Read Mousgoum Piɵi 16 Bible Online

Piɵi 16 - Mousgoum bible

Piɵi 16

¹Levit ktai na yikini ɓa Kore a ahini Yitsehar war pinzibaɗi Kehatitekai, a zini pini Datan gaini Abiram gaini On lai aŋ fiki amai sini Musus. Datan gaini Abiram ɗa e ɗi alini Eliyab, On ɗa a ahini Pelet lai, nagai hu paŋ e ɗi na war pinzibani Ruben.

²E fiki amai sini Musus gaiɗi ɗai na Izrayel piɗi miya sulu gaini doogo doogo ɵim, e ɗi abakai na wuzaɗi ɗai n’e kiɗi e simni war diŋgi, na yikiɗi a waa gara lai.

³E tipisi mini Musus gaini Aaron e miɗiɗi: kaai, wiiki ɗa a suwa suwai, ɗai na Izrayel paŋ ɗa e ɗiɗai na sɗik paŋ, EPIƊ-ƊAI a na arbaɗi lai, tik ki ŋi siki ɓa ki sûwiɗi ɗai na wiini EPIƊ-ƊAI na zamai ɗa paŋ buri maɗa?

⁴Won hlai na Musus a ɵina hanɗa, a bula sini azumai, a pa arni azumai,

⁵asakal par a miɗini wiini Kore gaiɗi ɗai n a pini ɓa: dawai gorof par ɗa, EPIƊ-ƊAI aga a suŋkumu ɗif na wiini n’a na sɗik, n’a kiɗa a ɗiya wuzani ɗa, ɗif n’a varaŋ li ɗa aga a hala a ɗiya wuzani.

⁶Tuku Kore gaiɗi ɗaiku ɗa aga ki zi maini nɵa, ki mili wazagai n’e yi wazagai zi ɗûgûdi zi lûgûzi warni ɗa tiki,

⁷dawai ɗa ki mili morjo tiki warni, ki mili wazagai zi ɗûgûdi zi lûgûzi midini wuzani EPIƊ-ƊAI, nɵa aga mu tulumu ɗif n’EPIƊ-ƊAI aga a varaŋ ɗa, ɗif ni ɗa a ɗif na wiini ɗa. Mu kaya li, tiki Levitekai hanɗa.

⁸Musus a miɗini wiini Kore pra: ɵini pɗem tiki, Levitekai,

⁹Viri n’Epiɗ-ɗai Alaw na wiiɗi Izrayel a viriki edi arbaɗi ɗai na Izrayel na doogo paŋ par, a hiniki aŋ ɗiyi wuzani aŋ zi sda n’amlai warni hlai na sɗik na wiini EPIƊ-ƊAI, aŋ zi sda buriɗi ɗai na doogo lai ɗa, a kiɗiki kai ɗi?

¹⁰Tuku Kore na gaiɗi Levitekai na zagalakaiku ɗa, EPIƊ-ƊAI a siki futi aŋ ɗiyi wuzani, tiyana ki firiyi ɓa ki bindi aŋ paakai zi ɓaka lai zaw.

¹¹Nɵa, tuku gaiɗi ɗaiku ki fiki amai na ɗa sini EPIƊ-ƊAI, Aaron ɗa asiya na kapai ki miɗi meefeŋ sini ɗa!

¹²Musus a ɵina ɗif aŋ yikasi Datan gaini Abiram n’alini Eliyaɓ, amma nagai e wiyini seŋ: tiyi mi hiila hili a Kanaan kai.

¹³Mili na ku miliyisi aha midini afti na fiyaw gaini emelni ami a ka warni, aŋ fiɗiyi edi war basga na kaɗatan hanɗa na ɗa a kuɗuku kai ɗe, ku firiya ɓa ku ŋa midiyi pra!

¹⁴Kaai, ku kiyisi na midini afti na fiyaw gaini emelni ami a ka warni kai, ku siyi vuwai gaini zardeŋ vin aŋ bulum kaalai. Ɗai nagai ɗa aga ki cû arɗi co co ɗi, tiyi mi hiila hili kai.

¹⁵Musus a sawa rak a miɗini wiini EPIƊ-ƊAI: ku faala ɓakaɗi kai, mu za meefeŋ wiini ɗif ktai arbaɗi kai, ablehöni ɗif maa mu yima kai.

¹⁶Musus a miɗini wiini Kore: tuku gaiɗi ɗaiku lai, Aaron lai, dawai ɗa ki hilisi wuzani EPIƊ-ƊAI.

