Read Mousgoum Piɵi 10 Bible Online

Piɵi 10 - Mousgoum bible

Piɵi 10

¹EPIƊ-ƊAI a miɗini wiini Musus:

²Ku zizina faa na zi arzaŋ sulu, ku zaŋ gaini arzaŋ zi gɵi, gaini hanɗa aga ku tipiɗisi ɗai, gaini hanɗa aga ku sa futi wiiɗi ɗai buri e rɗi lai.

³Won hlai n’e yibi li faa na gaini suluni paŋ ɗa, ɗai na doogo paŋ e tipisi suku mini Gumu n’e nivi gaini EPIƊ-ƊAI warni ɗa.

⁴Na ɓa e yibiti te faa nai ktai ɗa, e tipisi suku ɗa, e ɗi n’abakai na wuzaɗi ɗai, gaiɗi abakai na midini vokɗi askarai na Izrayel.

⁵Won hlai na faa nai zi gaw te tuwa li azi n’avut ɗa, vokɗi askarai na piɗi futi na dawai par e fiki e hili.

⁶Won hlai na te tuwa li azi n’ag'aŋ sulu ɗa, vokɗi askarai na war gal n’amai sek ɗa e fiki e hili. Vokɗi askarai n’a faka a hala paŋ ɗa, sai e yibi faa na haw.

⁷Amma na ɓa ki firiyi ki tipiɗi ɗai na doogo ɗa, ki yibi faa na zi gaw ɗa kai.

⁸Aga e yibi faa na ɗa e ɗi paakai zi ɓaka n’alini Aaron, hanɗa a gadai n’a sɗa aŋ bunda kai haa kureɗ, a na buriki tiki gaiɗi aliki haa siɗi tiyakaiki n’asakal sek paŋ.

⁹na ɓa midini aftiki ki hili li edi aŋ hitimi gaiɗi gawki n’e ɗa hûwiyiki ɗa, aga ki yiibi fana zi gaw kapai ɗai paŋ e ɵini, nɵa ta Epiɗ-ɗai Alaw na wiiki mada aga a kɵa gaiki, aga mu piliki edi tiɗi gawki par.

¹⁰Mefeŋ zi firiyi, zi fet gaini mefeŋ na wiini merfeŋni tile ɗa, na ɓa ki diri ki zi ɓaka zi yi gaini ɓaka zi ɵeɗ ɗa, aga ki yibi fana lai, nɵa ta Epiɗ-ɗai Alaw na wiiki mada a kɵa gaiki, ta m’Epiɗ-ɗai Alaw na wiiki.

¹¹War buza n’ag'aŋ sulu, war mefeŋ n’ag'aŋ caɓa na wiini tile n’ag'aŋ sulu ɗa, ɗugul a yima warni amai midini hlai na sɗik, n’ali-fuŋ na bapɗamai na wiini bonu a na amlai warni ɗa.

¹²Aliɗi Izrayel e fiki war basga na kaɗataŋ na Sinai par. E hili pin girini vokɗi n’a na gai kiti ta ta ɗa. Ɗugul a ɗiya edi war basga na kaɗataŋ na Paran.

¹³A azi n’avut n’e hili pin miɗi na wiini EPIƊ-ƊAI n’a miɗiŋni wiini Musus buri a miɗiŋɗi.

¹⁴A hala avut ɗa a vok na wiiɗi pinzibani Yuda gaiɗi askarai na piɗi. Abai na midini vokɗi askarai hanɗa a Nahson n’ahini Aminadab.

¹⁵Nataniyel n’ahini Suwar a abai na midini vokɗi akarai na wr pinzibani Isakar.

¹⁶Vokɗi askarai na war pinzibani Zabulon ɗa, abai na midini a Eliyab n’ahini Helon.

¹⁷E pli hli na sɗik azumai, pinzibani Gerson gaini Merari e libiŋ tiɗi.

