Read Mousgoum Amos 3 Bible Online

Amos 3 - Mousgoum bible

Amos 3

¹Ziɓiri seŋ hanɗa, n’EPIƊ-ƊAI a na muɗaŋ siki ɗa, tiki ɗai na Izrayel paŋ, pinziba na mu milikisi edi war Egipte par paŋ.

²Arbaɗi pinziba na midiɗi yai paŋ, mu firyiki gara gara ki ɗi tiki. Aga mu zilba meefeŋki na ki ziŋ paŋ war tiki.

³Ɗai sulu e piyi piɗi marɗi amma seŋɗi ktai kai a siɗa aŋ za ɗi?

⁴Gurnai a nava wama n’a lumaŋ kai ɗa, a nuuma edi war basga ɗi? Na ɓa ahi gurnai wala mini kai ɗa, a tuwa amlai war waŋni ɗe?

⁵Wala zi ɗifli ayima warni azaw ɗa, wala zi simi n’a tanaŋsi a na kai ɗe, gurɓuduk na wala a titimaŋ kai ɗa, a kiɗa a doogo azumai duk ɗe?

⁶Hum a tuwa li war fuŋ n’abai ɗa, ɗif na jiriya kai a na ɗi? Gir ktai n’a za war fuŋ n’abai, n’a hinaŋsi a EPIƊ-ƊAI kai a na ɗi?

⁷Nɵa wala n’Epiɗ-ɗai Alaw a dara a zaŋ paŋ ɗa, a siŋkiŋɗi arɗi ɗaini na min Alaw ɗa ta ta haw.

⁸Gurnai a nuuma li ɗa, ɗif n’a huna kai ɗa asiya ɗa? Epiɗ-ɗai Alaw a muɗa li ɗa, ɗif n’aga a muɗa mini edi kai ɗa asiya ɗa?

⁹Amai midini dalamai na pɗamai na war Asdod amai midini dalamai na pɗamai na war Egipte lai, ɗûûli, ki miɗi edi ɓa: Diŋgisi amai midiɗi huwuŋ na Samariya, tili turli n’abai n’a na aha arbaɗi, gaini kaarai n’a na warɗi lai.

¹⁰Ɗai hanɗaˆ sda na jre ɗikat e siɗi futini kai, a miɗi na sini EPIƊ-ƊAI par, Wazagai n’e miliŋsi gaini gdaŋ lai gaini hill lai ɗa, e kiŋ amlai war dalamaiɗi na pɗamai ɗa.

¹¹Buri hanɗa, Epiɗ-ɗai Alaw a na muɗa maini nɵa: Samariya, gawku aga a guna aftiku azumai, Gdaŋku n’a na ɗa aga a vadaŋ edi, dalamaiku na pɗamai aga e virmiŋ lai.

¹²EPIƊ-ƊAI a muɗa maini nɵa: maini ɗif zi giɗimi n’a hultasi azi sulu zaw ɵime bew mini gurnai par, nɵa lai aliɗi Izrayel n’e ɗa war Samariya, n’e fini midini liy gaini tapi na Damas par ɗa, aga e kûrɗi ɗa maini nɵa.

¹³Slini pɗem, zaida hanɗa ki miɗiŋ sin pinzibani Yakob! a miɗi na sini Epiɗ-ɗai Alaw, Alaw zi Spak paŋ par.

¹⁴Mefeŋ na mu faka li siɗi ɗai na Izrayel aŋ zilbiɗi miɗi midini hi n’amai midini gadai na wiiɗi ɗa, aga mu zilbiɗi miɗi midini gûwiŋ zi ɓaka na war Bet-El, aga e hiɗi koŋni gûwiŋ zi ɓaka, na maini miyok ɵa edi, a yaka azumai.

¹⁵Dilimi na wiiɗi fat gaiɗi na wiiɗi amsai ɗa, aga mu haɗaŋ azumai. dalamai n’e ziziniŋ gaini sesiyeŋ pekne aga a vada edi, dalamai zamai na gai futini viya aga a tuura edi, a miɗi na sini EPIƊ-ƊAI par.