Read Mousgoum Piɵi 14 Bible Online

Piɵi 14 - Mousgoum bible

Piɵi 14

¹Aliɗi Izrayel gaini hlaiɗi e tiki piɗi e sûûri, e fini aŋ tuwi lai.

²E bili arni Musus gaini Aaron ca, e miɗiɗi maini nɵa: humm, mi mrisifu wiyi aha warɗi Egipte zaw edi war basga na kaɗataŋ hanɗa ca mariya kaai!

³EPIƊ-ƊAI a kumu midini afti hanɗa kapai mu murumu mini kaɵkar tiɓ buri maɗa? Falakaimu gaiɗi alimu lai ɗai aga e miliɗi. Ɓa mu wuyumufuna aha warɗi Egipte maa mariya kai ɗi!

⁴E miɗi arbaɗi marɗi: tukumu ɗif ktai aŋ abaimu ta, wuyumu aha war Egipte.

⁵Nɵa Musus gaini Aaron e pûki siɗi azumai wuzaɗi aliɗi Izrayel na doogo ɗa, arɗi gaini pi azumai tiɓ tiɓ.

⁶Arbaɗi nagai n’e hili e tilisi afti ɗa, Yosva n’ahini Nun gaini Kaleb n’ahini Yefune nagai sulu e ɓisi sapa na siɗi edi.

⁷E miɗiɗi wiiɗi aliɗi Izrayel na doogo paŋ ɗa ɓa: afti na mi hili mi tiliŋsi ɗa, afti na pɗemni ɗa a pɗem kai.

⁸Afti na fiyaw gaini emelni ami a ka warni, na ɓa EPIƊ-ƊAI a zina li pumu aga a kumu midini afti hanɗa, a suŋmu lai,

⁹amma ɓa kapai wala hanɗa a za ɗa, ki fiki amai sini EPIƊ-ƊAI kai, ki hûni ɗai na midini afti ni kaalai, mu rɗumufu amai midiɗi na gaini yafai kai, buri ɓa alawai na wiiɗi a yima sini edi yaw, amma EPIƊ-ƊAI ni a na gaimu, ki hûniɗi kai.

¹⁰Ɗai na doogo paŋ e miɗi ɓa e fiɗi Musus gaini Kaleb edi gaini kriyit, nɵa war hlai ni tizaw abai na wiini EPIƊ-ƊAI te siŋka siɗi arɗi aliɗi Izrayel paŋ amai midini Gumu n’e nivi gaini EPIƊ-ƊAI woni.

¹¹EPIƊ-ƊAI a miɗini wiini Musus: ɗai hanɗa, aga e ŋiŋa miɗi kai ɵa kaswata ɗa, e ɗiyi yimiɗi midini seŋ na mu miɗiŋɗi kaalai ɵa haa kaswa ta ɗa, koo gaini wazagai zi siŋki na mu zaŋ arbaɗi na paŋ tekeɗe!

¹²Aga mu fiɗiɗi edi gaini vlak, mu vidiɗi edi lai, amma tuku aga mu zuku aŋ pinziba n’abai zi spak lai a suwa na wiiɗi nagai ɗa.

¹³Musus a wiyini seŋ wiini EPIƊ-ƊAI: Ɗai n’Egipte ɗa e siɗi ku miliɗisi ɗai hanɗa arbaɗi gaini spak,

¹⁴e virniŋɗi wiiɗi ɗai na midini afti hanɗa lai, ɗai na Kanaan ɗa e ɵini ɓa tuku EPIƊ-ƊAI ku na arbaɗi ɗai hanɗa, ɓa tuku EPIƊ-ƊAI ku siŋka suku arɗi ɗai papɗak, ɓa ɗugul na wiiku a tika amai midiɗi, ɓa ku na ɵa wuzaɗi, girvudi ɗa war ɗugul, duvuk ɗa gaini afu lai.

