Read Mousgoum Piɵi 20 Bible Online

Piɵi 20 - Mousgoum bible

Piɵi 20

¹Aliɗi Izrayel na doogo paŋ e cû war basga na kaɗataŋ na Sin. War tile n’avut e simni a Kades. Miriyam te mra woni, e piti woni lai.

²Yem a nafu kai, ɗai etipisi mini Musus gaini Aaron.

³Ɗai e dûûɓi Musus e miɗi: Mi mrisi n’a mri wiiyi gaiɗi tawalakaiyi wuzani EPIƊ-ƊAI ca ma marya kaai!

⁴Ku kasi ɗai na wiini EPIƊ-ƊAI edi war basga na kaɗataŋ hanɗa tiɓ aŋ fiɗiyi edi gaini faraiyi paŋ ɗa buri ma ɗa?

⁵Ku miliyisi edi war Egipte par tiɓ buri ma ɗa, na ɓa ku kiyisi fu na ɗa edi war hlai zi gir na mai hanɗa ɵa ɗa? A hlai ktai na ɗif a kiɗa a bula seyem woni kaalai, a pa luwuŋ Fige woni kaalai, luwuŋ zi vin woni kaalai, luwuŋ grenade woni kaalai, koo yem zi ci meere ma aŋ kai sam.

⁶Musus gaini Aaron e yimi siɗi edi arbaɗi par, e hili mini gumu n’e nivi gaini EPIƊ-ƊAI woni, e pûki siɗi azumai, e pi arɗi azumai. Abai na wiini EPIƊ-ƊAI te siŋka arɗi.

⁷EPIƊ-ƊAI a miɗini wiini Musus: Tikiti amaraŋaiku, gaini Aaron na tawalku, tipiɗi aliɗi Izrayel ɗa amai. Ki miɗi siɗi huwuŋ wuzani arɗi paŋ, huwuŋ aga te hina yem a kasi edi, aga ku siɗisi yem siɗi huwuŋ par, aga e ci, nagai gaini faraiɗi paŋ lai.

⁹Musus a tikiti amaraŋai na te na wuzani EPIƊ-ƊAI maini n’EPIƊ-ƊAI a miɗiŋni nɵa:

¹⁰Musu gaini Aaron e tipiɗisi ɗai wuzaɗi huwuŋ. Musus a miɗiɗi: Zi barka, ɵini haw, tiki na hraŋai, tiyi ɗa mi kiɗi mi sikisi yem siɗi huwuŋ hanɗa par ɗe?

¹¹Musus a yima tini amai, a ɵiɓiti huwuni azi sulu gaiɗi amaraŋaini, yem a naɓasi amai par kuh, ɗai e ci, faraiɗi ca lai.

¹²Nɵa EPIƊ-ƊAI a miɗini wiini Musus gaini Aaron: Tiki ɗa, ki yimi seŋŋa kai, ki siŋkiɗi wiiɗi aliɗi Izrayel ɓa ta m’Alaw na jre ɗa kaalai. Nɵa aga ki ɵi wuzaɗi haa, ki kiɗi aha midini afti na mi siŋɗi kai.

¹³Yem hanɗa a yem n’e yikiŋ ɓa "yem na Meriba, a dara muɗa: "hiy" Buri ɓa aliɗi Izrayel e piyini mini EPIƊ-ƊAI woni. Ni a siŋkiɗi edi ɓa ni a Alaw na jre ɗa lai.

¹⁴A Kades par Musus a ɵina ɗa sini pai na Edom, e miɗini maini nɵa: Aliɗi Izrayel na tawalakaiki ɓa, tiki ki siɗi gir n’a za siyi paŋ ya,

¹⁵tiyakaiki e hili war Egipte, mi simni woni haa buza viya, amma ɗai n’Egipte e siɗiyi gir aryi viya, tiyi gaiɗi tiyakaiki paŋ.

¹⁶Tiyi mi ɗûûli sini EPIƊ-ƊAI, EPIƊ-ƊAI a ɵina tuwiyi, a ɵinasi ɵeŋni ktai a miliyisi edi war Egipte par, tiyana mi ɗi na war Kades, fuŋ n’abai a mini hagani aftiku tar.

¹⁷Za barka, hiniyi mi vigiɗi midini aftiku ɗaw, aga mi niyi edi war vuwai kaalai, war zardeŋ zi luwuŋ zi vin kaalai, mi ci yem na war kalaŋki kaalai, mi tikiti te futi n’amai ɗa ɵa cir, mi hûdi na zaw kaalai, na zaw kaalai, haa mi vigi aftiku edi

¹⁸Pai na Edom a wiyini seŋ: Ki vigizi midini aftiŋa kai. Na ɓa ki vigizi li ɗa, aga mi niyiɗi edi miki aŋ hitimiki.

¹⁹Aliɗi Izrayel e miɗini: Tiyi mi niyi warɗi futi ɗa ɗawwa, na ɓa mi ci yemki li, zaw farai na wiyi a ca yemki li ɗa, aga mi virgiŋki. A wala na gir kai, mi vigi na ɗa gaini eziyi nɵa ɗawwa.

²⁰Pai n’a wiyiɗi seŋ: Ki vigi kai, ɗai na Edom e niyisi anene miɗi, gaini vok zi hatam n’abai, zi spak lai.

²¹Nɵa pai na Edom a cikiɗi aliɗi Izrayel buri e vigi midini aftini kai. Aliɗi Izrayel e piyi futi zamai.

²²E fiki a Kades par, aliɗi Izrayel na doogo e cûsiɗi huwuŋ na Hor.

²³Huwuŋ na Hor ɗa te na warni hagani afti na Edom, woni EPIƊ-ƊAI a miɗini wiini Musus gaini Aaron:

²⁴Aaron ɗa aga a mra, aga e tipiŋ gaiɗi tamaini, aga a niya aha midini afti na mu siŋdi wiiɗi aliɗi Izrayel ɗa kai, buri ɓa ki yimi seŋŋa kai, sini yem na Meriba ɗa.

²⁵Yima Aaron gaini Eliyazar n’ahini puku, kiɗi amai midiɗi huwuŋ na Hor,

²⁶ku wa sapa zi pai zi ɓaka na wiini Aaron ɗa edi, ku wiŋni sini Eliyazar n’ahini. Aaron ɗa aga e tipiŋ gaiɗi tiyakaini war hlai ni ɗa, a mra warni hlai ni lai.

²⁷Musus a za maini n’EPIƊ-ƊAI a miɗiŋni nɵa. E niyi amai midiɗi huwuŋ Hor, wuzani arɗi aliɗi Izrayel na doogo ɗa paŋ.

²⁸Musus a mula sapa na wiini Aaron ɗa, a wiŋni sini Eleyazar n’ahini, Aaron a mra woni, amai merfeŋɗi huwuŋ ɗa, asakal par Musus gaini Eleyazar e niyisi azumai amai midiɗi huwuŋ par.

²⁹Ɗai na doogo paŋ e siɗi ɓa Aaron ɗa a mra su, aliɗi Izrayel e tûwiŋ mefeŋ doogo doogo hu.