Read Mousgoum Yowel 2 Bible Online

Yowel 2 - Mousgoum bible

Yowel 2

¹Pɵi faana aha war Siyon. Mili tuwi amai midiɗi huwuŋ na wiya na sɗik. Ɗai na midini afti hanɗa paŋ e ziriyi. Buri mefeŋ na wiini EPIƊ-ƊAI a na gizi, a na gobi.

²A mefeŋ zi gegeŋ na tikiɗim, A mefeŋ zi ɗugul na murɗek gaini hlai zi digi, Vok n’a pɵa kai, zi spak, a na halasi, mu tulumu ka vok na maini hanɗa nɵa duk kai, aga mu tulumu maini zamai pra asakal hanɗa par kaalai. Haa sin pinziba n’asakal sek gaigai. A halasi maini hlai na rum-rum na wa tini midini huwuŋ paŋ nɵa.

³Wuzani afu a ya, Duɓani par, alesni afu a ya lai. Wuzani gizini, afti anafu maini vuwai Eden nɵa, asakalni par afti a bunda edi aŋ basga na kadai su.

⁴A tala maini plasai nɵa, e rûvi maini plasai zi gaw nɵa lai.

⁵Vugumni zuguɗi na midini huwuŋ ɗa, a wa maini vugumni saret zi gaw nɵa. Maini evek n’a luɓa arni afu nɵa; Maiɗi ɗai zi spak n’e zizini siɗi min hatam nɵa.

⁶Wuzaɗi, ɗai paŋ hunai te yimiɗi. Arɗi a ŋiriɓa.

⁷E rûvi maiɗi ɗai gadaŋai nɵa, e pri amai midini ɵaga maiɗi ɗai n’e siɗi hatam nɵa. Ɗif paŋ a hala war futini futini, Ɗif a ɵiɓa kona kai, futini wuzani cir cir.

⁸Ɗif a digzila gai maini kai, asiya ɗi paŋ a hala wuzani cir e hili arni wazagai n’e hitimiɗisi gaini sek, e ɵiri edi siɗi marɗi par kai.

⁹E ɵiri arbani fuŋ n’abai, e rûvi amai midini ɵaga, e pri amai midini dalam ɗaw ɗaw, e niyi amlai warni dalam arni fenetir par ɗaw, maiɗi mahalakai nɵa.

¹⁰Wuzaɗi, afti a ziriya, hlai n’amai a jaga jak. Futi gaini tile a bunda gegeŋ, meeɵek a ŋala kir kaalai.

¹¹Won hlai ni, EPIƊ-ƊAI aga a ɵa edi wuzaɗi askarai na wiini, aga a ɓara. Vokɗi askarai na wiini a na viya gara. Ni n’a va miɗini amai ɗa a na spak gara. Mefeŋ na wiini EPIƊ-ƊAI ɗa, a mefeŋ n’abai, Sabapni ɗa, tini ɗif a ɵa mini kai, n’a kiɗa aŋ yimaŋ sini asiya ɗa?

¹²Hanɗa a miɗi na sini EPIƊ-ƊAI par: Tiyana par, wiyisi sa, gaiɗi agulki paŋ, gaini tikini sai, gaini tuwi, gaini marava lai.

¹³Ki ŋiriwi edi a sapaki ɗa kai, amma t'agulki mal. Wiyisi sini EPIƊ-ƊAI, Alaw na wiiki. Ni a pɗem, hiinini haw warni gara lai. A za hiy gob kai, pɗemni abai gara, meefeŋ n’a dara a zaŋ sini ɗif ɗa a fiɗini sini gara.

¹⁴Mu suɗumu kai, ablaŋtaŋkai aga a bunda hiinini buri meefeŋ n’a dara a zaŋ ɗa ɗi, aga a hinasi ɓiki asakalni par ɗi ɗa? Nɵa aga ki kisi ɓaka z'avdi gaini vin zi mi azumai wiini Epiɗ-ɗai Alaw na wiiki.