¹⁸N'ag'aŋ sulu a hala ɗa a vok na wiini Ruben. Abai na midini vokɗi askarai na war pinzibani ɗa a Elisur n’ahini Sedewur.

¹⁹Vokɗi askarai na war pinzibani Simeyon ɗa, abai na midini a Selumiyel n’ahini Surisaddai.

²⁰Vokɗi askarai na war pinzibani Gat ɗa, abai na midini a Eliasaf n’ahini Dewuwel.

²¹Pinzibani Kehat ɗa e libi tiɗi awazagai n’a na buri sda na wiini EPIƊ-ƊAI kiini, Levitekai na zamai ɗa, e pi ka hli na sɗik amai wuzani hlai na pinzibani Kehat e cûɗi ɗa.

²²N'ag'aŋ hu ɗa a vok na wiini Efrayim. Abai na midini vokɗi askaraina war pinzibani ɗa a Elizama n’ahini Ammihud.

²³Vokɗi askarai na war pinzibani Manase ɗa, abai na midini a Gamliyel n’ahini Pedasur.

²⁴Vokdi askarai na war pinzibani Benyamin ɗa, abai na midini a Abidan, n’ahini Gidoni.

²⁵Vok n’a hala asakal tar a vok na wiini Dan. Abai na midini vokɗi askarai na war pinziba ni ɗa a Ahiezer n’ahini Amisaddai.

²⁶Vokɗi askarai na war pinzibani Aser ɗa, abai na midini a Pagiyel n’ahini Okran.

²⁷Vokɗi askarai na war pinzibani Neftali ɗa, abai na midini a Ahira n’ahini Einan.

²⁸Aliɗi Izrayel gaiɗi vokɗi askarai na wiiɗi e hili gaini giri piɗi marɗi mai hanɗa nɵa.

²⁹Musus a miɗini ini Hobab n’ahini Ruwel na suwulni, na war pinzibani Madian: Tiyi mi diri mi hili midini afti n’EPIƊ-ƊAI a miɗiyi ɓ'aga a siŋyi ɗa, halasi gaiyi lai, kapai pɗem n’EPIƊ-ƊAI a za ha ɓ'aga a siŋɗi wiiɗi Izrayel ɗa, tuku ku nava gaiyi lai.

³⁰Hobab a wiyini seŋ ɓa: Zaw kai, mu waya ɗa aha midini aftiŋa, arbaɗi zagalakaiŋa.

³¹Musus a siiwaŋ muɗa: Za barka, ku hiniyi kai. Tuku ku sɗa hlai na mi kiɗi mi pi warni edi war basga na kaɗataŋ ɗa, aga ku ɵa wuzayi ɗa ku tuku.

³²Na ɓa ku hala li gaiyi ɗa, pɗem n’EPIƊ-ƊAI a za ha ɓ'aga a siŋyi, a siŋyi li ɗa, tuku aga ku nava gaiyi lai.

³³Aliɗi Izrayel e fiki siɗi huwuŋ na wiini EPIƊ-ƊAI, e hili haa mefeŋ hu, zuŋduk zi bonu edi wuzaɗi su, aŋ piyi hlai n’e kiɗi e pi warni ɗa.

³⁴Girvudi ɗa, ɗugul na wiini EPIƊ-ƊAI amai midiɗi par blaŋ, won hlai n’e fiki li aŋ hili ɗa.

³⁵Won hlai na Levitekai e fiki li aŋ hili gaini zuŋduk zi bonu ɗa, Musus a siiwa maini nɵa: EPIƊ-ƊAI faka amai, kapai gawku e ɵiri edi, nagai n’e duruku kai ɗa e ɵiri edi lai.

³⁶Won hlai n’e ɗiyi li gaini zuŋduk ca ɗa, Musus a muɗa maini nɵa: EPIƊ-ƊAI, halasi sumna arbaɗi vok na pɵa kai, na wiiɗi aliɗi Izrayel hanɗa dam.