Read Mousgoum Amos 7 Bible Online

Amos 7 - Mousgoum bible

Amos 7

¹Wala n’Epiɗ-ɗai Alaw a siŋkaŋa ara ɗa a na maini nɵa: A nafu aŋ za ayuwi dam, won hlai na balamni kuzum n’e ɵiɓiŋni wiini pai a tika pini aŋ goɗa.

²Won hlai n’ayuwi a luma sugoi na midini afti ɗa paŋ li, mu muɗa: Epiɗ-ɗai Alaw, za barka, siyi ni, pinzibani Yakob ɗa a suwa agwi gara lai ɗa, kapai a za maɵa maɵa ɗa?

³EPIƊ-ƊAI a bunda hiinini, a muɗa: Wala hanɗa aga a za kai.

⁴Wala n’Epiɗ-ɗai Alaw a siŋkaŋa ara a na maini nɵa: Epiɗ-ɗai Alaw a na muɗa midiɗi sariya na gaini afu. Yûvûgûni afu ɗa a siita yem n’a na azumai gaigai pini hlai, a ya afti na wiiɗi Izrayel ɗa lai.

⁵Mu muɗa: Epiɗ-ɗai Alaw, mu siiwuku, za barka ɗiyaŋ zaw, pinzibani Yakob ɗa a suwa agwi gara lai ɗa, kapai a za maɵa maɵa ɗa?

⁶EPIƊ-ƊAI a bunda hiinini, a muɗa: Wala hanɗa aga a za kir kai.

⁷Wala n’a siŋkaŋa ara a na maini nɵa: EPIƊ-ƊAI a ɗiya amai midiɗi ɵagai zi kiya, kawai zi kiya na sogom pin teɓ tini yaw.

⁸A muɗaŋa: Amos ku tala ɗa a maɗa? Mu wiyin seŋ: A kawai zi kiya na gaini sogom pini teɓ, n’e kiti hlai gaini. Nɵa EPIƊ-ƊAI a muɗa: Ɗaiŋa na Izrayel e ɗa maini ɵaga na gai fi ka nɵa, mu halaɗi arbaɗi gaini kiya na gai sogom pini teɓ na ɗa aŋ kataŋ siɗi. Aga mu vuga midini meefeŋ na wiiɗi kir kai.

⁹Hlai zi ɓaka na wiiɗi pinzibani Isaak ɗa aga a giɵa azumai, hlai na sɗik na wiiɗi Izrayel aga a bunda aŋ greŋ, aga mu faka amai war hatam siɗi pinzibani Yerobowam na pai ɗa.

¹⁰Nɵa, Amasia pai zi ɓaka na war Betel, a ɵina ɗai sini Yerobowam, pai na Izrayel aŋ miɗini ɓa: Amos a na faka ɗai amai suku arbaɗi pinzibaɗi aliɗi Izrayel; seŋ n’a na niyasi war mini par ɗa a suwa gdaŋɗi ɗai suwai.

¹¹Buri a na muɗa maini nɵa: Yerobowam aga a mra min kaɵkar, aliɗi Izrayel gai hlai paŋ, aga e kiɗi edi gaigai sini aftiɗi par lai.

¹²Amasia a miɗini wiini Amos: Faka hala, epini wala zi siŋki, waya midini afti na Yuda sek, woni aga ku muɗa seŋku na min Alaw par lai, ku suma muku pini lai.

¹³Amma a Betel na ɗa ku waya pin seŋku na min Alaw par kir kai. Buri ɓa hlai hanɗa a hlai na sɗik na wiini pai, a tempel na wiiɗi pai lai.

¹⁴Amos a wiyini seŋ wiini Amasia: Ta mu nafu mu ɗif na min Alaw kai, mu pinzibani ɗif na min Alaw kaalai, mu nafu mu ɗif n’a wula ɵaakai, mu pa luwuŋ Sikomor lai.

¹⁵amma EPIƊ-ƊAI a yimaŋasi edi pini ɵaakai par, a muɗaŋa: Hala, ku muɗa seŋ na min Alaw edi siɗi ɗaiŋa na Izrayel.

¹⁶Tiyana ɗa, ɵina seŋ na wiini EPIƊ-ƊAI ɗa, tuku Amasia na ku muɗa ɓa: Ku muɗa seŋ na min Alaw par siɗi Izrayel kai, ku muɗa seŋ na ɗapni kai sini pinzibani Isaak kai ɗa,

¹⁷Pin hanɗa EPIƊ-ƊAI a na muɗa maini nɵa: Muniku aga te bunda aŋ zawar aha war fuŋ n’abai ɗa, aliku na maɵagai gaiɗi na falakai aga e mri min kaɵkar, Ɗai aga e ɓûrwi afti ɗa tiɗi, tuku aga ku mra edi midini afti na hi-hir, ɗai na Izrayel aga e kiɗi edi gaigai sin aftiɗi par lai.