¹⁵Na ɓa ku fiɗiɗi li ɗai hanɗa edi paŋ hub ɗa, ɗai n’e ɵini yikuku n’a waa ɗa aga e miɗi gaiku ɓa:

¹⁶EPIƊ-ƊAI ɗa, a kiɗa aŋ kiɗi ɗai hanɗa midini afti n’a ha wala mini ɓa aga a siŋɗi ɗa kai, a vidiɗi edi war basga na kaɗatan na ɗa burini hanɗa.

¹⁷Tiyana ɗa EPIƊ-ƊAI, za barka, siŋka spakku aryi, maini na ku muɗa ɓa:

¹⁸Ta m’EPIƊ-ƊAI, mu za hiy gob kai, yum na wiya ɗa abai gara, meefeŋ na wiiɗi ɗai gaini hiɗi n’amai midini gadai ɗa mu yimaŋ sa gara, amma meefeŋ na wiini ɗif ɗa mu ara sini kai, meefeŋ na wiiɗi tamai ɗa mu ziɗi gir pini, siɗi nagai par haa sini vunaɗi aliɗi n’ag'aŋ hu zaw n’ag'aŋ puɗu,

¹⁹Za barka EPIƊ-ƊAI, meefeŋ na wiiɗi ɗai hanɗa ku siɗi ni burini pini yumku n’abai ɗa, maini na ku na zaŋsi siɗi war niyiɗi n’edi war Egipte par haa woni na ta na ɵa.

²⁰EPIƊ-ƊAI a wiyini seŋ: Mu siɗi ni li, pini miɗiku ɗa.

²¹Amma nagai n’e tiliti abaiŋa, n’e tili sda n’abakai zi spak na mu zaŋ aha warɗi Egipte gaini n’edi war basga na kaɗatan hanɗa, ktai maa aga a niya aha midini afti hanɗa kai. Gaiɗi abai na wiya na te va afti zaŋ, hanɗa a jre. Nɵa ɗa, ktai arbaɗi maa n’aga a tala afti na mu ha wala ma wiiɗi tamaiɗi ɓa aga mu siŋɗi ɗa kai, buri ɓa e ɓilkiŋa agula azi kadai viya, e ɵini ma kai sam, nɵa nagai n’e ŋiŋa miɗi kai na ɗa arbaɗi par ktai maa aga a niya aha midini afti na Kanaan ɗa kai.

²⁴Amma Kaleb na ɵeŋŋa ɗa, hiinini a nafu maiɗi nagai ɵa kai, a yima seŋŋa ɗa gaini giriŋi kai, nɵa ɗa aga mu kaŋ aha midini afti n’a hala a talaŋsi ɗa, pinzibani aga a nava afti woni aŋ bulum lai.

²⁵Amalesitekai gaiɗi Kananiyakai ki hiniɗika war huduk ca, dawai tar ki wiyi duɓaki, ki vigi edi war basga na kaɗatan ɗaw, agoɗom warni yem-ra n’abai zi vayai ɗa ɗaw.

²⁶EPIƊ-ƊAI a miɗini wiini Musus gaini Aaron:

²⁷Aliɗi Izrayel hanɗa e ɗa ŋiŋa miɗi kai ɵa, ɗai nagai na maafanai hanɗa, kapai e miɗi meefeŋ sa ɵa haa kaswa ta ɗa!

²⁸Nɵa ki miɗiɗi ɓa, mu ha wala ma gaya ta dama, hanɗa a jre, aga mu za siki pini miɗi na mu ɵinaŋ a niyasi miki par ɗa, hanɗa a miɗi na sini EPIƊ-ƊAI par;

²⁹Aga ki mri edi war basga na kaɗatan hanɗa, tiki paŋ n’e piɵikisi sini buza caɓa par ta amai sek ɗa, tiki na ki ŋiŋa miki kai ɗa.

