Read Mousgoum Piɵi 15 Bible Online

Piɵi 15 - Mousgoum bible

Piɵi 15

¹EPIƊ-ƊAI a miɗini wiini Musus:

²Miɗiɗi wiiɗi aliɗi Izrayel, ku miɗiɗi ɓa: Won hlai na ki cûli aha midini afti n’aga mu siŋki, n’aga ki simni warni ɗa,

³Won hlai na ki diri ki zini ɓaka n’e yiŋ gaini afu wiini EPIƊ-ƊAI, ɓa a ɓaka zi yi zaw, a ɓaka na burini ɵinini- ha zaw, a ɓaka na ɗif a zaŋ pini dirini tizaw zaw, a ɓaka n’a za war fetki n’abakai ɗi ɗa, na ɓa ki ziŋ na ɗa gaini ɵeŋ zaw, a dime zaw, hek ɗi ɗa kapai lugosni a sini firiyi wiini EPIƊ-ƊAI ɗa,

⁴ɗif n’a zaŋa ɓaka hanɗa a kasi avudi kilo hu n’e hiɗiŋ gaini emel litir ɗaw gaini gal aŋ ɓaka lai.

⁵Na ɓa ɗif a za ɗa a ɓaka zi yi zaw, a ɓaka zi ɵeɗ gaini ahini adime ɗa, a kasi vin litir ɗaw gaini gal aŋ ɓaka

⁶Na ɓa a zaŋ ɗa gaini adime ɗa a kasi avudi kilo ɵaara n’e hiɗiŋ gaini emel litir sulu,

⁷vin litir sulu aŋ ɓaka lai, lugosni ɓaka hanɗa aga a sini firiyi wiini EPIƊ-ƊAI.

⁸Na ɓa ɗif a za ɗa a ɓaka zi yi, zaw ɓaka na burini ɵinini-ha, zaw ɓaka zi ɵeɗ ɗi gaini gari ɗa,

⁹ɗif a kasi avudi kilo ɵeeŋe n’e hiɗiŋ gaini emel litir hu lai aŋ ɓaka,

¹⁰a kasi vin litir hu lai. Lugos na pɗem na wiini ɓaka hanɗa aga a saŋa firyi.

¹¹Gari paŋ, adime paŋ, adumi paŋ, hiiki paŋ ɗa aga e zi burini mai hanɗa ɵa.

¹²Ɗif na Izrayel aga a za ɓakani mai hanɗa ɵa, won hlai n’a dara a kasi ɓaka zi yi wuza, aŋ lugos na pɗem n’a sa firyi wiini EPIƊ-ƊAI lai ɗa.

¹³Aliɗi Izrayel paŋ, Won hlai n’e diri e ziŋa ɓaka n’e yiŋ edi gaini afu, na lugosni a saŋa firiyi lai ɗ aa, aga e zi pini gadai hanɗa.

¹⁴Haa sini vuna na wuzaki sek, na ɓa ɗif n’a na arbaki aŋ zak a firiya a za ɓaka n’e yiŋ edi gaini afu burini EPIƊ-ƊAI, na lugosni a sini firiyi wiini EPIƊ-ƊAI lai ɗa aga a zaŋ kal kal maini na ki ɗa ziŋ ɗa nɵa.

¹⁵Buriki tiki gaiɗi ɗai n’e ɗa arbaki aŋ zak ɗa gadai zi ɗiyi ɗa a ni ktai. A gadai n’a sɗa aŋ bunda kai ɵa haa kureɗ, ta EPIƊ-ƊAI mu za braw arbaki tiki gaiɗi ɗai zi zak ɗa kai.

¹⁶Gadai zi ɗû gaini gadai zi ɗiyi na buriki tiki gaiɗi nagai ɗa a ni ktai.

¹⁷EPIƊ-ƊAI a miɗini Musus:

¹⁸miɗiɗi wiiɗi aliɗi Izrayel, ku miɗiɗi ɓa: Won hlai na ki cûli aha midini afti na mu dara mu kiki woni ɗa;

¹⁹Won hlai n’aga ki tiki piki aŋ limi peŋ na midini afti ni ɗa, ki yimi buri na wiini EPIƊ-ƊAI edi kaai.

²⁰Avudi n’e hiɗiŋsi ɗa ki liki pini par agwi, ki ziŋa gamla gaini aŋ ɓaka. Aga ki ziŋa ɓaka gaini aŋ merfeŋni avudiki zi hiiɗi maini n’e ziŋa ɓaka gaini algama, zaw orge n’e giɵiŋ ɗa nɵa.

²¹Haa sini vuna na wuzaki sek, gamla paŋ na ki wiiŋ li avut ɗa aga ki siŋŋa aŋ ɓaka. Gadai hanɗa a na ɵa haa kureɗ.