¹⁷Ɗif paŋ ɗa a halasi gaini wala n’e yi wazagai zi ɗûgûdi zi lûgûzi warni tini ɗaw ɗaw, ki mili wazagai zi ɗûgûdi zi lûgûzi warni, ki kiŋ wuzani EPIƊ-ƊAI, wazagai n’e yi wazagaiu zi ɗûgûdi zi lûgûzi warni ɗa aga a za paŋ miya sulu gaini doogo doogo ɵim, tuku gaini Aaron ɗa wiiki ɗaw ɗaw lai.

¹⁸E mili wazagai n’e yi wazagai zi ɗûgûdi zi lûgûzi warni tiɗi, e mili afu warni, e mili wazagai zi ɗûgûdi zi lûgûzi midini lai, e ɗiyi mini Gumu n’e nivi gaini EPIƊ-ƊAI woni, Musus gaini Aaron e ɗa lai.

¹⁹Kore a tipiɗisi aliɗi Izrayel na doogo paŋ, a ɗiyisi edi wuzaɗi par ca; Nɵa abai na wiini EPIƊ-ƊAI te siŋka arɗi Izrayel na doogo ɗa.

²⁰EPIƊ-ƊAI a miɗini wiini Musus gaini Aaron

²¹Yimi siki edi siɗi ɗai hanɗa par, mu firiya mu vidiɗi edi tiyana tar.

²²Nɵa Musus gaini Aaron e pûkû siɗi azumai, e pi arɗi azumai e miɗi: Alaw, tuku k’Alaw na ku sa suŋfa warni wazagai zi rgi paŋ, a za tuwur na ɗa a ɗif ktai lai ɗa, kapai ku za hiy siɗi ɗai na doogo paŋ ɗa, buri maɗa?

²³EPIƊ-ƊAI a wiyini seŋ wiini Musus:

²⁴Ku miɗiɗi wiiɗi ɗai buri e yimi siɗi edi war hlai na Kore, Datan gaini Abiram e ɗi woni ɗa par.

²⁵Musus a faka a hala sini Datan gaini Abiram, abakai n’arbaɗi ɗai na Izrayel e hili pini lai.

²⁶Musus a miɗiɗi wiiɗi ɗai na doogo ɗa: mu siiwiki, yimi siki edi sini dalamɗi ɗai na maafanai hanɗa par, ki tiki tiki sini walaɗi ktai kai, ɵa kai ɗa tiki lai aga ki mri burini tuwur na wiiɗi ɗa.

²⁷Ɗai e yimi siɗi edi sini hlai na Kore, Datan gaini Abiram e ɗi woni ɗa par. Datan gaini Abiram e niyisi amlai par e ɗiyi mini dalamɗi ca ca, gaiɗi falakaiɗi gaiɗi aliɗi gaiɗi tiyakaiɗi lai.

²⁸Musus a miɗiɗi: Wala n’aga a za ɗa, a wala n’a siŋka ɓa mu za na ɗa gaini mada dama kai, a ɵinaŋasi aŋ za sda hanɗa a EPIƊ-ƊAI mal.

²⁹Na ɓa mri na wiiɗi ɗai hanɗa, a za li maini na wiiɗi ɗai na doogo ɵa, wala n’a za siɗi maini n’a za siɗi na doogo ɵa lai ɗa.

³⁰Amma na ɓa EPIƊ-ƊAI a za li wala n’a bunda ɗif hiyak, a mala mini afti edi aŋ riɓiɗi ɗai hanɗa gaini wazagai na wiiɗi paŋ, e niyi azumai war hlaiɗi ɗai zi mri karɗi lai ɗa, nɵa aga a yima miɗiki ɓa e miisi ɗa a EPIƊ-ƊAI.

³¹Won hlai n’a ɵa seŋ na mini edi su ɗa, afti na n’e ɗi midini ɗa a ɓasa,

³²a mala mini edi, a riɓiɗi gaini wazagaini dalamɗi paŋ, wazagaiɗi paŋ lai. Vok na wiini Kore gaini wazagaiɗi paŋ lai.

³³Ɗai hanɗa paŋ e niyi azumai war hlaiɗi ɗai zi mri karɗi, nagai gaini wazagaiɗi paŋ, afti a yima midiɗi, e vidi edi arbaɗi ɗai na Izrayel ɗa par maini nɵa.

³⁴Ɗai na Izrayel na ɵemaɗi paŋ ɗa e pri edi tini suura na miɗi ɗa, e miɗi: afti a riɓiyi wiini kai.

³⁵Nɵa afu ktai a halasi sini EPIƊ-ƊAI par a yiiɗi ɗai na miya sulu gaini doogo doogo ɵim n’e ɗa yi wazagai zi ɗûgûdi zi lûgûzi ɗa edi.