¹⁵Piɵi faana aha war Siyon! Zi siki edi aŋ sɗik gaini tikini sai. Ki yiki diŋgi n’abai na burini Alaw.

¹⁶Tipiɗi ɗai, yiki diŋgi n’abai na sɗik Tipiɗisi ɗai paŋ edi: na walakai, aliyagoi n’agogoi gaiɗi akoɗokokai na min fiyaw ɗa paŋ. gawla na tika drai a niyasi anene war dilimini par, drai lai te niyasi anene gumuɗi par.

¹⁷Paakai zi ɓaka na ɵeŋ na wiini EPIƊ-ƊAI, e tuwi arbani min diɓir gaini hlai zi ɓaka. Aga e miɗi sin EPIƊ-ƊAI maini nɵa: EPIƊ-ƊAI, hiina haw buriɗi ɗaiku! Hina bulumku a bunda aŋ wala zi siyer kai, kapai ɗai na kadai e zi anya siɗi kai! kapai ɗai aga e miɗi kai ɓa: Alaw na wiiɗi aŋ wata ɗa? Nɵa pɗem ɗi?

¹⁸EPIƊ-ƊAI a dara aftini gaini diri n’abai, A hiina haw buriɗi ɗaini lai.

¹⁹EPIƊ-ƊAI a wiyiɗi seŋ a miɗiɗi wiiɗi ɗaini maini nɵa: Tili aga mu ɵinikiɗi algama, vin na hehe gaini emel na hehe lai. Aga ki vi gaini. Aga mu ziki aŋ wala zi siyer arbaɗi pinziba na kadai duk kir kai zaŋ.

²⁰Ni n’a halasi war gal n’azumai par, aga mu burgaŋ edi siki par. Aga mu burgaŋ midini afti z'alak zi kooloŋ n’a diya wala kai, nagai n’e ɵi edi wuzani vok, mu birgiɗi war yem-ra n’abai n’a ka kai, nagai n’e hilisi asakal par pin vok aŋ tiki hangalɗi wiini vok ɗa, mu birgiɗi war yem-ra na Mediteraniya, Kopoŋɗi aga a hofa, lugosni aga a tika amai arni smer. Nkam, a za wazagai n’abakai.

²¹Afti, ku huna kai, va gaini firiyi, siŋka firiyiku edi, buri EPIƊ-ƊAI a za wazagai n’abakai.

²²Wazagai na basga, ku hûni kir kai, Kuzum n’edi war basga na kaɗataŋ, diya; Luwuŋai, wa ali! luwuŋ Fige gaini luwuŋ zi vin aga a wa ali viya pra.

²³Tiki ɗai na Siyon, vi gaini firiyi, siŋki firyiki edi war Epiɗ-ɗai Alaw na wiiki. Buri a siki faŋ war hlaini, kapai a zina piki. A hina faŋ n’abai a ɵa: faŋ na guɵur gaini faŋ n’awal lai mai na ɗipar nɵa.

²⁴Luluf a va gaini algama, hulaamai a va gaini vin na hehe gaini emel na hehe lai.

²⁵Aga mu vurgiki buza na aŋoyek, gaini ayuwi, gaini jewjew gain atla a ziki gir woni ɗa, vokɗi askaraiŋa n’abai na mu ɵinaŋɗi miɗiki ɗa.

²⁶Aga ki simi haa ki vi, aga ki kûli yikini EPIƊ-ƊAI, Alaw na wiiki, n’a za sda zi hiila buriki. Ɗaiŋa aga e tiki siyer kir kai, duk kai zaŋ.

²⁷Aga ki siɗi ɓa, ta mu na arbaɗi Izrayel, ɓa ta m’Epiɗ-ɗai Alaw na wiiki, Alaw zamai aŋ kai. Ɗaiŋa aga e tiki siyer kir kai zaŋ.