²²Na ɓa pini diriki kai, ki zi pini gadai na mu siŋni wiini Musus buri a miɗiŋki wiiki tiki, gaiɗi aliki gaiɗi tiyakaiki lai kai, war pi zi tiki par tar, zaw asakal par ɗi ɗa.

²⁴Na ɓa ɗai e siɗi ɓa e zi meefeŋ kai, nɵa ɗai na doogo paŋ ɗa, e ziŋa ɓaka zi yi gaini gari ktai, na lugosni a saŋa firiyi. E si ɓaka z'avudi gaini zi vin na pini ɗa pini gadai zi ɗiyi n’a ɗiya ɗa, e si hek ktai aŋ ɓaka na burini tuwur lai.

²⁵Pai zi ɓaka a za de na wiini hinini tuwur midiɗi ɗai na Izrayel ɗa paŋ, gaini hanɗa, tuwurɗi a haza edi lai, buri ɓa e wili ɗa a wili, e kisi ɓaka na wiiɗi n’e yiŋ edi gaini afu burini EPIƊ-ƊAI ya, e kisi ɓaka na burini tuwur wuzani EPIƊ-ƊAI buri wili n’e wili ɗa ya lai.

²⁶Meefeŋ na wiiɗi aliɗi Izrayel na doogo paŋ gaiɗi ɗai zi zak n’e ɗa gaiɗi lai, aga a haza edi buri ɓa nagai e ziŋ war siɗi kai.

²⁷Na ɓa a za meefeŋ pini dirini kai ɗa a ɗif ktai ɗa, a kitisi hiiki na buza ɗaw aŋ ɓaka na burini tuwur.

²⁸Pai zi ɓaka a za de na wiini hinini tuwur midini ɗif n’a za meefeŋ war siɗi kai ɗa, Won hlai n’a za de hanɗa li ɗa, tuwurni a haza edi.

²⁹Aliɗi Izrayel ɗa lai, ɗai zi zak n’e ɗa arbaɗi lai, gadai zi ɗiyi na buriɗi ɗa a ni ktai, buri nagai paŋ n’e zi meefeŋ pini diriɗi kai ɗa.

³⁰Amma na ɓa a ɗif na Izrayel zaw, a ɗif zi zak ɗi ɗa, a za meefeŋ pini dirini ɗa a tirka ɗa a EPIƊ-ƊAI, ɗif ni ɗa e birgiŋ edi arbaɗi ɗaini na Izrayel ɗa par.

³¹Ɗif hanɗa meefeŋni a pɵa midini, buri a miisa miɗi na wiini EPIƊ-ƊAI, a za pini gadaini kaalai, e fiɗiŋ edi.

³²Sarti n’aliɗi Izrayel e ɗi edi war basga na kaɗatan ɗa, e nivi ɗif ktai edi aŋ paya luwuŋ war mefeŋ na wiini Sabbat,

³³Nagai n’e niviŋ edi aŋ paya luwuŋ ɗa, e kiŋsi wuzani Musus, Aaron gaiɗi Izrayel na doogo lai,

³⁴e tikiŋ war hlai n’a kiɗa a pra edi ta, aŋ baiya wala n’aga e ziŋ sini ɗa.

³⁵Nɵa EPIƊ-ƊAI a miɗini wiini Musus: ɗif hanɗa e fiɗiŋ edi gaini fiɗi, e kiŋ edi war baŋa, aliɗi Izrayel paŋ e biliŋ gaini kriyit haa a mra.

³⁶Ɗai na Izrayel e yimiŋsi edi war kaŋ par e biliŋ gaini kriyit, a mra maini n’EPIƊ-ƊAI a miɗiŋni wiini Musus ɗa nɵa.

³⁷EPIƊ-ƊAI a miɗini wiini Musus:

³⁸Miɗiɗi wiiɗi aliɗi Izrayel, ku miɗiɗi ɓa: haa sini vuna na wuzaɗi sek ɗa, e tikiri mini sapaɗi gaini tikiri, e rgi sogom ktai na mekele cih cih sini mini n’e tikiriŋ ɗa.

³⁹Won hlai n’aga ki wii sapa na mini gaini tikiri siki ɗa, miɗiki aga a kɵa gaini gadai na wiya paŋ, aga ki zi pini lai, nɵa agulki gaini arki aga a kiki aŋ tiki futi pini alawai na zamai ɗa kai.

⁴⁰Nɵa miɗiki aga a kɵa gaini gadai na wiya paŋ, aga ki zi pini lai, nɵa aga ki siŋki edi ɓa ki ɗi na wiya.

⁴¹Ta m’Epiɗ-ɗai Alaw na wiiki, mu milikisi edi war Egipte par muta, kapai mu za aŋ Alaw na wiiki. Ta m’Epiɗ-ɗai Alaw na wiiki.