³⁰Aga ki niyi aha midini afti na mu yima ta amai, mu ha wala ma ɓa aga mu kiki aŋ simni warni kai, a niya aha tarɗa a Kaleb n’ahini Yefune gaini Yosva n’ahini Nun lai.

³¹Falakaiki gaiɗi aliki na ki miɗi gaiɗi ɓa ɗai aga e miliɗi ɗa, aga mu kiɗi aha warni, nagai aga e tili afti na ki diri sini kai na ɗa.

³²Amma tiki ɗa aga ki mri edi war basga na kaɗatan hanɗa.

³³Aliki aga e hini edi war basga na kaɗatan yaw aŋ giliŋi haa buza doogo doogo puɗu. Meefeŋ na wiiki ɗa aga a kɵa midiɗi, haa ki vidi edi war basga na kaɗatan hanɗa paŋ.

³⁴Tiki ki zisi mefeŋ doogo doogo puɗu aŋ tilisi afti naka naan ɗa, tiyana ɗa, pini meefeŋki na ki ziŋ ɗa, aga ki siɗi gir haa buza doogo doogo puɗu, a dara a muɗa: mefeŋ paŋ buza midini ɗaw ɗaw. Nɵa kapai a yima miɗiki ɓa ɗif n’a hinaŋa li edi ɗa aga a za sini maini nɵa.

³⁵Hanɗa a wala na mu dara mu miɗiŋki ɗa, jre zaŋ, mu dara mu za siki tiki ɗai na maafanai na ki fiki amai sa hanɗa maini nɵa: aga ki vidi edi war basga na kaɗatan hanɗa kafa, ki mri edi woni.

³⁶Amma ɗai na Musus a ɵiniɗi aŋ tilisi afti, n’e wiyisi e miɗi meefeŋ sini afti ni ɗa, e fikiɗi ɗai amai sini Musus lai ɗa,

³⁷ɗai nagai ɗa e mri, e yimiɗi ɗa a veglek kai, EPIƊ-ƊAI a fiɗiɗi edi buri ɓa e miɗi meefeŋ sini afti ɗa.

³⁸E hini karɗi piɗi nagai n’e hili e tilisi afti ɗa a Yosva n’ahini Nun gaini Kaleb n’ahini Yefune.

³⁹Musus a kasi seŋ hanɗa wiiɗi aliɗi Izrayel ɗa paŋ, e niyi war kwiyimi n’abai.

⁴⁰Dawaini ɗa, gorof par cup, e niyi amai merfeŋɗi huwuŋ e miɗi: a jre, tiyi mi zi ɗa a meefeŋ. Tiyana aga mi hili warni hlai n’EPIƊ-ƊAI a miɗiyi gaini ɗa.

⁴¹Musus a miɗiɗi: ki zi tiki na ɗa a maɗa, ki firiyi ki hi amai midini gadai na wiini EPIƊ-ƊAI ɗi? Aga ki nivi kai.

⁴²Ki kiyi siki aŋ ki siki tiɗi gawki aŋ fiɗi kai, EPIƊ-ƊAI a na arbaki kai.

⁴³Amalesitekai na gaiɗi Kanaaniyakai ɗa e ɗa wuzaki, aga e fiɗiki edi gaini kaɵkar, buri ɓa tiki ki hini EPIƊ-ƊAI edi mak, nɵa Ni aga a zina piki kaalai.

⁴⁴Gaini hanɗa paŋ e zi hiriŋ, e niyi amai merfeŋɗi huwuŋ ɗa, paŋ ktai Zunduk zi bonu na wiini EPIƊ-ƊAI kaalai, Musus ɗa kaalai ktai maa a niyasi edi war kaŋ par kai.

⁴⁵Amalesitekai gaiɗi ka naaniyakai n’e ɗa aŋ fuŋ amai siɗi huwuŋ hanɗa, e niyosi azumai, e fiɗiɗi, e tiki futi piɗi haa a Hormo ta.