Read Mousgoum Yonas 4 Bible Online

Yonas 4 - Mousgoum bible

Yonas 4

¹Seŋ hanɗa sa firiyi wiini Yonas kai, haa a za hiy.

²A siiwa tini Alaw a muɗa: Tala haw EPIƊ-ƊAI, hanɗa a seŋ na mu muɗaŋ, won hlai na m’aŋsi ahaya par kai ɗi? A seŋ na mu firiya mu lawa war tarsis wuzani ɗa, buri mu sɗa ya ɓa tuku ɗa k’Alaw na ku hiina haw, k’Alaw zi yum, na ku za hiy witaw kai, na pɗemku abai gara, koo ku za hiy sini ɗif ɗi, ku waya.

³Tiyana ɗa, EPIƊ-ƊAI, ku tika suŋfaŋa, mri buriya ɗa pɗem a suwa simni na kara ɗa.

⁴EPIƊ-ƊAI a waya seŋ a miɗini: Hiyku pɗem ɗi?

⁵Yonas a niya edi warni fuŋ na Ninive par a hala piɗi futi na dawai par a sumna woni. War hlai ni a za dugo zi seze a sumna pini dam aŋ baya wala n’aga a za siɗi Ninive ɗa.

⁶Epiɗ-ɗai Alaw a diyiti luwuŋi azumai par haa amai midini Yonas ta kapai te za seze midini, te giiha hiinini na meefeŋ ɗa edi lai. Yonas a firiyi abai gara buriɗi luwuŋi hanɗa.

⁷Amma war dawaini, gorof, Alaw a ɵinasi atla a limiti luwuŋi ɗa, te siita, te huula tizaw lai.

⁸Won hlai na futi te diyasi li amai, Alaw a ɵinasi piɗi futi na dawai par par, smer zi yivigi, futi te ya Yonas midini gara haa a kɵa azumai gobi gaini ŋili. A zilba mri a muɗa: Mri buriya a pɗem a suwa simni na kara ɗa.

⁹Alaw a muɗa sini Yonas: A tala arku pɗem buri ku za buriɗi luwuŋi hanɗa ɗi? Yonas a muɗa: A pɗem buri mu za hiy, mu paya mri lai.

¹⁰EPIƊ-ƊAI a miɗini: Tuku ku hiina haw buriɗi luwuŋi na ku sɗa gir buriɗi kai, na ku wiliti amai kaalai, na te diya war duvuk ktai, te mra war duvuk ktai lai,

¹¹nɵa ta mu hiina haw buriɗi Ninive kai ɗi, fuŋ n’abai na ɗai na woni e suwi ɗai dubu miya gaini caaɓa, n’e zi ɓraw arbani tiɗi na wus gaiɗi na muni kai, gaini farai ɗa lai ɗa.