Read Mousgoum Piɵi 19 Bible Online

Piɵi 19 - Mousgoum bible

Piɵi 19

¹EPIƊ-ƊAI a miɗini wiini Musus gaini Aaron maini nɵa:

²Gadai n’EPIƊ-ƊAI a saŋ ɗa, a na muɗa maini nɵa: Ku miɗiɗi wiiɗi aliɗi Izrayel ɗa ɓa: E kutukusi ɵaai ktai na makalai na tirki siɗi kai, n’e tiki ka juk wulaɗi duk kaalai.

³Ku sitini wiini pai zi ɓaka Eleyazar, a yimitisi edi warni kaŋ par, e fiɗiti wuzani arni.

⁴Pai zi ɓaka Eleyazar a ma fel agwi a jiibiti ahi tini arni, a yamaŋ war galni mini gumu na e nivi gaini EPIƊ-ƊAI woni sek azi muguzak.

⁵E yiti ɵaai hanɗa edi wuzani arɗi, e yi amurɗi gaini neŋɗi gaini felɗi gaini fulai na warɗi lai.

⁶Pai zi ɓaka a mula luwuŋ Sedre gaini luwuŋ Izop gaini sapa na mekele fel fel ɗa lai, a pokoŋ arni afu n’a na yiti ɵaai ɗa puk

⁷Asakal par, pai zi ɓaka a ma sapa na sini edi gaini yem, a ma sini edi lai. A wayasi aha war kaŋ, amma a hi-hir ɵa haa koskoi ta.

⁸Ni n’a yiti ɵaai edi ɗa, a ma sapa na sini edi gaini yem, a ma sini edi lai, amma a na hi-hir ɵa haa koskoi ta.

⁹Ɗif ktai na hilu a mula bono na wiiɗi ɵaai ɗa, a mulaŋ edi warni kaŋ ɗa par, a kaŋ war hlai na hilu. Aliɗi Izrayel aga e giɗimiŋ buri e zizini yem n’e zi ɗai edi hilu gaini. Hanɗa a ɓaka na burini tuwur.

¹⁰Ni n’a mula bonoɗi ɵaai ɗa edi ɗa, a ma sapa na sini edi lai, a na hi-hir haa koskoi ta lai. Hanɗa a gadai n’a sɗa aŋ bunda kai, buriɗi aliɗi Izrayel gaiɗi zi zak n’e ɗa arbaɗi lai haa kureɗ.

¹¹Ɗif n’a tika tini li sini kopoŋni ɗif paŋ ɗa, a hi-hir haa kosku ɗaw.

¹²Aga a za sini edi hilu gaini yem hanɗa. Aga a za sini edi hilu war mefeŋ n’ag'aŋ hu, war mefeŋ n’ag'aŋ muguzak ɗa lai. Nɵa aga a bunda hilu. Amma na ɓa a za sini edi war mefeŋ n’ag'aŋ hu gaini n’ag'aŋ muguzak ɗa kai ɗa, aga a za edi hilu.

¹³Asiya ɗi paŋ n’a tika tini li sini kopoŋni ɗif zi mri ɗa, na ɓa a ma tuwurni edi kai ɗa, a bunda hlai zi simni na wiini EPIƊ-ƊAI hiir, ɗif ni ɗa aga e birgiŋ edi arbaɗi aliɗi Izrayel par, buri ɓa yem n’a za ɗai edi hilu ɗa a yema sini kai, nɵa a hilu kai, hi-hirni ɗa aŋ pini su ɵa.

¹⁴Gadai zamai an na pra: Na ɓa ɗif a mra li amlai warni gumu ɗa, ɗif n’a niya li amlai war gumu hanɗa paŋ, gaini ni n’a na amlai war gumu hanɗa paŋ ɗa, e ɗa haharai ɵa haa koskoi ta.

¹⁵Wala paŋ n’e mili wala warni, na mini gai dûgi gai futini kai ɗa, a hi-hir.

¹⁶Asiya ɗi paŋ n’a daba sini kopoŋni ɗif edi war basg, n’e fiɗiŋ gai fiɗi zaw n’a mra gai mri, zaw n’ezini a pa sini keɵkeni ɗif zaw sini yeɵ ɗi ɗa, a hi-hir haa koskoi ta.

¹⁷Buri zi n’edi hilu n wiini ɗif na hi-hir hanɗa, e mili bonu na wiini ɓaka n’e yiŋ edi burini tuwur, e miliŋ war wala ca, e bili yem n’a naka su, e miŋ pini do,

¹⁸ɗif ktai na hilu a tika tini luwuŋ izop ktai a jiibaŋ arni yem ɗa, a yemaŋ amai sini gumu ɗa, gaini wazagai n’amlai warni gaiɗi ɗai n’e ɗa amai warni ɗa, zaw sini ɗif n’ezini a pa sini keɵkeni ɗif zi mri ɗa, zaw n’a daba sini ɗif n’e fiɗiŋ gaini fiɗi, zaw n’a mra gai mri zaw n’a daba sini yeɵ ɗa.

¹⁹Ɗif na hilu ɗa aga a za ɗif na hi-hir ɗa edi hilu war mefeŋ n’ag'aŋ hu, gaini n’ag'aŋ muguzak ɗa lai. War mefeŋ n’ag'aŋ muguzak ɗa, ɗif na hi-hir a bunda hilu. Asakal par, a ma sapa na sini edi gaini yem, a ma sini lai, haa koskoi ta ɗa, a bunda hilu.

²⁰Ɗif n’a za li hi-hir n’a za sini edi hilu kai ɗa, e birgiŋ edi arbaɗi aliɗi Izrayel par, buri ɓa a bunda fu hlai na sɗik na wiini EPIƊ-ƊAI hi-hir. A na hi-hir buri ɓa yem n’aza ɗai edi hilu ɗa a yema sini kai.

²¹Hanɗa a gadai n’a na buriɗi ɵa haa kureɗ. Ɗif n’a yema yem n’a za ɗai edi hilu ɗa, aga a ma sapa na sini edi; ɗif n’a tika tini li sini yem n’a za ɗai edi hilu ɗa, a na hi-hir ɵa haa koskoi ta.

²²Wala na tini ɗif na hi-hir a tika sini paŋ ɗa, a hi-hir, ɗif n’a tika tini li sini ɗif na hi-hir ɗa, a hiir ɵa haa koskoi ta lai.