa, a muɗa na ɗa kla kadai, Na ɓa m’aŋ gai duuli duwul ɗa, a za ɵa burini meefeŋki na viya ɗa, gaini fiki na ki fiki amai sa gdaŋ ɗa lai.

⁸Ni n’a giɗimiti Efrayim ɗa, mu ta, ɗif na min Alaw. Mu na gaini Alaw na wiya, ɗai e gini azaw wuza war futi n’aza, e piyiŋa ma haa amlai war dalam na wiini Alaw na wiya.

⁹E pi azumai war meefeŋ na wiiɗi, maini n’a za war Gibeya ɗa nɵa. Amma EPIƊ-ƊAI midini a wula gaini meefeŋ na wiiɗi kai, aga a zilbiɗi miɗi burini tuwurɗi.

¹⁰Mu nivitisi Izrayel ɗa, maini ali luwuŋ zi vin n’edi war basga na kaɗataŋ nɵa. Mu niviɗisi tiyakaiki maini ali luwuŋ Fige n’a naya witaw, maini ali luwuŋ Fige n’a naya avut nɵa. Amma e hili pini Baal Peyor, e si siɗi edi mini "Sda zi siyer" e bindi siɗi haharai maini alaw n’e diriŋ ɗa nɵa.

¹¹Efrayim, kol na wiiku ɗa aga a ɗufla maini wala zi ɗifli nɵa: Wii aŋ kir kai, ziyi aŋ kir kai, tikini-fel aŋ kir kaalai.

¹²Koo ɓa e wûliɗi aliɗi amai tekeɗeɗi, aga mu hiniɗi wûliɗi a daba kai, mu fiɗiɗi edi. Nkam, gir gara buriɗi, won hlai na mu yima sa li edi arbaɗi par.

¹³Efrayim a naka ɗa, a tala maini luwuŋ palmiye, n’a na ɵimaɗi hlai zi yem, amma tiyana Efrayim aga te kiɗi aliɗi mini ɗif zi fiɗi ɗai.

¹⁴EPIƊ-ƊAI siɗi. Ku siɗi ɗa a ma ɗa? Ku siɗi gut n’a ɵa ahi edi, fiyaw na fiyaw warni kai.

¹⁵Meefeŋɗi aŋ ɗa a siŋka edi war Gilgal, mu tika pa mu bula gaw siki woni par. Burini sdaɗi na meefeŋ ɗa, aga mu birgiɗi edi war dalamŋa par, aga mu diriɗi kir kai; abakaiɗi zi ɵi wuze ɗa paŋ e ɗi ɗai n’e ɵini pa kai.

¹⁶Efrayim a ɗukla azumai daf, sirdaini paŋ a siita siyat, aga e wii ali kir kai, koo na ɓa falakai e wi tekeɗeɗi, aga mu fiɗiɗi aliɗi, n’e wiɗisi warɗi par, n’e diriɗi gara ɗa edi.

¹⁷Alaw na wiya aga a hiniɗi edi, buri ɓa e ɵini mini kai, aga e hini yaw aŋ giliŋi arbaɗi pinziba na zamai.