Read Mousgoum Piɵi 13 Bible Online

Piɵi 13 - Mousgoum bible

Piɵi 13

¹EPIƊ-ƊAI a miɗini wiini Musus:

²Ku ɵina ɗai e tilisi afti naka naan na mu siŋɗi wiiɗi aliɗi Izrayel ɗa, war pinziba paŋ par ki ɵini ɗif ktai ktai, e viriɗi ɗa arbaɗi n’abakai n’e ɵi wuze na wiiɗi Izrayel ɗa par.

³Musus a za pini miɗi na wiini EPIƊ-ƊAI, a ɵiniɗi ɗai hanɗa edi war basga na kaɗatan na paraŋ par. Yikiɗi ɗai n’abakai n’e ɵi wuze hanɗa a na maini nɵa:

⁴War pinzibani Ruben ɗa a Samuwa n’ahini Zakkur.

⁵War pinzibani Simeyon ɗa a Safat n’ahini Hori.

⁶War pinzibani Yuda ɗa a Kaleb n’ahini Yefune

⁷War pinzibani Isakar ɗa a Yigal n’ahini Yosef

⁸War pinzibani Efrayim ɗa a Yosva n’ahini Nun

⁹war pinzibani Benyamin ɗa a Palti n’ahini Rafu

¹⁰War pinzibani Zabulon ɗa a Gaddiyel n’ahini Sodi

¹¹War pinzibani Manase n’ahini Yosef ɗa a Gaddi n’ahini Susi

¹²War pinzibani Dan ɗa a Ammiyel n’ahini Gemalli

¹³war pinzibani Aser ɗa a Setur n’ahini Mikayel

¹⁴War pinzibani Neftali ɗa a Nahbi n’ahini Vofsi

¹⁵War pinzibani Gad ɗa a Guwel n’ahini Maki

¹⁶Hanɗa a yikiɗi ɗai na Musus a ɵiniɗi aŋ tilisi afti naka naan ɗa. Hoseya n’ahini Nun ɗa, Musus a ɵini yiki ɓa: Yosva.

¹⁷Won hlai na Musus a ɵiniɗi aŋ tilisi afti naka naan sek ɗa a miɗiɗi maini nɵa: ki niyisi war gal n’amai par ɗaw, asakal par ki niyi amai sini huwoŋai na Yuda ɗa,

¹⁸ki tilisi hlai ɗa a na maɵa maɵa ɗi ɗa, ki tilisi ɗai na warni ɗa e ɗi na gdaŋai zaw na hurafai ɗi, ɗai woni ɗa viya zaw, viya kai ɗi,

¹⁹ki tilisi afti n’e simni midini ɗa a na pɗem zaw a na meefeŋɗi, fuŋ n’abakai n’e simni warni ɗa a fuŋ n’abakai zi ɵaga zaw ɵaga sini kai ɗi.

²⁰Ki tilisi afti ɗa a z'alam zaw a z'alam kai ɗi, luwoŋai warni viya zaw, viya kai ɗi, ki zi hunai kai, ki riwisi alini luwuŋ na woni par tiki, a sarti na wiini wiini alini luwuŋ zi vin n’avut.

²¹Ɗai hanɗa e hili e tilisi afti ɗa sini basga na kaɗatan na Ciŋ par ta haa a Rehob aha miɗi Lebo-Hamat ta.

²²E gûnisi war gal n’amai par ɗaw, e hili haa a Hebron war hlai na Ahiman, Sesai gaini Talmai na war pinzibani Anak na mogo ɗa e simni woni ɗa, fuŋ n’abai na Hebron a rga buza muguzak wuzaɗi Tanis na war Egipte.

²³E hili haa war huduk na Eskol, e bilisi tini luwuŋ zi vin ktai na gaini sumul na wiini alini luwuŋ zi vin sini, e tipiŋ gaini alini luwuŋ zamai na wiini Grenad gaini alini luwuŋ Fige, e libiŋ ɗa gaini luwuŋ ɗai pini sulu.

²⁴E sini yiki wiini hlai hanɗa ɓa: huduk na Eskol, a dara a muɗa: huduk na wiini sumul, burini sumul n’aliɗi Izrayel e ɗûkliŋsi woni par.

²⁵E finisi mefeŋ doogo doogo puɗu aŋ tilisi afti ɗa, asakal par e wiyisi.

²⁶Won hlai n’e cûsi ɗa, e hili sini Musus gaini Aaron gaiɗi aliɗi Izrayel na doogo paŋ ɗa lai a Kades edi war basga na kaɗatan na Paraŋ. E miɗiɗi wazagai n’e tiliŋsi, e siŋkiɗi alini luwuŋ na midini afti ni par lai.

²⁷E miɗini Musus maini nɵa: mi hili midini afti na ku ɵiniyi woni ya, mi tiliŋsi ya lai, fakat a afti na fiyaw gaini emelni ami a ka woni, alini luwuŋ na woni par ɗa an na lai.

²⁸Amma ɗai na midini afti ni ɗa e ɗi ɗai zi spak, fuŋɗi n’abakai ɗa abakai gara gaini ɵaga sini lai, pinzibani Anak na mogo ɗa mi tiliɗisi woni lai.

²⁹Amalesitekai e ɗa war gal n’amai sek ɗa, Hittitekai, Yebusitekai gaiɗi Amoritekai e ɗa amai midini huwoŋai ɗa, Kananiyakai e ɗa ɵimani yem-ra n’abai Mediteraneya, wulani Yurdan ɗa lai.

³⁰Kaleb a miɗi nagai n’e miɗi meefeŋ sini Musus ɗa a muɗa: hulumu, hutumu afti ni ɗa, aga mu tukuŋmu, mu rɗumu amai midiɗi lai.

³¹Amma ɗai n’e hili gaini e miɗini: mu kuɗumu aŋ hulumu aŋ hutumumu gaiɗi ɗai hanɗa kai, buri ɓa nagai gdaŋai e suwumu.

³²E tiki piɗi aŋ miɗi meefeŋ burini afti n’e tiliŋsi ɗa wuzaɗi aliɗi Izrayel, e miɗi maini nɵa: Afti na mi hili mi tiliŋsi ɗa a afti n’a fuɗa ɗai n’e simni warni ɗa, ɗai na mi niviɗisi warni ɗa, e ɗi ɗai na mogokai sal.

³³Maa mi tiliɗisi ɗai na mogokai, e ɗi pinzibani Anak, pinzibaɗi ɗai na mogokai. Tiyi mi tili siyi ɵemaɗi ɗa maini aiuwi nɵa, nagai e tiliyi ɗa ɵa lai.