Read Mousgoum Piɵi 17 Bible Online

Piɵi 17 - Mousgoum bible

Piɵi 17

¹EPIƊ-ƊAI A miɗini wiini Musus,

²Ku miɗini wiini pai zi ɓaka Eliyazar n’ahini Aaron buri a mulasi wazagai n’e yi wazagai zi ɗûgûdi zi lûgûzi warni edi arni afu n’a ya ɗa par, a duuza afu edi lai, buri ɓa wazagai hanɗa a na sɗik.

³Wazagai n’e yi wazagai zi ɗûgûdi zi lûgûzi warni hanɗa, a wiiɗi ɗai na tuwarai n’e mri mini tuwurɗi lai, amma a na sɗik buri ɓa e kiŋsi wuza, nɵa aga e giɵiŋ duk duk, e biɗiŋ beɗ beɗ kapai e diɓikiŋ sini Gûwiŋ zi ɓaka debak deɓak, a hina aŋ wala zi siŋki buriɗi aliɗi Izrayel.

⁴Pai zi ɓaka Eliyazar a mulasi wazagai n’e yi wazagai zi ɗûgûdi zi lûgûzi warni na zi kiiya ɗa edi, na ɗai na afu a yiɗi e kiŋsi wuzani EPIƊ-ƊAI ɗa, e biɗiŋ beɗ beɗ, e diɓigiŋ sini Gûwiŋ zi ɓaka ɗa duɓak duɓak.

⁵A hina aŋ wala zi ɵi humok buriɗi aliɗi Izrayel, kapai ɗif n’a pai zi ɓaka kai, n’aŋ war pinzibani Aaron kai ɗa, a halasi wuzani EPIƊ-ƊAI aŋ ya wala zi ɗûgûdi zi lûgûzi kai, kapai wala n’a za sini Kore gaiɗi ɗaini ɗa a za sini kai, wala n’EPIƊ-ƊAI a miɗini midini war mini Musus par.

⁶Dawaini ɗa ɗai Izrayel na doogo ɗa e miɗi meefeŋ sini Musus gaini Aaron: e miɗi: ki fiɗiɗi ɗai na wiini EPIƊ-ƊAI edi kiɗi tiki.

⁷Won hlai na ɗai na Izrayel e ɗa tipisi miɗi, Won hlai na Musus gaini Aaron e bindi arɗi sini Gumu n’e nivi gaini EPIƊ-ƊAI woni, ɗugul a ŋ azumai, abai na wiini EPIƊ-ƊAI te siŋkasi edi.

⁸Musus gaini Aaron e hili e ɗiyi wuzani Gumu n’e nivi gaini EPIƊ-ƊAI warni.

⁹EPIƊ-ƊAI a miɗini wiini Musus:

¹⁰Yimi siki edi siɗi ɗai hanɗa par, mu firiya mu vidiɗi edi tiyana tar. Musus gaini Aaron e pûkûsiɗi azumai, e pi arɗi azumai.

¹¹Asakal par Musus a miɗini wiini Aaron: tika walaku n’e yi wazagai zi ɗûgûdi zi lûgûzi warni ɗa, ku mula afu na warni Gûwiŋ zi ɓaka warni, ku mula wazagai zi ɗûgûdi zi lûgûzi midini lai, witaw ku hala siɗi ɗai ɗa ku za de na wiini hinini tuwur midiɗi buri hiy na wiini EPIƊ-ƊAI a niyasi edi ya, gir ɗa a tikasi pini ya lai.

¹²Aaron a tika wala n’e yi wazagai zi ɗûgûdi zi lûgûzi warni ɗa tini maini na Musus a miɗiŋni nɵa, a lawa arbaɗi ɗai n’e tipi ta ɗa, buri ɓa gir ɗa a tikasi pini arbaɗi ya, a ya wazagai zi ɗûgûdi zi lûgûzi ɗa, a za de na wiini hinini tuwur midiɗi lai.

¹³A ɗiya arbaɗi nagai n’e mri gaiɗi na karɗi zaw, gir ɗa a ɗiya ɵa ta lai.

¹⁴Gir hanɗa a ɓa ɗai 14. 700, nagai n’e mri pini Kore ɗa pɵaɗi arɗi kai.

¹⁵Aaron a wayasi sini Musus mini Gumu n’e nivi gaini EPIƊ-ƊAI woni ɗa, gir ɗa a ɗiya ɵa ta lai.

¹⁶EPIƊ-ƊAI a miɗini wiini Musus:

¹⁷Miɗiɗi wiiɗi aliɗi Izrayel ɗa, ku miɗiɗi ɓa: Abai na war pinziba paŋa kaŋasi amaraŋai ɗaw ɗaw, abai na war pinziba paŋ gaiɗi amaraŋai na wiini wiini a tapa paŋ amaraŋa doogo pi sulu. Ku ɗo yikini ɗif paŋ siɗi amaraŋaini ɗo ɗo.

¹⁸Midiɗi amaraŋai na wiini Levi ɗa, ku ɗo yikini Aaron. Nɵa abai na midini pinziba paŋ aga a za gaiɗi amaraŋai na wiini wiini.

¹⁹Ku mulaŋ amlai war gumu n’e nivi gaini EPIƊ-ƊAI warni ɗa, wuzani zuŋduk zi bonu, war hlai na mu nava gaiki woni ɗa.

²⁰Ɗif na mu viriti amaraŋai na wiini li ɗa, aga te goɗa, nɵa ɗai na Izrayel aga e ŋûriyi siki kir kai, e ɗiyi ta lai.

²¹Musus a muɗa seŋ hanɗa wiiɗi aliɗi Izrayel, abakai na wiiɗi paŋ e sisi amaraŋa ktai ktai paŋ. A za paŋ amaraŋa doogo pi sulu. Amaraŋai na wiini Aaron te nafu arbaɗi marɗi lai.

²²Musus a mula amaraŋa hanɗa a kaŋ amlai wuzani EPIƊ-ƊAI, war gumu n’e nivi gaini EPIƊ-ƊAI woni ɗa.

²³Dawaini, hlai n’a Musus a niya amlai war Gumu n’e nivi gaini EPIƊ-ƊAI warni ɗa, a tiliti amaraŋai na wiini Aaron, na war pinzibani Levi, te na goɗa. Te pa cifiyi amlai par, fler zamai gai mili edi, alini amande na gai niyi ca ca siɗi lai.

²⁴Musus a mulasi amaraŋa ɗa edi wuzani EPIƊ-ƊAI par, a siŋkiŋɗi arɗi ɗai na Izrayel, e tiliŋ, ɗif paŋ a tikiti amaraŋaini.

²⁵EPIƊ-ƊAI a miɗini wiini Musus: Kiti amaraŋai na wiini Aaron ɗa amlai wuzani zunduk na ali-fuŋ na bapɗamai na wiini bonu aŋ warni ɗa, kapai a za aŋ wala zi siŋki buriɗi nagai n’e fiki seŋ amai ɗa. Kapai e ŋuriyi kir kai, e siɗi aŋ mri kaalai.

²⁶Musus a za maini n’EPIƊ-ƊAI a miɗiŋni nɵa; a zaŋ ɵa lai.

²⁷Aliɗi Izrayel e miɗini wiini Musus: Suwi kiɗi! Tiyi mi bi ta, mi vidi edi vat.

²⁸Asiya ɗi paŋ n’a hala li wuzani hlai zi simni na wiini EPIƊ-ƊAI ɗa, a mra tar tar! Kapai mi mri wiyi mai hanɗa ɵa ɗi?